Ezekiyele 16:1-63
-
Xikwembu xi rhandza Yerusalema (1-63)
16 Yehovha a tlhela a vulavula na mina a ku:
2 “N’wana wa munhu, byela Yerusalema mintirho ya yena ya ku nyenyentsa.+
3 U fanele u ku: ‘Yehovha Hosi Leyikulu a byela Yerusalema a ku: “U huma ka tiko la Vakanana funtshi u psaliwe koseniyani. Papayi wa wena a a li Muamori+ kasi mamani wa wena a a li Muheti.+
4 Siku leli u nga psaliwa hi lona, nkava wa wena a wu tsemiwanga, a wu hlambisiwanga hi mati leswaku u basa, a wu chukuchiwanga hi munyu funtshi a wu phutseliwanga hi tinguvu.
5 A ku na lweyi a nga ku twela wusiwana, a ku yendlela yin’wani ya minchumu leyi. A ku na lweyi a nga ku twela wusiwana. Kambe u txukumetiwe handle hikusa a wu nyenyiwa hi siku leli u nga psaliwa hi lona.
6 “‘“Loko ni hundza, ni ku vone na u yetlelile kolanu na u wumbulukela na u talile hi ngati, ni gama ni ku: ‘Tama u hanya!’ Ni ku byele leswo na u yetlele kolanu na u tale hi ngati ni ku: ‘Tama u hanya!’
7 Ni yendle swaku u tala ku fana ni swinsinyani leswi milaka nhoveni funtshi u kulile u yambala swiphatiphati swa xiyimu xa le henhla. Mavele ya wena ma kulile ni misisi ya wena yi kulile; kambe a wu nge se yambala nchumu.”’
8 “‘Nkama ni nga hundza ni ku vona, ni tsumbule swaku se u kulile leswaku u nga sungula timhaka ta ku rhandzana. Ni gama ni ku mbhonya hi nguvu ya mina+ leswi a wu nga yambalanga nchumu, se ni funga ni tlhela ni yendla ntwananu na wena,’ ku vula Yehovha Hosi Leyikulu, ‘se u gama u va wa mina.
9 Ni tlhele ni ku hlambisa hi mati ni susa ngati leyi a yi li ka muzimbha wa wena se ni ku tota mafurha.+
10 Se ni ku yambexa mpahla leyi nga sasekiseliwa, ni ku nyika ni masandaliya lama nga yendliwa hi xikhumba,* ni ku mbhonya hi panu ya xiyimu xa le henhla ni tlhela ni ku yambexa mpahla ya ku durha.
11 Ni ku sasekisile hi swiphatiphati, ni ku veka mapulsera ka mavoko ni kolari* ka nhamu.
12 Ni tlhele ni ku vekela xitlan’wani* ka nhompfu ni switlan’wani ka tindleve ni harhi* ya ku saseka ka nhloko.
13 A wu tama u tisasekisela hi woru ni prata, a wu yambala mpahla ya ku yendliwa hi panu ya xiyimu xa le henhla, ya ku durha leyi nga sasekiseliwa. A wu dla mpupu wa ku siliwa kahle, wulombe ni mafurha anze u kula u saseka swinene+ u za u faneleka ku va nsati wa hosi.’”
14 “‘Ku saseka ka wena ku yendle leswaku ndhuma* ya wena yi hangalaka ka matiko,+ a ku nga soliwi hi munhu hi mhaka ya leswi ni nga veka ku phatima ka mina henhla ka wena,’+ ku vula Yehovha Hosi Leyikulu.”
15 “‘Kambe u sungule ku tshemba ku saseka ka wena+ naswona u ve nghwavani hi mhaka ya ndhuma ya wena.+ Leswi a wu li nghwavani u tinyikele ka mun’wani ni mun’wani lweyi a ndlhulaka.+
16 U teke mpahla yin’wani ya wena u sasekisela hi yona tindhawu ta wena ta ku tlakuka leti a wu yendla wunghwavani ka tona;+ swilo swoleswo a swi nga fanelanga swi yendleka funtshi swi nga ha yendleki.
