Ezekiyele 23:1-49
23 Yehovha a tlhela a vulavula na mina a ku:
2 “N’wana wa munhu, a ku ni vavasati vambirhi lava a va li vana va wansati mun’we.+
3 Va tiyendle tinghwavani aGibita;+ va ve tinghwavani ku sukela loko va ha li majovhem. Mavele ya vona ma khomakhomiwile kolanu naswona va lahlekeliwe hi wuntombhi la vona.
4 Vito la lweyi wamukulu a ku li Ohola* kasi vito la lweyi wamutsongo a ku li Oholiyabu.* Kutani ni va teka va va vasati va mina se va psala vana va madjaha ni va tintombhi. Ohola i Samariya+ kasi Oholiyabu i Yerusalema.
5 “Ohola a sungule ku tiyendla nghwavani+ na wa ha na mina. A navele lava a a rhandzana na vona,+ ku nga Vaasiriya lava a va li kusuhi na yena.+
6 A va li vagovhernadori lava nga yambala mpahla ya azuli ni varhangeli, madjaha hinkwawu ya ku saseka lawa ma fambaka hi makavhalu ya wona.
7 A tame a yendla wunghwavani ni hinkwavu lava a nga va langa, ku nga Vaasiriya naswona a tichakise+ hi swifaniso swa ku nyenyentsa* swa lava a a navela ku famba masangu na vona.
8 A nga li tshikanga wunghwavani leli a nga li yendla Gibita, hikusa va yetlele na yena na wa ha li jovhem, va wonhe wuntombhi la yena hi ku famba masangu na yena.+
9 Se ni mu nyikele ka lava a a rhandzana na vona, ku nga Vaasiriya,+ lava a a navela ku famba masangu na vona.
10 Va mu siye na a nga yambalanga nchumu+ va teka vana va yena va madjaha ni va tintombhi,+ va gama va mu dlaya hi xipada. A dume hi swilo swa ku biha xikarhi ka vavasati naswona va mu yavanyisile.
11 “Nkama makwavu wa yena Oholiyabu a nga swi vona, ndlela leyi a a swi navela hi yona ku famba masangu yi kulile yi tlhela yi biha ngopfu naswona wunghwavani la yena li ve likulu ku tlula la makwavu.+
12 A navele ku famba masangu ni Vaasiriya,+ lava nga vavhizinyu va yena, vagovhernadori ni varhangeli lava nga yambala mpahla ya ku saseka hintamu lava fambaka hi makavhalu, ku nga madjaha hinkwawu ya ku saseka.
13 Nkama na a tichakisa, ni tsumbule swaku hiwumbirhi ka vona a va ni mahanyelo ya ku fana.+
14 Kambe a tame a yendla wunghwavani. A vonetele ni vavanuna lava nga tsaliwa ka khumbi, ku nga swifaniso swa Vakalidiya leswi nga tsaliwa swi tlhela swi pendiwa hi pendi la ku pshuka,
15 na va bohe mabandhi ka masenge, va veke swifunengeto* ka tinhloko ta vona, va tikomba na va fana ni masonchwa, hinkwavu ka vona va nyimela vanhu va le Babilona, lava nga psaliwa ka tiko la Vakalidiya.
16 Nkama a nga va vona a sungule ku navela ku famba masangu na vona, kutani a rhumela vanhu ka vona aKalidiya.+
17 Vababilona a va tshamela ku ta ka yena, va famba masangu na yena va mu chakisa. Loko se va mu chakisile a va tshikile na a nyenyentsekile.
18 “Loko a tama a yendla wunghwavani la yena na a nga chavi nchumu ni ku sala na a nga yambalanga nchumu,+ ni mu tshikile hi mhaka ya ku nyenyentseka ku fana ni leswi ni nga mu tshikisa xiswona makwavu wa yena na ni nyenyentsekile.+
19 A tame a yendla wunghwavani,+ a khumbuka masiku ya wujovhem la yena na a yendla wunghwavani ka tiko la Gibita.+
20 A navele ku famba masangu ni lava a a rhandzana na vona ku fana ni vavasati vavatsongo* lava vanuna va vona va nga ni swirho swa xinuna swa ku fana ni swa mbongolo ni lava swirho swa vona swa xinuna swi fanaka ni swa makavhalu.
