Ezekiyele 20:1-49
20 Hi siku la wu 10 ka wheti ya wu 5 hi lembe la wu 7, madoda man’wani ya Vayisrayele ma fike ma tshama hansi phambheni ka mina ma vutisa hi Yehovha.
2 Se Yehovha a vulavula na mina a ku:
3 “N’wana wa munhu, byela madoda ya Vayisrayele u ku: ‘Yehovha Hosi Leyikulu a li: “Mi tele ku ta vutisa hi mina? ‘Leswi ni hanyaka, a ni nga ta mi hlamula,’+ ku vula Yehovha Hosi Leyikulu.”’
4 “N’wana wa munhu, u lunghekile swaku u va yavanyisa? U swi lunghekelile ku va yavanyisa? Va byeli swilo swa ku nyenyentsa leswi vavhovho va vona va nga swi yendla.+
5 Va byeli u ku: ‘Yehovha Hosi Leyikulu a li: “Siku leli ni nga mu langa hi lona Israyele,+ ni tlhele ni fungela* vana* va Yakobe ni titivisa ka vona ka tiko la Gibita.+ Ni va fungelile ni ku: ‘Hi mina Yehovha Xikwembu xa n’wina.’
6 Hi siku lolelo ni fungile swaku ni ta va humesa ka tiko la Gibita ni va yisa ka tiko leli ni nga va lavela* lona, tiko leli nga tala hi leiti ni wulombe.+ A li saseke ku tlula matiko hinkwawu.
7 Se ni va byela ni ku: ‘Mun’wani ni mun’wani wa n’wina a a txukumeti swilo swa ku nyenyentsa leswi nga phambheni ka yena; mi nga tichakisi hi swikwembu swa ku nyenyentsa* swa le Gibita.+ Hi mina Yehovha Xikwembu xa n’wina.’+
8 “‘“Kambe va ni djikelile naswona a va swi lavanga ku ni yingisa. A va swi txukumetanga swilo swa ku nyenyentsa leswi a swi li phambheni ka vona naswona a va swi txukumetanga swikwembu swa ku nyenyentsa swa le Gibita.+ Se ni va tshembise ku va chululela ku kwata ka mina ni ku va kwatela swinene ka tiko la Gibita.
9 Kambe ni yendle leswo hi mhaka ya vito la mina leswaku li nga chakisiwi phambheni ka matiko lawa a va tshama xikarhi ka wona.+ Hikusa ni titivise ka vona* phambheni ka matiko nkama ni nga va* humesa ka tiko la Gibita.+
10 Ni va humese ka tiko la Gibita ni va yisa mananga.+
11 “‘“Ni va nyike minawu ya mina ni tlhela ni va byela swiboho swa mina swa ku yavanyisa,+ leswaku munhu lweyi a swi yingisaka a tama a hanya.+
12 Ni tlhela ni va nyika tisavata ta mina+ swaku ti va xikombiso xikarhi ka mina na vona,+ leswaku va ta swi tiva swaku mina Yehovha, hi mina ni va kwetsimisaka.
13 “‘“Kambe Vayisrayele va ni djikelile amananga.+ A va yi yingisanga minawu ya mina ni swiboho swa mina swa ku yavanyisa, leswi nga yendlaka swaku munhu a tama a hanya loko a swi yingisa. A va ti hloniphanga tisavata ta mina. Kutani ni va tshembise ku va chululela ku kwata ka mina amananga leswaku ni va helisa.+
14 Ni yendle leswo hi mhaka ya vito la mina leswaku li nga chakisiwi phambheni ka matiko lawa ni nga va* humesa na ma va vona.+
15 Ni tlhele ni va fungela amananga leswaku a ni nga ta va yisa ka tiko leli a ni va nyike lona,+ tiko leli nga tala hi leiti ni wulombe,+ tiko la ku saseka ku tlula matiko hinkwawu,
16 hi mhaka ya leswi va kalaka va nga swi yingisanga swiboho swa mina swa ku yavanyisa ni minawu ya mina naswona va kalaka va nga ti hloniphanga tisavata ta mina, hikusa timbilu ta vona a ti gandzela swifaniso swa vona swa ku nyenyentsa.+
17 “‘“Kambe ni va twele wusiwana, a ni va dlayanga; a ni va helisanga amananga.
18 Ni byele vana va vona amananga ni ku:+ ‘Mi nga yingisi minawu ya vavhovho va n’wina+ kumbe swiboho swa vona swa ku yavanyisa kumbe mi tichakisa hi swifaniso swa vona swa ku nyenyentsa.
