Ezekiyele 31:1-18
-
Ku hluliwa ka Gibita, nsinya wawukulu wa mukedari (1-18)
31 Hi siku la ku sungula, la wheti ya wunharhu, ka lembe la wu 11, Yehovha a tlhela a vulavula na mina a ku:
2 “N’wana wa munhu, byela Faru hosi ya Gibita ni vanhu va yena u ku:+‘I mani lweyi a fanaka na wena hi wukulu?
3 A ku ni Muasiriya, ku nga nsinya wa mukedari aLebanoni,A wu ni tigadja ta ku saseka ku fana ni minsinya leyi nga ni ndzhuti, naswona a wu lehile;A wu lehe ku ya fika ni ka marhefu.
4 Wu kulisiwe hi mati, swihlovo swa ku yenta swa mati swi yendle swaku wu kula wu ya henhla.
A wu byaliwe lani ku nga ni swinambyani;Misele ya swona a yi regara minsinya hinkwayu ya khwati.
5 Hi leswo swi nga yendla swaku wu kula wu leha ku tlula minsinya hinkwayu ya khwati.
Tigadja ta wona ti talile ti tlhela ti lehaHi mhaka ya mati ya manyingi lawa a ma li ka swinambyani swa wona.
6 Swinyanyani hinkwaswu swi yake swisaka ka tigadja ta wona,Swiharhi hinkwaswu swi psale hansi ka tigadja ta wonaNaswona matiko hinkwawu lama nga ni vanhu va vanyingi a ma tshama ka ndzhuti wa wona.
7 A wu saseke hi ndlela ya ku hlamalisa ni tigadja ta wona a ti lehe hi ndlela ya ku hlamalisa,Hikusa timintsu ta wona a ti dzime ti ya hansi ti ya fika lani ku nga ni mati ya manyingi.
8 A ku nga na nsinya ni wun’we wa mukedari lowu a wu fana na wona ka jardim la Xikwembu.+
A ku nga na nsinya wa yunipa lowu a wu ni tigadja ta ku fana ni ta wona,A ku nga na nsinya wa platanu lowu a wu ni tigadja ta ku fana ni ta wona.
A ku nga na nsinya wun’wani ka jardim la Xikwembu lowu a wu fana na wona hi ku saseka.
9 Ni wu yendle wu saseka, wu va ni matluka ya manyingi,Minsinya leyin’wani hinkwayu ya le Edeni, ku nga jardim la Xikwembu xa ntiyiso, a yi wu navela.’
10 “Kutani Yehovha Hosi Leyikulu a li: ‘Leswi wu nga leha wu fika ni ka marhefu naswona mbilu ya wona yi titlakusaka hi mhaka ya ku leha ka wona,
11 ni ta wu nyikela ka hosi ya matiko leyi nga ni matimba.+ Yi ta lwa na wona naswona ni ta wu tshika hi mhaka ya wubihi la wona.
12 Se vanhu lava taka hi ka matiko man’wani, matiko lama nga ni mona swinene, va ta wu tsema va wu tshika ka tintshava, matluka ya wona ma ta wetetela ka minkova hinkwayu naswona tigadja ta wona leti nga tshoveka ti ta kumeka ka swinambyani hinkwaswu swa tiko.+ Vanhu hinkwavu va ta suka ka ndzhuti wa wona, va wu siyisa swoleswo.
13 Swinyanyani hinkwaswu swi ta tshama ka nsinya lowu nga wa, ni swiharhi hinkwaswu swi ta tshama ka tigadja ta wona.+
14 Ku ta yendleka leswo leswaku nsinya wun’wani ni wun’wani lowu milaka kusuhi ni mati wu nga kuli wu leha kumbe wu fika ka marhefu ni leswaku ku nga vi ni nsinya lowu regariwaka kahle lowu lehaka wu za wu ya fika ka marhefu. Hikusa hinkwayu yi ta dlayiwa, yi txeleliwa xikan’we ni vanhu lava yaka sirheni.’
15 “Yehovha Hosi Leyikulu a li: ‘Siku leli wu nga ta ya aSirheni* hi lona ni ta yendla swaku ku riliwa. Kutani ni ta sivela mati ya ku yenta ni swinambyani swa wona swaku swi nga fambi. Ni ta yendla swaku ku va ni munyama aLebanoni hi mhaka ya wona naswona minsinya hinkwayu ya khwati yi ta vuna.
16 Nkama wu nga ta vanga guwa lalikulu hi ku wa ka wona, ni ta yendla swaku matiko ma rhurhumela loko ni wu yehlisa aSirheni* xikan’we ni hinkwavu lava yaka sirheni naswona minsinya hinkwayu ya le Edeni,+ minsinya ya ku hlawuleka ngopfu ni yayinene ya Lebanoni, minsinya hinkwayu leyi regariwaka kahle yi ta tiyisiwa asirheni.
17 Yi ye aSirheni* ni nsinya wa mukedari wa Lebanoni, yi ye ka vanhu lava nga dlayiwa hi xipada+ ni ka lava a va wu seketela lava a va tshama ka ndzhuti wa wona xikarhi ka matiko.’+
18 “‘Hi wihi nsinya lowu a wu fana na wena hi ku phatima ni hi wukulu ka minsinya ya le Edeni?+ Kambe u ta yehlisiwa asirheni ni minsinya ya Edeni. U ta yetlela xikarhi ka lava kalaka va nga tsemanga nsuvu* lava nga dlayiwa hi xipada. Leswi swi ta yendlekela Faru ni vanhu va yena hinkwavu,’ ku vula Yehovha Hosi Leyikulu.”
Tinhlamunselu ta le hansi
^ Kumbe: “aSheol”. Vona Ntlhamuselo.
^ Kumbe: “aSheol”. Vona Ntlhamuselo.
^ Kumbe: “aSheol”. Vona Ntlhamuselo.
^ Kumbe: “hambanga circuncisão”.
