Ezekiyele 29:1-21
29 Hi siku la wu 12, ka wheti ya wu 10, hi lembe la wu 10, Yehovha a vulavule na mina a ku:
2 “N’wana wa munhu, txuvuka ka Faru hosi ya Gibita, u profeta leswi lwisanaka na yena ni tiko hinkwalu la Gibita.+
3 Hlaya u ku: ‘Yehovha Hosi Leyikulu a li:
“Ni lwa na wena Faru, hosi ya Gibita,+Xiharhi xaxikulu xa le lwandle lexi nga humula xikarhi ka misele ya le Nilu,*+Lweyi a nge te: ‘Nambu wa Nilu i wa mina.
Ni tiyendlele wona.’+
4 Kambe ni ta tlhoma tindzovo* ka tinhlaya* ta wena, ni yendla swaku tihlampfi ta Nilu ti namarhela ka makwakwarimba* ya wena.
Ni ta ku humesa aNilu ni tihlampfi hinkwatu ta Nilu leti nga namarhela ka makwakwarimba ya wena.
5 Ni ta ku tshika amananga, wena ni tihlampfi hinkwatu ta Nilu.
U ta wela akhwatini naswona a ku na munhu lweyi a nga ta ku rhwala a ya ku lahla.+
Ni ta yendla swaku u dliwa hi swiharhi ni swinyanyani.+
6 Kutani hinkwavu lava tshamaka aGibita va ta swi tiva swaku hi mina Yehovha,Hikusa a va nga ha va seketeli vanhu va Israyele ku fana ni lihlanga.+
7 Nkama va nga ku khoma hi voko, u pfotlosekile,U yendle swaku va tshoveka katla.
Nkama va nga khigetela hi wena, u tshovekile,U rhurhumelise minenge* ya vona.”+
8 “‘Kutani Yehovha Hosi Leyikulu a li: “Ni ta tisa xipada henhla ka wena+ naswona ni ta dlaya vanhu ni swiharhi swa wena.
9 Tiko la Gibita li ta hohlokela* li tlhela li wonhekela;+ va ta swi tiva swaku hi mina Yehovha, hikusa u te: ‘Nambu wa Nilu i wa mina; wu yendliwe hi mina.’+
10 Kutani ni lwa na wena na Nilu, ni ta yendla swaku tiko la Gibita li va ndhawu ya ku wonhekela ni leyi nga woma yi tlhela yi hohlokela,+ ku sukela aMigidoli+ anze Siyeni+ ni ku ya fika lomu tiko la Etiyopiya li tsemaka hi kona.
11 A ku nge tsemakanyi munhu kumbe xifuyu ka lona+ naswona a ku nga ta tshama munhu ka lona anze ku hela 40 wa malembe.
12 Ni ta yendla swaku tiko la Gibita li hohlokela ku tlula matiko hinkwawu, madoropa ya lona ma ta hohlokela ku tlula madoropa hinkwawu anze ku hela 40 wa malembe;+ ni ta hangalasa Vagibita axikarhi ka matiko, ni va hangalasa ka tindhawu ta ku hambanahambana.”+
13 “‘Hikusa Yehovha Hosi Leyikulu a li: “Loko se ku hundzile 40 wa malembe ni ta hlengeleta Vagibita xikarhi ka vanhu lava nga ta va va hangalaseliwe ka vona;+
14 ni ta tlhelisa swikarawa swa Vagibita ka tiko la Patiru,+ ka tiko leli va nga psaliwa ka lona, va ta ya va mfumu wa ku kala wu nga koti ndhawu koseniyani.
15 Gibita a ta va wa xiyimu xa le hansi ku tlula mimfumu leyin’wani naswona a nge he fumi matiko man’wani,+ ni ta va yendla va va vatsongo va za va nga ha swi koti ni ku hlula matiko man’wani.+
16 Vanhu va Israyele a va nge he tshembi tiko la Gibita,+ kambe li to va khumbukisa xihoxo xa vona hi mhaka ya leswi va nga kombela ku pfuniwa hi lona. Va ta swi tiva swaku hi mina Yehovha Hosi Leyikulu.”’”
17 Hi siku la ku sungula, ka wheti ya ku sungula, hi lembe la wu 27, Yehovha a vulavule na mina a ku:
18 “N’wana wa munhu, Nebukadinazara*+ hosi ya le Babilona a yendle swaku masonchwa ya yena ma hlasela Tiru.+ Tinhloko hinkwatu ti tsemetiwe mpandlha, katla lin’wani ni lin’wani li tshoviwile. Kambe yena ni masonchwa ya yena a va hakeliwanga hi mhaka ya leswi va nga hlasela Tiru.
19 “Se Yehovha Hosi Leyikulu a li: ‘Tiko la Gibita ni li nyika Nebukadinazara* hosi ya le Babilona,+ a ta teka tshomba la lona a tlhela a teketela minchumu ya yinyingi; yi ta va muholo wa masonchwa ya yena.’
20 “‘Ni ta mu nyika tiko la Gibita swaku ni mu holela hi mhaka ya leswi a nga hlasela doropa la Tiru, hikusa va ni tirhelile,’+ ku vula Yehovha Hosi Leyikulu.
21 “Hi siku lolelo ni ta nyika tiko la Israyele* matimba,+ naswona wena ni ta ku nyika nkama wa ku vulavula xikarhi ka vona; va ta swi tiva swaku hi mina Yehovha.”
Tinhlamunselu ta le hansi
^ Ku sukela lani ku ya hansi loko ku vulavuliwa hi Nilu, ku vulavuliwa hi nambu ni minsele ya wona leyi ku regariwaka hi yona.
^ Kumbe: “ma anzoli”.
^ Ku nga marhambu lama khomaka matinyu.
^ Kumbe: “magwari”.
^ Hi Xiheberu: “masenge”.
^ Kumbe: “li ta va rhumbi”.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “ni ta yendla swaku ku mila limhondzo”.