17 U tlhele u teka swiphatiphati swa ku saseka leswi nga yendliwa hi woru ni prata leli ni nga ku nyika lona, u yendla swifaniso swa vavanuna u gama u yendla wunghwavani na swona.+
18 U teke mpahla ya wena leyi nga sasekiseliwa u swi* mbhonya hi yona, u tlhela u nyikela mafurha ni swinun’hwelisu* swa mina ka swona.+
19 Pawu leli ni nga ku nyika lona leli nga hambiwa hi mapa ya ku siliwa kahle, mafurha ni wulombe leswi ni nga ku nyika swona swaku u dla, u nyikele hi swona swaku swi va nun’hwelo wa ku tsakisa ka swifaniso leswi u nga swi yendla.+ Hi swoleswo u nga swi yendla,’ ku vula Yehovha Hosi Leyikulu.”
20 “‘U teke vana va wena va madjaha ni va tintombhi lava u nga ni psalela vona,+ kutani u nyikela hi vona ka swifaniso,+ kasi a wu kolwanga hi wunghwavani leli u nga li yendla ku ta fikela swoswi?
21 U dlaye vana va mina va madjaha, u yendla magandzelo hi vona hi ku va hisa hi ndzilu.+
22 Nkama na u yendla mintirho ya wena hinkwayu ya ku nyenyentsa ni wunghwavani, a wu ma khumbukanga masiku lawa na u li jovhem nkama a wu nga yambalanga nchumu, na u wumbulukela u talile hi ngati.
23 Khombo! Khombo ka wena hi mhaka ya leswi u nga yendla swilo leswi hinkwaswu swa ku biha,’+ ku vula Yehovha Hosi Leyikulu.
24 ‘U tiyakele ndhawu ya ku gandzela swikwembu swa mavunhwa ni ndhawu ya ku tlakuka xikarhi ka doropa ka ndhawu yin’wani ni yin’wani ya ku pfuleka.
25 U tiyakele tindhawu ta ku tlakuka ka tindhawu leti nga ni ndhuma ka xitaratu xin’wani ni xin’wani, u txintxe ku saseka ka wena ku va nchumu xa ku nyenyentsa, hi ku tinyikela* ka mun’wani ni mun’wani lweyi a ndlhulaka+ funtshi u yendle mintirho ya yinyingi ya wunghwavani.+
26 U yendle wunghwavani ni Vagibita,+ vavhizinyu va wena lava ku navelaka naswona u ni kwatisile hi mintirho ya wena ya yinyingi ya wunghwavani.
27 Swoswi ni ta lwa na wena ni helisa swakudla swa wena+ kutani ni ta ku nyikela ka vavasati lava ku nyenyaka,+ ku nga vana va tintombhi va Vafilista, lava nga tsemeka nhlana hi mhaka ya manyala ya wena.+
28 “‘Leswi a wu nga kolwi, u yendle wunghwavani ni Vaasiriya,+ kambe hambiloko se u yendle wunghwavani na vona a wu kolwanga.
29 Se u tame u yendla wunghwavani ka tiko la vaxavisi* ni ka Vakalidiya+ kambe a wu kolwanga.
30 Mbilu ya wena a yi vabya,’ * ku vula Yehovha Hosi Leyikulu, ‘nkama u nga yendla minchumu leyi hinkwayu, u tikhoma ku fana ni nghwavani leyi kalaka yi nga na tingana!+
31 Kambe nkama u nga tiyakela ndhawu ya ku gandzela swikwembu swa mavunhwa ka tindhawu leti nga ni ndhuma ka xitaratu xin’wani ni xin’wani ni nkama u nga yendla ndhawu ya ku tlakuka axikarhi ka doropa ka ndhawu yin’wani ni yin’wani ya ku pfuleka, a wu nga fani ni nghwavani hikusa a wu yala ku hakeliwa.
32 U wansati lweyi a mbuyetaka lweyi a yetlelaka ni vavanuna van’wanyani a tshika nuna wa yena!+
33 Vanhu va nyika tinghwavani tinyiko+ kambe wena u nyika hinkwavu lava ku navelaka tinyiko+ funtshi wa va xava leswaku va suka ka tindhawu hinkwatu va ta ka wena leswaku va ta yendla wunghwavani.+
34 A wu fani ni vavasati van’wani lava nga tinghwavani. A ku na lweyi a yendlaka wunghwavani ku fana na wena! Hi wena u hakelaka van’wani, a hi vona va hakelaka wena. U hambanile ni tinghwavani tin’wani.’
35 “Kutani wena nghwavani,+ yingisa leswi Yehovha a swi vulaka.