19 Hi mina Yehovha Xikwembu xa n’wina. Yingisani minawu ya mina ni swiboho swa mina swa ku yavanyisa, mi swi yendla.+
20 Kwetsimisani tisavata ta mina,+ ti va xikombiso xikarhi ka mina na n’wina leswaku mi ta swi tiva leswaku hi mina Yehovha Xikwembu xa n’wina.’+
21 “‘“Kambe vana va vona va sungule ku ni djikela.+ A va yi yingisanga minawu ya mina ni swiboho swa mina swa ku yavanyisa, leswi nga yendlaka swaku munhu a tama a hanya loko a swi yingisa. A va ti hloniphanga tisavata ta mina. Kutani ni va tshembise ku va chululela ku kwata ka mina ni ku va kwatela swinene amananga.+
22 Kambe a ni swi yendlanga leswo+ hi mhaka ya vito la mina,+ leswaku li nga chakisiwi phambheni ka matiko lawa ni nga va* humesa na ma va vona.
23 Ni tlhele ni va fungela amananga swaku ni ta va hangalasa xikarhi ka matiko,+
24 hi mhaka ya leswi va kalaka va nga swi yingisanga swiboho swa mina swa ku yavanyisa ni minawu ya mina,+ a va ti hloniphanga tisavata ta mina naswona va gandzele swifaniso swa ku nyenyentsa swa vavhovho va vona.+
25 Ni tlhele ni va tshika swaku va yingisa minawu ya ku kala yi nga li yinene ni swiboho swa ku yavanyisa leswi a swi ta yendla swaku va nga tami va hanya.+
26 Ni va tshike va tichakisa hi magandzelo ya vona, va hisa vana va vona va matevula hi ndzilu+ leswaku ni ta va helisa, leswaku va ta swi tiva swaku hi mina Yehovha.”’
27 “Kutani vulavula ni Vayisrayele wena n’wana wa munhu u ku: ‘Yehovha Hosi Leyikulu a li: “Vavhovho va n’wina va ni poyile hi ndlela ya ku fana hi ku kala va nga tshembeki ka mina.
28 Ni va yise ka tiko leli ni nga funga ku va nyika lona.+ Nkama va nga vona maganga ni minsinya hinkwayu leyi nga ni matluka ya manyingi+ va sungule ku yendla magandzelo lawa ma ni kwatisaka. Va nyikele nun’hwelo wa ku tsakisa wa magandzelo ya vona va tlhela va chulula magandzelo ya vona ya vhinyu kolanu.
29 Se ni va vutisa ni ku: ‘Mi yela yini ka ndhawu leyi ya ku tlakuka? (Ninamuntlha ya ha vitaniwa Ndhawu Ya Ku Tlakuka.)’”’+
30 “Swoswi byela Vayisrayele u ku: ‘Yehovha Hosi Leyikulu a li: “Se na n’wina mi tichakisa hi ndlela ya ku fana ni leyi vavhovho va n’wina va nga tichakisa hi yona hi ku gandzela swifaniso swa vona swa ku nyenyentsa va yendla wunghwavani* na swona?+
31 Ma ha tichakisa hi ku yendlela swikwembu swa n’wina hinkwaswu swa ku nyenyentsa magandzelo ku ta fikela namuntlha, mi hisa vana va n’wina hi ndzilu?+ Indjhe ni fanele ni mi hlamula n’wina Vayisrayele loko mi vutisa hi mina?”’+
“‘Leswi ni hanyaka,’ ku vula Yehovha Hosi Leyikulu, ‘a ni nga ta mi hlamula loko mi vutisa hi mina.+
32 Leswi mi swi pimisaka loko mi ku: “A hi faneni ni matiko ni mindjangu ya matiko lawa man’wani lawa ma gandzelaka mhandzi ni ribye,”+ a swi nga ta yendleka.’”
33 “‘Leswi ni hanyaka,’ ku vula Yehovha Hosi Leyikulu, ‘ni ta va hosi ya n’wina ni mi fuma hi voko la matimba ni hi matimba yamakulu* ni tlhela ni mi chululela ku kwata ka mina.+
34 Ni ta mi humesa hi voko la matimba ni hi matimba ya mina yamakulu* ni hi ku kwata, ni mi hlengeleta axikarhi ka vanhu mi huma ka matiko lawa mi nga hangalakela ka wona.+
35 Ni ta mi yisa amananga ya vanhu va matiko ni ya mi yavanyisa kona, na hi txuvukanile.+
36 “‘Ku fana ni leswi ni nga yavanyisa vavhovho va n’wina amananga ya tiko la Gibita, na n’wina ni ta mi yavanyisa,’ ku vula Yehovha Hosi Leyikulu.
