Ezekiyele 21:1-32
21 Yehovha a tlhela a vulavula na mina a ku:
2 “N’wana wa munhu, txuvuka aYerusalema u vulavula hi ta tindhawu ta ku kwetsima, u profeta leswi lwisanaka ni tiko la Israyele.
3 Byela tiko la Israyele u ku: ‘Yehovha a li: “Ni lwa na wena, ni ta tlomula xipada xa mina lomu xi tshamaka kona,+ ni dlaya wa ku lulama ni lweyi a yendlaka swa ku biha xikarhi ka wena.
4 Leswi ni nga ta dlaya wa ku lulama ni lweyi a yendlaka swa ku biha xikarhi ka wena, xipada xa mina xi ta tlomuliwa lomu xi tshamaka kona xi dlaya vanhu hinkwavu ku sukela asul* ku ya norte.*
5 Vanhu hinkwavu va ta swi tiva swaku mina Yehovha, ni tlomule xipada xa mina lomu xi tshamaka kona. A xi nga ha ta tlhelisiwa lomu xi tshamaka kona.”’+
6 “Wena n’wana wa munhu, hefemuteka na u* rhurhumela, hefemuteka swinene phambheni ka vona.+
7 Loko va ku vutisa va ku: ‘Hi mhaka muni u hefemuteka?’ u ta va hlamula u ku: ‘Hi mhaka ya mahungu lawa ma taka.’ Hikusa ma ta fika naswona timbilu hinkwatu ti ta deretera hi mhaka ya ku chava ni mavoko hinkwawu ma ta lengalenga naswona vanhu hinkwavu va ta xukuvala, matsolo hinkwawu ma ta xiririka mati.*+ ‘Phela ma ta fika naswona leswo swi ta yendleka,’ ku vula Yehovha Hosi Leyikulu.”
8 Yehovha a tlhela a vulavula na mina a ku:
9 “N’wana wa munhu, profeta u ku: ‘Yehovha a li: “Hlaya u ku: ‘Xipada! Xipada+ xi lotiwile xi tlhela xi phatimisiwa.
10 Xi lotiwile leswaku xi dlaya vanhu va vanyingi; xi phatimisiwile leswaku xi phatima ku fana ni ku hatima.’”’”
“A hi fanelanga hi tsaka?”
“‘Indjhe xi ta susa nhonga ya wuhosi ya n’wana wa mina+ ku fana ni leswi xi* nga susa nsinya wun’wani ni wun’wani?
11 “‘Xi nyikiwe munhu swaku a xi phatimisa a tlhela a xi khoma hi voko. Xipada lexi xi lotiwile xi tlhela xi phatimisiwa leswaku xi khomisiwa mudlayi.+
12 “‘Wena n’wana wa munhu, huwelela u tlhela u karhateka+ hikusa xi tele ku ta lwa ni vanhu va mina; xi lwa ni varhangeli hinkwavu va Israyele.+ Va ta hlaseliwa hi xipada ni vanhu va mina. Se bani nenge* wa wena hi mhaka ya ku karhateka.
13 Hikusa ku kambisisiwile,+ se ku ta yendleka yini loko xipada xi susa nhonga ya wuhosi? A yi* nga ha ta va kona,’+ ku vula Yehovha Hosi Leyikulu.
14 “Wena n’wana wa munhu, profeta u ba mavoko u vula kanharhu u ku: ‘Xipada!’ I xipada lexi dlayaka vanhu, xipada lexi dlayetelaka vanhu va vanyingi, lexi va rhendzelaka.+
15 Timbilu ta vona ti ta deretera hi mhaka ya ku chava+ naswona ku tala ka vona va ta wa ka tinyanghwa ta doropa la vona; ni ta va dlaya hi xipada. Xa phatima ku fana ni ku hatima naswona xi phatimisiwile leswaku xi ta dlaya!
16 Wena xipada lexi nga lotiwa tsema hi ka tlhelo la xinene! U txintxa u tsema hi ka tlhelo la ximatsi! Yana kun’wani ni kun’wani lani u kongomisiwaka kona!
17 Na mina ni ta ba mavoko naswona ku kwata ka mina ku ta pumbeka.+ Mina Yehovha ni vulile.”
18 Yehovha a tlhela a vulavula na mina a ku:
19 “Se wena n’wana wa munhu, yendla tindlela timbirhi leti xipada xa hosi ya le Babilona xi nga ta ta hi tona. Hatimbirhi ti ta huma ka tiko lin’we naswona ku fanele ku vekiwa marka* lomu tindlela ti hambanaka kona loko ti ya ka madoropa hamambirhi.