36 Yehovha Hosi Leyikulu a li: ‘Phela u kombise leswi u swi navelisaka swona ku famba masangu naswona u voniwe na u nga yambalanga nchumu hi nkama lowu a wu yendla wunghwavani ni vanhu lava u rhandzanaka na vona ni swikwembu swa wena hinkwaswu swa ku nyenyentsa*+ leswi u nga swi yendlela magandzelo hi ngati ya vana va wena va madjaha;+
37 kutani ni ta hlengeleta vanhu hinkwavu lava u nga rhandzana na vona lava u nga va tsakisa, hinkwavu lava u nga va rhandza ni hinkwavu lava u nga va nyenya. Ni ta va hlengeleta va huma ka tindhawu hinkwatu leswaku va ta lwa na wena, va ta ku siya na u nga yambalanga nchumu, naswona va ta vona tingana ta wena.+
38 “‘Ni ta ku khatisa hi ndlela leyi ni va yavanyisaka hi yona vavasati lava mbuyetaka+ ni lava halataka ngati+ funtshi ngati ya wena yi ta halatiwa hi ndlela ya mona ni ya wukwele.+
39 Ni ta ku nyikela ka vona, va ta wisetela tindhawu ta wena leti u gandzelaka ka tona swikwembu swa wena swa mavunhwa naswona va ta dilizela tindhawu ta wena ta ku tlakuka;+ va ta ku hlivila mpahla+ va teka swiphatiphati swa wena swa ku saseka,+ va ku siya na u nga yambalanga nchumu.
40 Va ta rhamba vanhu va vanyingi+ leswaku va ta lwa na wena, va ta ku ba hi maribye+ naswona va ta ku dlaya hi swipada swa vona.+
41 Va ta hisa tiyindlo ta wena hi ndzilu+ naswona va ta ku yavanyisa aphambheni ka vavasati va vanyingi; ni ta ku tshikisa ku va nghwavani+ funtshi a wu nge he hakeli munhu.
42 Ndlela leyi ni nga ku kwatela hi yona+ yi ta pumbeka naswona a ni nga ha ta ku kwatela;+ mbilu ya mina yi ta va na yi rhulile funtshi a ni nge he kwati.’
43 “‘Leswi u kalaka u nga ma khumbukanga masiku lawa na u li jovhem+ naswona u nga ni kwatisa hi ku yendla swilo leswi, ni ta ku khoma hi ku ya hi leswi u nga swi yendla,’ ku vula Yehovha Hosi Leyikulu, ‘naswona a wu nga ha ta tama u yendla manyala ni ku yendla mintirho ya wena ya ku nyenyentsa.
44 “‘Phela mun’wani ni mun’wani lweyi a tirhisaka swihlayahlaya a ta tirhisa xihlayahlaya lexi ka wena: “Ku tlula ka mhala* ku djondzisa n’wana lweyi a nga ndzeni!”+
45 U n’wana wa mamani wa wena, lweyi a nga nyenya nuna wa yena ni vana va yena. U makwavu wa xisati wa vamakwenu va xisati lava nga nyenya vanuna va vona ni vana va vona. Mamani wa wena a a li Muheti kasi papayi wa wena a a li Muamori.’”+
46 “‘Makwenu wa wena wamukulu wa xisati i Samariya+ lweyi a tshamaka ka tlhelo la norte* ni vana va yena va tintombhi*+ naswona makwenu wa wena wamutsongo wa xisati i Sodoma,+ lweyi a tshamaka ka tlhelo la le sul* ni vana va yena va tintombhi.+
47 U tekelele mahanyelo ya vona ni mintirho ya vona ya ku nyenyentsa, u tlhela u hanya hi ndlela ya ku biha ku tlula na vona hi nkamanyana.+
48 Leswi ni hanyaka,’ ku vula Yehovha Hosi Leyikulu, ‘Sodoma makwenu wa wena wa xisati ni vana va yena va tintombhi a va swi yendlanga leswi wena ni vana va wena va tintombhi mi nga swi yendla.
