Ezekiyele 22:1-31
22 Yehovha a tlhela a vulavula na mina a ku:
2 “Se wena n’wana wa munhu, indjhe u swi lunghekelile ku vula marito ya ku yavanyisa* doropa leli nga ni nandzu wa ngati+ ni ku li tivisa swilo swa lona hinkwaswu swa ku nyenyentsa?+
3 Hlaya u ku: ‘Yehovha Hosi Leyikulu a li: “Wena doropa leli nga ni nandzu wa ngati,+ leli nkama wa lona wu nga le ku teni,+ leli tiyendlelaka swikwembu swa ku nyenyentsa* leswaku li tichakisa,+
4 u ni nandzu hi mhaka ya ngati leyi u nga yi halata+ naswona swikwembu wa wena swa ku nyenyentsa swi ku chakisile.+ U hantlisise magamu ya masiku ya wena naswona magamu ya malembe ya wena ma fikile. Hi mhaka leyo ni ta yendla swaku u va xirhuku ka vanhu va matiko ni xipoyilo ka matiko hinkwawu.+
5 Matiko lawa ma nga kusuhi ni lawa ma nga kule na wena ma ta ku poyila,+ wena lweyi vito la wena li nga chaka naswona u nga ni hasahasa.
6 Phela murhangeli mun’wani ni mun’wani wa Israyele xikarhi ka wena a tirhisa matimba ya yena swaku a halata ngati.+
7 Vanhu a va va hloniphanga vapsali va vona.+ Va kanganyise vanhu va matiko man’wani naswona va hluphe n’wana lweyi a kalaka a nga na papayi* ni wansati lweyi a nga feliwa hi nuna.”’”+
8 “‘U ti tekele hansi tindhawu ta mina ta ku kwetsima naswona a wu ti hloniphanga tisavata ta mina.+
9 Xikarhi ka wena ku ni valumbeti lava nga tinyimisela ku halata ngati.+ Va dla magandzelo ka tintshava ta wena naswona va tama va yendla swilo swa tingana.+
10 Xikarhi ka wena vanhu va yetlela ni nsati wa papayi wa vona+ naswona va pfinya wansati lweyi a nga ka masiku ya yena.+
11 Xikarhi ka wena, wanuna a yetlela ni nsati wa wanuna mun’wani,+ mun’wani a yendla swa tingana hi ku yetlela ni nsati wa n’wana wa yena+ naswona mun’wani a pfinya makwavu wa yena wa xisati, ku nga n’wana wa ntombhi wa papayi wa yena.+
12 Xikarhi ka wena vanhu va pfumela ku xaviwa leswaku va halata ngati.+ U lombisa hi ku lava ku kuma majuru*+ naswona u tekela van’wani male hi nkanu.+ U ni khohlwile swa wugamu,’ ku vula Yehovha Hosi Leyikulu.
13 “‘Phela ni ba mavoko na ni nyenyentsekile hi mhaka ya leswi u kumaka minchumu hi ndlela ya ku kanganyisa ni hi mhaka ya ngati leyi nga halatiwa xikarhi ka wena.
14 Indjhe mbilu ya wena yi ta tiyisela ni mavoko ya wena ma ta va ni matimba ka masiku lawa ni nga ta yendla xanchumu swaku ni lwa na wena?+ Mina Yehovha ni vulile naswona ni ta yendla xanchumu.
15 Ni ta ku hangalasa xikarhi ka matiko ni ku yisa ka matiko man’wani+ naswona ni ta helisa swilo swa chaka leswi u nga swi yendla.+
16 A wu nga ha ta hloniphiwa xikarhi ka matiko, kutani u ta swi tiva swaku hi mina Yehovha.’”+
17 Yehovha a tlhela a vulavula na mina a ku:
18 “N’wana wa munhu, Vayisrayele va fana ni chaka ka mina. Hinkwavu i kobre, xitanyu, nsimbi ni muthofu, leswi nga hoxiwa axitikweni. Va fana ni chaka leli salaka loko ku dereterisiwa prata.+
19 “Se Yehovha Hosi Leyikulu a li: ‘Leswi hinkwenu mi fanaka ni chaka,+ na mi hlengeleta aYerusalema.