21 U swi navele hintamu ku yendla swa tingana na wa ha li jovhem aGibita+ loko va ku khomakhoma mavele, mavele ya wujovhem la wena.+
22 “Se wena Oholiyabu, Yehovha Hosi Leyikulu a li: ‘Ni yendla swaku lava u nga rhandzana na vona+ lava u nga va tshika hi mhaka ya ku nyenyentseka, va lwa na wena ku sukela ka matlhelo hinkwawu,+
23 Vababilona+ ni Vakalidiya hinkwavu,+ vavanuna va le Pekodi,+ Xowa, Kowa ku patsa ni Vaasiriya hinkwavu. Hinkwavu i madjaha ya ku saseka, vagovhernadori ni varhangeli, tinhenha ni vavanuna lava nga langiwa, hinkwavu na va li ka makavhalu.
24 Va ta ku hlasela hi tinyolo* ta tinyingi ta nyimpi ni masonchwa ya manyingi lama nga khoma swivhikelo swaswikulu ni swaswitsongo na ma yambale ni makapaseti ya nyimpi. Ma ta ku rhendzela naswona ni ta ma pfumelela swaku ma ku yavanyisa, ma ta ku yavanyisa ku rhandza.+
25 Ni ta ku komba leswi ni nga kwatisa xiswona naswona ma ta lwa na wena hi ndlela ya mona. Ma ta ku tsema nhompfu ni tindleve naswona lava nga ta pona va ta dlayiwa hi xipada. Ma ta teka vana va wena va madjaha ni va tintombhi naswona lava nga ta pona va ta hisiwa hi ndzilu.+
26 Ma ta ku hlivila mpahla+ ma tlhela ma ku tekela ni swilo leswi u tisasekisaka hi swona.+
27 Ni ta yendla swaku u tshika ku yendla swilo swa tingana ni wunghwavani+ leli u nga li sungula ka tiko la Gibita.+ U ta tshika ku va txuvuka naswona a wu nge he li khumbuki tiko la Gibita.’
28 “Yehovha Hosi Leyikulu a li: ‘Ni kusuhi ni ku ku nyikela ka lava u va nyenyaka, lava u nga va tshika hi mhaka ku nyenyentseka.+
29 Va ta lwa na wena hi ndlela ya mona, va ku tekela swilo leswi u nga swi tirhela hi matimba,+ va ku siya na u nga yambalanga nchumu. Mahanyelo ya wena ya ku biha lama danisaka ni ya tingana ni wunghwavani la wena swi ta tiviwa hi vanhu hinkwavu.+
30 U ta humeleliwa hi swilo leswi hinkwaswu hi mhaka ya leswi u landzelelaka matiko ku fana ni nghwavani+ hikusa u tichakise hi swifaniso swa vona swa ku nyenyentsa.+
31 Leswi u nga tikhoma ku fana ni makwenu wa wena,+ ni ta ku yavanyisa ku fana na yena ku fana ni kopo ya vhinyu leyi ni nga mu nyika yona.’+
32 “Yehovha Hosi Leyikulu a li:
‘U ta phuza kopo ya makwenu wa wena leyi nga yenta yi tlhela yi yanama,+U ta hlekiwa hikusa leswi nga ndzeni ka kopo i swinyingi.+
33 U ta dakwa u tlhela u xukuvala,Kopo ya ku chavisa ya mahlomulu,Kopo ya makwenu wa wena Samariya.
34 U ta phuza, yi sala yi nga ha na nchumu,+ u phorhela ni swikhemu swa yona swa vumba,U gama u tsema mavele ya wena.
“Hikusa ni vulavulile,” ku vula Yehovha Hosi Leyikulu.’
