Ezekiyele 18:1-32
18 Yehovha a tlhela a vulavula na mina a ku:
2 “Xi vula yini xivuriso lexi, lexi mi xi tirhisaka ka tiko la Israyele lexi nge: ‘Vapapayi va dle mawuvha ya ku dzunga, kambe ku rhurhumela matinyu ya vana’?+
3 “‘Leswi ni hanyaka,’ ku vula Yehovha Hosi Leyikulu, ‘a mi nga ha ta tama mi xi tirhisa xivuriso lexi aIsrayele.
4 Vonani! Wutomi la vanhu hinkwavu i la mina. Wutomi la papayi ni la n’wana i la mina. Munhu lweyi a djohaka hi yena a nga ta fa.
5 “‘A hi nge munhu a lulamile, a yendla swaswinene a tlhela a tshembeka.
6 A nga dli magandzelo lawa ma nga yendleliwa swikwembu ka tintshava,+ a nga gandzeli swifaniso swa ku nyenyentsa* swa Vayisrayele, a nga yetleli ni nsati wa wanuna mun’wani+ kumbe wansati lweyi a nga ka masiku ya yena,+
7 a nga khomi munhu hi ndlela ya ku biha+ kambe a tlhelisa leswi a nga tamelisiwa swona hi lweyi a mu devhaka swaku swi va xitiyisekisu,+ a nga tekeli munhu swilo swa yena+ kambe lweyi a twaka ndlala a mu nyika swakudla+ naswona lweyi a kalaka a nga yambalanga nchumu a mu mbhonya hi nguvu,+
8 a nga lavi majuru ka lava a va lombaka,+ a nga yendli swilo swa ku kala swi nga lulamanga,+ a yavanyisa vanhu hi ndlela ya ku lulama,+
9 a tama a yingisa minawu ya mina ni swiboho swa mina swa ku yavanyisa leswaku a tshama na a tshembekile. Munhu wa ku fana ni lweyo a lulamile naswona a ta tama a hanya,’+ ku vula Yehovha Hosi Leyikulu.
10 “‘Kambe a hi nge munhu lweyi i papayi wa n’wana wa djaha lweyi a nga xigevenga+ kumbe mudlayi+ kumbe munhu lweyi a yendlaka xin’wani xa swilo leswi landzelaka,
11 (hambileswi papayi lweyi a kalaka a nga swi yendlanga swilo leswi) n’wana lweyi, a dla magandzelo lawa ma nga yendleliwa swikwembu ka tintshava, a yetlela ni nsati wa wanuna mun’wani,
12 a xanisa lava pfumalaka ni swisiwana,+ a tekela vanhu swilo swa vona, a nga xi tlhelisi nchumu lexi a nga tamelisiwa xona swaku xi va xitiyisekisu, a gandzela swifaniso swa ku nyenyentsa,+ a yendla minchumu ya ku nyenyentsa,+
13 a lombisa hi majuru,+ n’wana lweyi a nge tami a hanya. A ta dlayiwa hi mhaka ya swilo leswi hinkwaswu swa ku nyenyentsa leswi a swi yendlaka. A ta va ni nandzu wa ngati ya yena.
14 “‘Kambe a hi nge papayi a ni n’wana wa djaha lweyi a nga vona swidjoho hinkwaswu leswi papayi wa yena a nga swi yendla kambe yena a nga swi yendli hambileswi a nga swi vona.
15 A nga dli magandzelo lawa ma nga yendleliwa swikwembu ka tintshava, a nga gandzeli swikwembu swa ku nyenyentsa swa Vayisrayele, a nga yetleli ni nsati wa wanuna mun’wani,
16 a nga khomi munhu hi ndlela ya ku biha, a tlhelisa nchumu lexi a nga tamelisiwa xona hi lava mu devhaka swaku xi va xitiyisekisu, a nga va tekeli vanhu swilo swa vona, lweyi a twaka ndlala a mu nyika swakudla naswona lweyi a kalaka a nga yambalanga nchumu a mu mbhonya hi nguvu;
17 a nga swi karhati swisiwana, a nga lavi majuru, a hanya hi swiboho swa mina swa ku yavanyisa a tlhela a yingisa minawu ya mina. Munhu yelweyo a nge fi hi mhaka ya xidjoho xa papayi wa yena. A ta tama a hanya.
18 Kambe leswi papayi wa yena a kalaka a nga tshembekanga, a nga tekela makwavu swilo swa yena ni leswi a nga yendla swilo swa ku biha axikarhi ka vanhu va tiko la yena, a ta fa hi mhaka ya xihoxo xa yena.
