Ezekiyele 24:1-27
24 Yehovha a tlhela a vulavula na mina hi siku la wu 10, ka wheti ya wu 10, hi lembe la wu 9 a ku:
2 “N’wana wa munhu, li tsale hansi siku* leli. Hi siku leli, hosi ya Babilona yi sungule ku hlasela doropa la Yerusalema.+
3 Li byeli xifananiso* tiko leli li nga ni terekela, u vula leswi hi lona:
“‘Yehovha Hosi Leyikulu a li:
“Tseleka panela; li tseleke ka ndzilu u li chela mati.+
4 Chela nyama leyi nga tsemeleliwa ka panela,+ nyama hinkwayu yayinene,Peta nyama ya nenge* ni ya katla; li tate hi marhambu yamanene hintamu.
5 Teka nyempfu yayinene ngopfu,+ u tshivela tihunyi matlhelweni ka panela.
U gama u sweka nyama ni marhambu ya yona.”’
6 “Kutani Yehovha Hosi Leyikulu a li:
‘Khombo ka doropa leli halataka ngati,+ panela leli nga kurha,* leli ku kurha ka lona ku kalaka ku nga susiwanga!
Humesa nyama hinkwayu ka lona;+ naswona u nga hoxi swiribyani* leswaku u langa leyi u nga ta yi humesa.
7 Hikusa ngati ya yona yi le ndzeni ka yona;+ doropa li yi chulule henhla ka ribye.
A li yi chululanga misaveni leswaku yi seleteliwa hi misava.+
8 Leswaku ni hakelisa na ni kwatile,Ngati ya lava nga dlayiwa ka doropa ni yi veke ka ribye leli phatimakaLeswaku yi nga seleteliwi.’+
9 “Se Yehovha Hosi Leyikulu a li:
‘Khombo ka doropa leli halataka ngati!+
Ni ta hlengeleta nyandza yayikulu ya tihunyi.
10 Hlengeleta tihunyi u tshivela ndzilu,Sweka nyama yi wupfa kahle, u chulula murhu wa yona, u tshika marhambu ma psha.
11 Tlhateka panela ka makhala leswaku li hisaLeswaku kobre la lona li ta hisa hintamu.
Ku chaka ka lona ku ta dereterela ndzeni ka lona+ ni ku kurha ka lona ku ta hela.
12 Phela li hetana ntamu naswona la karhalisana,Hikusa ku kurha ka lona a ku nga ta suka.+
Li hoxe ka ndzilu ni ku kurha ka lona!’
13 “‘U chakisiwe hi mahanyelo ya ku nyenyentsa.+ Ni zame ku ku basisa kambe a wu basi. A wu nga ta basa anze ku kwata ka mina ku pumbeka.+
14 Mina Yehovha ni swi vulile. Swilo leswi swi ta yendleka. Ni ta yendla xanchumu na ni nga kanakani naswona a ni nga ta va ni ntwelawusiwana kumbe ku tisola.+ Va ta ku yavanyisa hi ku ya hi mintirho ya wena,’ ku vula Yehovha Hosi Leyikulu.”
15 Yehovha a tlhela a vulavula na mina a ku:
16 “N’wana wa munhu, lweyi u mu rhandzaka ni ta mu dlaya hi ku tsopeta ka tihlo.+ A wu fanelanga u xukuvala kumbe u rila.
17 Konya na u miyelile naswona u nga yendli leswi yendliwaka loko ku riliwa munhu lweyi a nga fa.+ Yambala xifunengeto xa nhloko*+ ni masandaliya ya wena.+ A wu fanelanga u timbhonya malepfu ya le henhla ka nomo+ naswona u nga dli pawu leli u nga tiseliwa lona hi vanhu van’wani.”*+
18 Ni vulavule ni vanhu nimixo se nsati wa mina a fa nimadlambu. Kutani hi mundzuku ka kona nimixo ni yendla leswi ni nga rhumiwa ku swi yendla.
19 Se vanhu va ni byela va ku: “Hi byeli swaku hina hi nghena kwini ka leswi u swi yendlaka.”
20 Ni va hlamule ni ku: “Yehovha a vulavule na mina a ku:
21 ‘Byela Vayisrayele u ku: “Yehovha Hosi Leyikulu a li: ‘Ni ta chakisa ndhawu ya mina leyi kwetsimaka ku nga li khale,+ ku nga ndhawu leyi mi tibumaka swinene hi yona, ndhawu leyi nga ya lisima ka n’wina ni leyi mi yi rhandzaka hi mbilu hinkwayu. Vana va n’wina lava mi nga va siya va ta dlayiwa hi xipada.+
22 Kutani mi ta boheka ku yendla swa ku fana ni leswi ni nga swi yendla. A mi nga ta ma mbhonya malepfu ya le henhla ka nomo naswona a mi nga ta li dla pawu leli mi nga tiseliwa lona hi vanhu van’wani.+
23 Mi ta yambala xifunengeto xa nhloko naswona mi ta yambala masandaliya. A mi nga ta xukuvala kumbe mi rila. Mi ta wonha wutomi la n’wina mi karhalisiwa hi swihoxo swa n’wina+ naswona mi ta konya na mi txuvukana.
24 Ezekiyele a ve xikombiso ka n’wina.+ Mi ta yendla swa ku fana ni leswi a nga swi yendla. Loko swi yendleka, mi ta swi tiva swaku hi mina Yehovha Hosi Leyikulu.’”’”
25 “Se wena n’wana wa munhu, siku leli ni nga ta va tekela lexi va tivhikelaka hi xona, ku nga ndhawu ya ku saseka leyi va tsakisaka, ndhawu leyi nga ya lisima ka vona leyi va yi rhandzaka hi mbilu ya vona hinkwayu ku patsa ni vana va vona,+
26 ku ta ta munhu lweyi a nga pona a ta ku byela.+
27 Hi siku lolelo u ta pfula nomo wa wena u vulavula ni munhu lweyi a nga pona, a wu nga ha ta tsandzeka ku vulavula.+ U ta va xikombiso ka vona, se va ta swi tiva swaku hi mina Yehovha.”
Tinhlamunselu ta le hansi
^ Hi Xiheberu: “vito la siku”.
^ Kumbe: “xihlayahlaya”.
^ Kumbe: “thanga”.
^ Kumbe: “furujara”.
^ Vona Ntlhamuselo.
^ Hi Xiheberu: “pawu la vanhu.”
^ Vona Ntlhamuselo.
