Ezekiyele 26:1-21
26 Hi lembe la wu 11, hi siku la ku sungula la wheti, Yehovha a vulavule na mina a ku:
2 “N’wana wa munhu, leswi Tiru a nga vulavula hi Yerusalema+ a ku: ‘Ahaa! Nyanghwa wa vanhu wu tshoviwile!+ Hinkwaswu swi ta kumiwa hi mina naswona leswi a nga helisiwa swoswi ni ta ganya;’
3 Yehovha Hosi Leyikulu a li: ‘Ni lwa na wena Tiru naswona ni ta tisa matiko ya manyingi swaku ma ta lwa na wena, ku fana ni leswi lwandle li swi yendlaka loko li humesa magandlati ya lona.
4 Ma ta dilizela mimuru ya Tiru, ma wisa maprediyu* ya yena;+ ni ta susa misava ka yena ni mu yendla ribye la ku phatima leli kalaka li nga na nchumu.
5 A ta va ndhawu ya ku womisa maredi axikarhi ka lwandle.’+
“‘Hikusa mina Yehovha ni swi vulile, a ta va nchumu lowu xololiwaka hi matiko, a ta va nchumu lowu tekiwaka hi matiko.
6 Swidoropani* leswi nga kusuhi na yena swi ta dlayiwa hi xipada, se vanhu va ta swi tiva swaku hi mina Yehovha.’
7 “Hikusa Yehovha Hosi Leyikulu a li: ‘Ni ta tisa Nebukadinazara* hosi ya le Babilona lweyi a taka hi norte*+ swaku a ta lwa ni doropa la Tiru; i hosi ya tihosi+ leyi nga ni makavhalu,+ tinyolo* ta nyimpi,+ vafambisi va makavhalu ni masonchwa ya manyingi.
8 A ta helisa swidoropani leswi nga kusuhi na wena hi xipada, a ta yaka muru wu ku rhendzela a tlhela a yaka ni prediyu lomu masonchwa ma nga ta hlasela na ma li kona a tlhela a yendla ni xivhikelo xaxikulu swaku a ku hlasela.
9 A ta diliza mimuru ya wena hi matlharhi lama kotaka ku diliza khumbi naswona a ta wisa maprediyu ya wena hi mabewula* ya yena.
10 Makavhalu ya yena ma ta va manyingi swinene lakakuva u ta mbhonyiwa hi wuthulu la wona naswona guwa la vafambisi va makavhalu, guwa la maroda ni la makalichi li ta tsekatsekisa mimuru ya wena loko a nghena ka tinyanghwa ta wena, ku fana ni vavanuna lava hlaselaka doropa leli nga ni mimuru leyi nga wa.
11 Minenge ya makavhalu ya yena yi ta kandzihetela switaratu swa wena hinkwaswu;+ a ta dlaya vanhu va wena hi xipada naswona mapilari ya wena ya ku tiya ma ta wetetela hansi.
12 Va ta teka tshomba la wena, va teka nhundzu ya wena,+ va dilizela mimuru ya wena, va wisa ni tiyindlo ta wena ta ku saseka; se maribye ya wena ni swilo swa wena leswi nga yendliwa hi timhandzi ni misava ya wena va ta swi txukumeta ka mati.’
13 “‘Ni ta helisa guwa la tinsimu ta wena, naswona guwa la tiharipa ta wena a li nga ha ta twiwa.+
14 Ni ta ku yendla ribye leli phatimaka leli kalaka li nga na nchumu naswona u ta va ndhawu ya ku womisa maredi.+ A wu nge he tlheli u yakiwa, hikusa mina Yehovha ni swi vulile,’ ku vula Yehovha Hosi Leyikulu.
15 “Yehovha Hosi Leyikulu a byela Tiru a ku: ‘Indjhe swihlala* a swi nga ta tsekatseka nkama swi nga ta twa guwa la ku wa ka wena, nkama lava fetetelaka* va nga ta konya ni nkama vanhu va dlayeteliwaka xikarhi ka wena?+
16 Varhangeli hinkwavu va le lwandle va ta xika ka switshamu swa vona swa wuhosi, va hlivila mpahla ya vona ya ku leha ni mpahla ya vona leyi nga sasekiseliwa va gama va rhurhumela. Va ta tshama hansi va rhurhumela nkama hinkwawu, va ku txuvuka hi ku hlamala.+
17 Va ta ku yimbelelela lisimu la xirilo+ va ku:
“Vona ndlela leyi u nga helisiwa hi yona+ wena lweyi a wu ni vanhu lava tshamaka alwandle, doropa leli dzunisiwaka;Wena ni vanhu va wena a mi ni matimba alwandle,+A mi chavisa hinkwavu lava tshamaka amisaveni!
18 Swihlala swi ta tsekatseka hi siku la ku wa ka wena,Swihlala swa le lwandle swi ta karhateka loko u nga ha li kona.”’+
19 “Hikusa Yehovha Hosi Leyikulu a li: ‘Loko ni ku helisa ku fana ni madoropa lama nga hohlokela,* loko ni ku mbhonya hi mati ya manyingi lama nga ni matimba,+
20 ni ta ku yehlisa sirheni ku fana ni leswi ni nga swi yendla ka vanhu lavan’wani hinkwavu lomu vanhu lava nga fa khale va nga kona; ni ta yendla swaku u tshama ka ndhawu ya le hansi swinene, ku fana ni tindhawu tin’wani leti nga helisiwa khale, xikan’we ni lava yaka sirheni,+ leswaku ku nga ha tshami munhu ka wena. Kutani ni ta sasekisa tiko la lava hanyaka.
21 “‘Hi ku tsopeta ka tihlo ni ta yendla swaku u chava swinene, a wu nga ha ta va kona.+ Va ta ku lava kambe a wu nga ha ta kumeka,’ ku vula Yehovha Hosi Leyikulu.”
Tinhlamunselu ta le hansi
^ Kumbe: “swihondzo; switezi”.
^ Hi Xiheberu: “Vana va tintombhi”.
^ Hi Xiheberu: “Nebukadretsara”. Ku nga matsalelo ya ku hambana.
^ Kumbe: “n’walungu”.
^ Kumbe: “tin’qolo; makalichi”.
^ Kumbe: “matlharhi”.
^ Ku nga ma ilhas.
^ Hi Xiheberu: “lava dlayiwaka”.
^ Kumbe: “marhumbi”.