20 Ku fana ni leswi prata, kobre, nsimbi, muthofu ni xitanyu swi hlengeletisiwaka swona axitikweni leswaku swi hisiwa swi gama swi deretera, na mina ni ta mi hlengeleta na ni kwatile ni mi pfurhetela ni mi dereterisa.+
21 Ni ta mi hlengeleta ka ndhawu yin’we ni mi pfurhetela hi ndzilu wa ku kwata ka mina,+ kutani mi ta dereterisiwa ka doropa la n’wina.+
22 Ku fana ni leswi prata li dereterisiwaka axitikweni, na n’wina mi ta dereterisiwa ka doropa la n’wina; mi ta swi tiva swaku mina Yehovha ni chulule ku kwata ka mina ka n’wina.’”
23 Yehovha a tlhela a vulavula na mina a ku:
24 “N’wana wa munhu byela doropa la Yerusalema u ku: ‘U tiko leli nga ta kala li nga basisiwi kumbe ku neliwa hi mpfula hi siku la ku kwata ka mina.
25 Vaprofeta va wena va hambe maplanu* ya ku yendla swa ku biha+ ku fana ni nghonyama leyi bongaka yi hahlulela xiharhi.+ Va dlayetela vanhu. Va teka xuma ni swilo swa lisima. Va yendle swaku ku va ni vavasati va vanyingi lava nga feliwa hi vanuna va vona.
26 Vaprista va yena a va wu yingisanga nawu wa mina,+ va tama va chakisa tindhawu ta mina ta ku kwetsima.+ A va swi hambanisi swilo swa ku kwetsima ni leswi nga toloveleka,+ va tsandzeka ku byela vanhu swilo leswi nga basa ni leswi kalaka swi nga basanga+ naswona va yala ku hlayisa tisavata ta mina, naswona va ni chakisa.
27 Varhangeli lava nga xikarhi ka yena va fana ni mahlolwa* lawa ma hahlulelaka xiharhi; va halata ngati ni ku dlaya vanhu swaku va kuma minchumu hi ndlela ya ku kanganyisa.+
28 Vaprofeta va yena va fihle mintirho ya vona ya ku biha ku fana ni khumbi leli nga pendiwa hi pendi la ku basa. Va vona swilo* swa mavunhwa ni ku hlahluva mavunhwa,+ se va ku: “Yehovha Hosi Leyikulu a li,” kuve Yehovha a nga vulanga nchumu.
29 Vanhu va tiko va yendle wukanganyisi va tlhela va tekela vanhu swilo swa vona,+ va xanise xisiwana ni lweyi a pfumalaka, va kanganyise munhu wa tiko lin’wani naswona a va nga mu khomi kahle.’
30 “‘A ni lava munhu xikarhi ka vona lweyi a nga ta lunghisa muru lowu nga yendliwa hi maribye kumbe a nyima phambheni ka mina, hi lani muru wu nga pandzeka hi kona leswaku tiko li nga helisiwi+ kambe a ni kumanga munhu.
31 Kutani ni ta va chululela ku kwata ka mina, ni va helisa hi ndzilu wa ku kwata ka mina. Ni ta va khoma hi ku ya hi leswi va nga swi yendla,’ ku vula Yehovha Hosi Leyikulu.”
Tinhlamunselu ta le hansi
^ Hi Xiheberu: “indjhe u ta yavanyisa, indjhe u ta yavanyisa?”
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Kumbe: “vapsali”.
^ Kumbe: “mpsalu”.
^ Kumbe: “makungu”.
^ Ku nga muxaka wa timbyana ta nhova.
^ Hi Xiheberu: “xivono”.