20 U fanele u yendla ndlela leyi xipada xi nga ta ta hi yona swaku xi ta lwa ni doropa la Vaamoni ku nga Raba,+ ndlela leyin’wani yi va ya ku lwa ni doropa la Yerusalema+ aYuda leli nga ni mimuru ya ku tiya.
21 Hikusa hosi ya le Babilona yi nyimile yi hlahluva lani tindlela letimbirhi ti hambanaka kona. Yi tsekatsekise mimpaxwa.* Yi vutisa swikwembu* swa yona; yi kambisisa xivindzi.
22 Leswi a yi hlahluva hi swona ka voko la yona la xinene swi kombetele aYerusalema. Yi ta veka matlhari ya ku helisa doropa, yi vula rito leswaku ku dlayiwa vanhu, ku yimbeleliwa tinsimu ta nyimpi ni leswaku ku vekiwa matlharhi ya ku helisa tinyanghwa.+
23 Kambe lava nga funga ka vona* va ta pimisa swaku leswi nga hlahluviwa a hi ntiyiso.+ Kambe hosi ya Babilona yi ta xi khumbuka xidjoho xa vona naswona yi ta va khoma.+
24 “Kutani Yehovha Hosi Leyikulu a li: ‘Mi yendle leswaku xidjoho xa n’wina xi khumbukiwa hi ku kombisa swidjoho swa n’wina ni hi ku yendla leswaku swidjoho swa n’wina swi voneka ka swilo hinkwaswu leswi mi swi yendlaka. Leswi mi nga khumbukiwa, mi ta tekiwa hi nkanu.’*
25 “Kambe siku la wena li fikile wena murhangeli wa ku biha wa Israyele, wena u nga vavisiwa ngopfu,+ wu fikile nkama wa leswaku u khatisiwa ka wugamu.
26 Yehovha Hosi Leyikulu a li: ‘Susa xifunengeto xa nhloko,* u susa harhi.*+ Swilo swi ta txintxa.+ Tlakusa munhu wa xiyimu xa le hansi+ u xixa munhu wa xiyimu xa le henhla.+
27 Ni ta yi wonhetela, ni yi wonhetela, ni yi wonhetela. A ni nga ta yi nyika munhu anze ku fika lweyi a nga ni mfanelo swaku yi va ya yena+ se ni ta mu nyika yona.’+
28 “Wena n’wana wa munhu, profeta u ku: ‘Yehovha Hosi Leyikulu a vulavulile hi ta Vaamoni ni xirhuku xa vona.’ Vula u ku: ‘Xipada! Xipada xi tlomuliwile leswaku xi dlaya; xi loteliwe ku dlaya naswona xa phatima ku fana ni ku hatima.
29 Hambileswi va nga vona swilo swa mavunhwa ni leswi va nga hlahluva swilo swa mavunhwa hi wena, u ta tlhatekiwa henhla ka vanhu lava nga dlayiwa,* vanhu lava yendlaka swa ku biha lava siku la vona li nga fika, ku nga nkama wa ku khatisiwa ka vona ka wugamu.
30 Tlhelisela xipada ka ndhawu ya xona. Ni ta ku yavanyisa ka ndhawu leyi u nga tumbuluxiwa ka yona, ka tiko leli u taka hi ka lona.
31 Ni ta ku khatisa hi mhaka ya leswi ni nga kwata. Ku kwata ka mina ku ta ku hisa ku fana ni ndzilu naswona ni ta ku nyikela ka mavoko ya vanhu lava nga ni mona, lava swi kotaka ku dlaya vanhu.+
32 U ta va tihunyi ta ndzilu;+ ngati ya wena yi ta halatiwa atikweni, a wu nga ha ta khumbukiwa hikusa mina Yehovha ni vulile.’”
Tinhlamunselu ta le hansi
^ Kumbe: “n’walungu.”
^ Kumbe: “adzongeni”.
^ Hi Xiheberu: “masenge ya wena ma”.
^ Leswi vulaka ku tixixitela hi mhaka ya ku chava.
^ Leswi vulaka xipada xa Yehovha.
^ Kumbe: “thanga”.
^ Kumbe: “Nhonga ya wuhosi a yi”.
^ Hi Xiheberu: “voko”.
^ Kumbe: “maflexa.”
^ Hi Xiheberu: “terafimi”.
^ Ku nga lava tshamaka Yerusalema.
^ Hi Xiheberu: “hi voko.”
^ Kumbe: “korowa.”
^ Vona Ntlhamuselo.
^ Hi Xiheberu: “tinhamu ta lava nga dlayiwa”.