49 Phela Sodoma makwenu wa wena wa xisati a yendle xihoxo lexi: Yena ni vana va yena va tintombhi+ a va titlakusa+ funtshi a va ni swakudla swa swinyingi,+ a va nga karhatiwi hi nchumu;+ kambe a va swi pfunanga swisiwana ni lava a va xaniseka.+
50 Va titlakusile+ funtshi va tame va yendla mintirho ya ku nyenyentsa phambheni ka mina,+ kutani ni swi vone na swi fanela swaku ni va susa.+
51 “‘Hambi Samariya,+ a nga yi yendlanga hambi hafu ya swidjoho leswi u nga swi yendla. U tame u yendla mintirho ya ku nyenyentsa ku tlula leyi va nga yi yendla, vamakwenu va wena va xisati va za va voneka na va lulamile hi mhaka ya mintirho ya wena hinkwayu ya ku nyenyentsa.+
52 Swoswi u fanele u tiyisela ku danisiwa hikusa u nyimelele mintirho ya vamakwenu va wena va xisati. Va lulamile ku ku tlula hi mhaka ya leswi u nga yendla xidjoho xa ku nyenyentsa ku tlula xa vona. Se swoswi tiyisela ku danisiwa hi leswi u nga yendla vamakwenu va wena va xisati va voneka na va lulamile.’
53 “‘Ni ta hlengeleta swikarawa swa vona, swikarawa swa Sodoma ni vana va yena va tintombhi ni swikarawa swa Samariya ni vana va yena va tintombhi; ni ta tlhela ni hlengeleta swikarawa swa wena ku patsa na vona,+
54 leswaku u ta tiyisela ku danisiwa; phela u ta dana hi mhaka ya leswi u nga va tiyisa.
55 Vamakwenu va wena va xisati, ku nga Sodoma ni vana va yena va tintombhi va ta tlhelela ka xiyimu xa vona xa ku sungula, na Samariya ni vana va yena va tintombhi va ta tlhelela ka xiyimu xa vona xa ku sungula, wena ni vana va wena va tintombhi mi ta tlhelela ka xiyimu xa n’wina xa ku sungula.+
56 A wu nga fanelanga u vulavule hi Sodoma makwenu wa wena wa xisati hi siku leli u nga titlakusa hi lona,
57 na wubihi la wena li nge se kombisiwa.+ Swoswi vana va tintombhi va Siriya ni vavhizinyu va yena ni vana va tintombhi va Vafilista va ku rhuketela,+ hinkwavu lava nga kusuhi na wena va ku poyila.
58 U ta tshovela mihandzu ya manyala ya wena ni ya mintirho ya wena ya ku nyenyentsa,’ ku vula Yehovha.”
59 “Yehovha Hosi Leyikulu a li: ‘Ni ta ku khoma hi ku ya hi leswi u nga swi yendla,+ hikusa u swi tekele hansi switshembiso swa wena leswi u nga swi yendla hi ku tshika ntwananu wa mina.+
60 Kambe ni ta khumbuka ntwananu lowu ni nga wu yendla na wena na wa ha li jovhem naswona ni ta tiyisa ntwananu wolowo leswaku wu tshama hi masiku.+
61 U ta khumbuka mahanyelo ya wena naswona u ta dana+ nkama u nga ta yamukela vamakwenu va wena va xisati, lava i nga vakulu ni lava i nga vatsongo ka wena, ni ta ku nyika vona swaku va va vana va wena va tintombhi ku nga li hi mhaka ya ntwananu wa wena.’
62 “‘Ni ta tiyisa ntwananu wa mina na wena; u ta swi tiva swaku hi mina Yehovha.
63 Nkama ni nga ta ku rivalela ku nga na mhaka hinkwaswu leswi u nga swi yendla,+ u ta gama u khumbuka leswi u nga swi yendla naswona swi ta ku danisa swinene+ hambi ku vulavula hi mhaka ya leswi u nga vekiwa hansi,’ ku vula Yehovha Hosi Leyikulu.”
Tinhlamunselu ta le hansi
^ Kumbe: “xikhumba xa xiharhi lexi vitaniwaka foca”.
^ Kumbe: “cordão”.
^ Kumbe: “xigolwani”.
^ Kumbe: “korowa”.
^ Hi Xiheberu: “vito”.
^ Ku nga swifaniso swa vavanuna.
^ Vona Ntlhamuselo.
^ Hi Xiheberu: “pfule minenge ya wena”.
^ Hi Xiheberu: “ka tiko la Kanana”.
^ Kumbexana: “Vona leswi ni nga ku kwatelisa xiswona”.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Kumbe: “gazela”.
^ Kumbe: “adzongeni”. Hi Xiheberu: “ka xinene xa wena”.
^ Kumbexana ku vulavuliwa hi madoropa lama nga kusuhi.
^ Kumbe: “n’walungu”. Hi Xiheberu: “aximatsini xa wena”.