37 ‘Ni ta mi hundzisa hi hansi ka nhonga ya mulusi,+ ni yendla ntwananu na n’wina.
38 Kambe ni ta helisa lava delelaka ni lava kalaka va nga yingisi nawu wa mina axikarhi ka n’wina.+ Ni ta va humesa ka tiko la ku kala li nga li la vona leli va tshamaka ka lona kambe a va nga ta nghena ka tiko la Israyele;+ kutani mi ta swi tiva swaku hi mina Yehovha.’
39 “N’wina Vayisrayele, Yehovha Hosi Leyikulu a li: ‘Mun’wani ni mun’wani wa n’wina a a fambi a ya tirhela swikwembu swa yena swa ku nyenyentsa.+ Kambe hi ku famba ka nkama loko mi nga ni yingisi, a mi nga ha ta swi kota ku chakisa vito la mina la ku kwetsima hi magandzelo ya n’wina ni hi swikwembu swa n’wina swa ku nyenyentsa.’+
40 “‘Hikusa ka ntshava ya mina ya ku kwetsima, ka ntshava ya ku tlakuka ya Israyele,’+ ku vula Yehovha Hosi Leyikulu, ‘hi kona ka tiko leli Vayisrayele hinkwavu va nga ta ni tirhela kona.+ Kolanu ni ta va tsakela naswona ni ta lava minyikelo ya n’wina ni swilo swa n’wina swa ku sungula swa lisima, swilo hinkwaswu swa n’wina swa ku kwetsima.+
41 Hi mhaka ya nun’hwelo wa ku tsakisa wa magandzelo ya n’wina, ni ta mi tsakela nkama ni nga ta mi humesa xikarhi ka vanhu, ni mi hlengeleta ka matiko lawa a mi hangalasiwe ka wona;+ ni ta tikwetsimisa axikarhi ka n’wina phambheni ka matiko.’+
42 “‘Mi ta swi tiva swaku hi mina Yehovha+ nkama ni nga ta mi tisa ka tiko la Israyele,+ tiko leli ni nga funga swaku ni ta li nyika vavhovho va n’wina.
43 Se na mi li kolanu mi ta khumbuka mahanyelo ni mintirho ya n’wina hinkwayu leyi mi nga tichakisa hi yona,+ mi ta tinyenya hi mhaka ya swilo hinkwaswu swa ku biha leswi mi nga swi yendla.+
44 Mi ta swi tiva swaku hi mina Yehovha nkama ni nga ta yendla xanchumu hi mhaka ya vito la mina,+ ku nga li hi ku ya hi mahanyelo ya n’wina ya ku biha kumbe mintirho ya n’wina ya chaka, n’wina Vayisrayele,’ ku vula Yehovha Hosi Leyikulu.”
45 Yehovha a tlhela a vulavula na mina a ku:
46 “N’wana wa munhu, txuvuka ka tlhelo la le sul,* u huwelela asul, u profetela khwati la le sul.
47 Byela khwati la le sul u ku: ‘Twana rito la Yehovha. Yehovha Hosi Leyikulu a li: “Ni ku hisa hi ndzilu,+ wu ta hisa minsinya hinkwayu ya vherdi* ni minsinya hinkwayu ya ku woma ka wena. Ndzilu wa kona a wu nge timiwi+ naswona tinghohe* hinkwatu ti ta hisiwa hi wona ku sukela asul ku ya anorte.*
48 Vanhu hinkwavu va ta swi tiva swaku hi mina Yehovha lweyi a nga wu tshivela leswaku wu nga timiwi.”’”+
49 Se ni ku: “Yehovha Hosi Leyikulu, va hlaya leswi hi mina: ‘Indjhe a ngo vulavula swihlayahlaya?’”*
Tinhlamunselu ta le hansi
^ Hi Xiheberu: “mbewu”.
^ Hi Xiheberu: “ni tlakuse voko la mina”.
^ Kumbe: “kambela”.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Ku nga Vayisrayele.
^ Ku nga Vayisrayele.
^ Ku nga Vayisrayele.
^ Ku nga Vayisrayele.
^ Ku nga wunghwavani leli fambisanaka ni ku gandzela.
^ Hi Xiheberu: “voko la yena leli nga tshandzavutiwa”.
^ Hi Xiheberu: “voko la yena leli nga tshandzavutiwa”.
^ Kumbe: “dzongeni”.
^ Kumbe: “lihlaza”.
^ Kumbe: “makara”.
^ Kumbe: “n’walungu.”
^ Kumbe: “switekateka.”