19 “‘Kambe n’wina mi ta ku: “Hi mhaka muni n’wana a nga nyikiwi nandzu hi mhaka ya xihoxo xa papayi wa yena?” Leswi n’wana lweyi wa djaha a nga yendla swa ku lulama ni swaswinene, a nga yingisa minawu ya mina hinkwayu, a ta tama a hanya.+
20 Munhu lweyi a djohaka hi yena a nga ta fa.+ N’wana a nge nyikiwi nandzu hi mhaka ya xihoxo xa papayi wa yena, na yena papayi a nge nyikiwi nandzu hi mhaka ya xihoxo xa n’wana wa yena. Lweyi wa ku lulama a ta yavanyisiwa hi ku ya hi ku lulama ka yena ni lweyi wa ku biha a ta yavanyisiwa hi ku ya hi wubihi la yena.+
21 “‘Loko munhu lweyi a yendlaka swa ku biha a tisola ka swidjoho swa yena hinkwaswu leswi a nga swi yendla, kutani a yingisa minawu ya mina hinkwayu a yendla swa ku lulama ni swaswinene, a ta tama a hanya. A nga ta fa.+
22 Swidjoho hinkwaswu leswi a nga swi yendla a swi nga ta khumbukiwa.+ A ta tama a hanya hi mhaka ya leswi a nga yendla swa ku lulama.’+
23 “‘Indjhe na tsaka loko munhu lweyi a yendlaka swa ku biha a fa?’+ ku vula Yehovha Hosi Leyikulu. ‘Kasi a ni tsakeli leswaku a txintxa tindlela ta yena kutani a tama a hanya?’+
24 “‘Kambe loko lweyi wa ku lulama a tshika ku yendla swa ku lulama se a yendla swa ku biha, a yendla swilo hinkwaswu swa ku nyenyentsa leswi yendliwaka hi lava va ku biha, indjhe a ta tama a hanya? Swilo hinkwaswu swaswinene leswi a nga swi yendla a swi nga ta khumbukiwa.+ A ta fa hi mhaka ya leswi a kalaka a nga tshembekanga ni hi mhaka ya xidjoho lexi a nga xi yendla.+
25 “‘Kambe n’wina mi ta ku: “Ndlela ya Yehovha a yi lulamanga.”+ Ni kombela mi yingisa, n’wina Vayisrayele. I ndlela ya mina yi kalaka yi nga lulamanga?+ A hi tindlela ta n’wina leti kalaka ti nga lulamanga?+
26 “‘Loko lweyi wa ku lulama a tshika ku yendla swa ku lulama se a yendla swa ku biha a gama a fa hi mhaka ya leswo, a ta va a dlayiwe hi mhaka ya xidjoho xa yena.
27 “‘Kutani loko munhu lweyi a yendlaka swa ku biha a tshika swilo swa ku biha leswi a nga swi yendla, a sungula ku yendla swa ku lulama ni swaswinene, a ta ponisa wutomi la yena.+
28 Loko a swi tsumbula kutani a tisola ka swidjoho swa yena hinkwaswu leswi a nga swi yendla, a ta tama a hanya. A nga ta fa.
29 “‘Kambe Vayisrayele va ta ku: “Ndlela ya Yehovha a yi lulamanga.” N’wina Vayisrayele i tindlela ta mina ti kalaka ti nga lulamanga?+ A hi tindlela ta n’wina leti kalaka ti nga lulamanga?’
30 “‘Kutani ni ta yavanyisa mun’wani ni mun’wani wa n’wina, n’wina Vayisrayele hi ku ya hi tindlela ta yena,’+ ku vula Yehovha Hosi Leyikulu. ‘Tisoleni, tisoleni hi ku helela ka swidjoho swa n’wina hinkwaswu leswaku mi nga vi ntlhamu lowu yendlaka van’wani va djoha.
31 Tshikani swidjoho swa n’wina hinkwaswu leswi mi nga swi yendla,+ mi txintxa timbilu ta n’wina ni ndlela leyi mi pimisaka hi yona,+ hikusa hi mhaka muni n’wina Vayisrayele mi fanele mi fa?’+
32 “‘A ni tsaki loko munhu a fa,’+ ku vula Yehovha Hosi Leyikulu. ‘Kutani tisoleni leswaku mi ta tama mi hanya.’”+
Tinhlamunselu ta le hansi
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” naswona li tirhiseliwa ku kombetela ka xiyeyiso.