35 “Kutani Yehovha Hosi Leyikulu a li: ‘Leswi u nga ni khohlwa u tlhela u ni tshika,+ u ta tihlamulela hi mhaka ya mahanyelo ya wena ya tingana ni hi mhaka ya wunghwavani la wena.’”
36 Yehovha a ni byela a ku: “N’wana wa munhu, famba u ya yavanyisa Ohola na Oholiyabu+ u va byela swilo swa ku nyenyentsa leswi va swi yendlaka.
37 Va mbuyete+ ni swikwembu swa vona swa ku nyenyentsa naswona mavoko ya vona ma tale ngati. A va yo mbuyeta ntsena kambe va tlhele va hisa ni vana va vona hi ndzilu lava va nga ni psalela vona, va va yendla swakudla swa swikwembu swa vona.+
38 Naswona va tlhele va ni yendla leswi: Va chakise ndhawu ya mina leyi kwetsimaka naswona a va ti hloniphanga tisavata ta mina.
39 Hi siku lolelo nkama va nga heta ku dlaya vana va vona va yendlela swikwembu swa vona swa ku nyenyentsa magandzelo hi vona,+ va game va ta ka ndhawu ya mina leyi kwetsimaka va fika va yi chakisa.+ Va yendle leswo phakati ka yindlo ya mina.
40 Va tlhela va rhuma vanhu swaku va ya vitana vanhu va le kule.+ Nkama na va li ku teni, wena Oholiyabu u hlambile u tipenda matihlo u tlhela u tisasekisa.+
41 U gama u tshama ka xitulu xa ku saseka+ lexi phambheni ka xona a ku ni meza+ lowu u nga veka swinun’hwelisu* swa mina+ ni mafurha ya mina ka wona.+
42 A ku twakala marito ya vanhu lava nga tsaka, xikarhi ka vona a ku ni swidakwa leswi a swi ta hi mananga. Va vekele mapulsera ka mavoko ya vavasati ni tiharhi* ta ku saseka ka tinhloko ta vona.
43 “Se ni vulavule hi ta lweyi a a hlakatiwe hi ku mbuyeta ni ku: ‘A ta tama a yendla wunghwavani la yena.’
44 Va tame va mu yela, ku fana ni munhu lweyi a yaka ka nghwavani. Va mu yelise swoleswo Ohola na Oholiyabu, vavasati lava nga ni mahanyelo ya tingana.
45 Kambe vavanuna va ku lulama va ta mu yavanyisa hi ku ya hi mintirho ya yena, ku nga ku mbuyeta+ ni ku halata ngati;+ hikusa i tinghwavani naswona mavoko ya vona ma tale hi ngati.+
46 “Yehovha Hosi Leyikulu a li: ‘Ku ta tisiwa masonchwa lama nga ta lwa na vona, minchumu ya vona yi ta tekiwa naswona vanhu va ta sala na va tsemeke nhlana.+
47 Masonchwa ma ta va ba hi maribye+ ma tlhela ma va tsemelela hi swipada. Ma ta dlaya vana va vona+ ma tlhela ma hisa tiyindlo ta vona hi ndzilu.+
48 Ni ta helisa mahanyelo ya wena ya tingana atikweni naswona leswo swi ta djondzisa vavasati hinkwavu, a va nge ma tekeleli mahanyelo ya wena ya tingana.+
49 Va ta ku khoma hi ku ya hi mahanyelo ya wena ya tingana ni swidjoho leswi u nga swi yendla ni swikwembu swa wena swa ku nyenyentsa; u ta swi tiva swaku hi mina Yehovha Hosi Leyikulu.’”+
Tinhlamunselu ta le hansi
^ Leswi vulaka: “Tende La Mina Li Le Ka Yena.”
^ Leswi vulaka: “Tende La Yena”.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Vona Ntlhamuselo.
^ Vona Ntlhamuselo.
^ Kumbe: “tin’qolo; makalichi”.
^ Vona Ntlhamuselo.
^ Kumbe: “makorowa”.
