Ezekiyele 17:1-24
17 Yehovha a tlhela a vulavula na mina a ku:
2 “N’wana wa munhu, vula xihlayahlaya ni xivuriso hi ta yindlo ya Israyele.+
3 U fanele u ku: ‘Yehovha Hosi Leyikulu a li: “Gama* lalikulu+ leli nga ni timpapa tatikulu ta ku leha ni tinsiva ta tinyingi ta tikorikori, li te aLebanoni+ li fika li tshova xigadjani hala henhla magamu ka nsinya wa mukedari.+
4 Li tshove xigadjani xa le henhla swinene, li xi tisa ka tiko la vaxavisi* li fika li xi veka ka doropa la vaxavisi.+
5 Se li gama li teka mbewu yin’wani atikweni+ li yi byala ka nsimu ya ku nona. Li yi byala ku fana ni nsinya lowu vitaniwaka munengenezi* akusuhi ni mati ya manyingi.
6 Yi kula yi nava yi va nsinya wawukulu wa mawuvha wa ku kala wu nga lehanga,+ lowu matluka ya wona ma nga khotsekela ndzeni, timintsu ta wona ti kula hansi ka wona. Kutani mbewu leyi yi va nsinya wa mawuvha lowu nga ni tigadja.+
7 “‘“Se ku ta gama lin’wani lalikulu,+ leli nga ni timpapa tatikulu.+ Kutani nsinya lowu wa mawuvha wu yisa timintsu ta wona ka lona, ti ya kule ni lani a wu byaliwe kona, wu yise tigadja ta wona ka gama swaku li ta wu regara.+
8 A wu byaliwe ka nsimu yayinene leyi nga kusuhi ni mati ya manyingi, leswaku wu humesa tigadja, wu psala mihandzu, wu va nsinya wawukulu wa mawuvha.”’+
9 “Hlaya u ku: ‘Yehovha Hosi Leyikulu a li: “Indjhe wu ta kula? Indjhe munhu mun’wani a nge tsuvuli timintsu ta wona,+ a yendla mihandzu ya wona yi bola ni matluka ya wona ma vuna?+ Wu ta woma lakakuva a ku nga ta laveka munhu wa matimba kumbe vanhu va vanyingi swaku va wu tsuvula.
10 Hambileswi wu nga tsuvuliwa wu tlhela wu byaliwa, indjhe wu ta kula? Indjhe a wu nga ta woma swa wugamu loko wu biwa hi moya wa le wuxeni? Wu ta woma ka nsimu leyi wu nga byaliwa ka yona.”’”
11 Yehovha a tlhela a vulavula na mina a ku:
12 “Ni kombela u byela vanhu lava va ku kala va nga ni yingisi, u ku: ‘A mi swi tivi swaku swilo leswi swi vula yini?’ Vula u ku: ‘Maswivo! Hosi ya le Babilona yi te Yerusalema yi fika yi teka hosi ya kona ni varhangeli va yona yi famba na vona aBabilona.+
13 Yi tlhela yi teka n’wana* mun’wani wa le wuhosini+ yi yendla ntwananu na yena, kutani yi mu yendla a funga.+ Se yi gama yi teka vavanuna lava rhangelaka atikweni,+
14 leswaku mfumu wu vekiwa hansi, wu nga ha vi ni matimba, ni swaku wu ta kota ku tama wu va kona ntsena loko wu hlayisa ntwananu wa yona.+
15 Kambe hi wugamu hosi ya Yuda yi djikele hosi ya le Babilona+ yi rhumela vanhu va yona aGibita, swaku yi kuma makavhalu+ ni masonchwa ya manyingi.+ Indjhe maplanu* ya yona ma ta tirha? Indjhe lweyi a yendlaka swilo leswi a nga ta khatisiwa? Indjhe a ta tshova ntwananu a tlhela a pona?’+
16 “‘“Leswi ni hanyaka,” ku vula Yehovha Hosi Leyikulu, “Zedekiya a ta fela Babilona, ka tiko leli Hosi Nebukadinazara lweyi a nga mu veka swaku a va hosi a tshamaka kona, hikusa a delele leswi va nga mu fungisa a tlhela a tshova ntwananu wa hosi ya le Babilona.+
17 Masonchwa ya manyingi ya Faru a ma nga ta mu pfuna nyimpini,+ nkama ku nga ta yakiwa muru wa ku pfuna ku hlasela doropa leswaku ku ta dlayiwa vanhu va vanyingi.
18 A delele leswi nga fungiwa kutani a tshova ntwananu. A yendletele swilo leswi hinkwaswu, hambileswi a nga tshembisa, kutani a nga ta baleka.”’
19 “‘Se Yehovha Hosi Leyikulu a li: “Leswi ni hanyaka, ni ta yendla swaku a tshovela ku vava hi mhaka ya leswi a nga delela leswi ni nga swi funga+ a tlhela a tshova ntwananu wa mina.
20 Ni ta mu hoxa redi la mina la ku hlota hi lona naswona a ta phasiwa.+ Ni ta mu yisa Babilona ni fika ni mu yavanyisa kona hi mhaka ya leswi a kalaka a nga tshembekanga ka mina.+
21 Masonchwa ya yena hinkwawu lama nga baleka ma ta dlayiwa hi xipada, kasi lama nga pona ma ta hangalasiwa ka tindhawu hinkwatu.+ Kutani mi ta swi tiva leswaku mina Yehovha, ni vulavulile.”’+
22 “‘Yehovha Hosi Leyikulu a li: “Ni ta tshova xigadjani kole henhla magamu ka nsinya wawukulu wa mukedari+ ni xi byala, ni ta phatlula xigadjani xa ku wolova ka tigadja ta wona ta le henhla swinene,+ ni xi byala ka ntshava ya ku leha swinene.+
23 Ni ta xi byala ka ntshava ya ku tlakuka ya Israyele; tigadja ta xona ti ta kula, xi ta psala mihandzu kutani xi va nsinya wawukulu wa mukedari. Swinyanyani swa mixakaxaka swi ta tshama hansi ka wona ni ka ndzhuti wa matluka ya wona.
24 Minsinya hinkwayu ya khwati yi ta swi tiva swaku mina Yehovha, ni xixe nsinya wawukulu ni tlakusa nsinya wawutsongo;+ ni womise nsinya lowu nga ni matluka ya vherdi,* ni yendla swaku nsinya lowu nga woma wu hluka.+ Mina Yehovha, ni swi vulile naswona ni swi yendlile.”’”
Tinhlamunselu ta le hansi
^ Ku nga muxaka wa xinyanyani.
^ Hi Xiheberu: “ka tiko la Kanana”.
^ Kumbe: “salgueiro”.
^ Hi Xiheberu: “mbewu”.
^ Kumbe: “makungu”.
^ Kumbe: “lihlaza”.
