Ezekiyele 32:1-32
32 Hi siku la ku sungula, la wheti ya wu 12, hi lembe la wu 12, Yehovha a tlhela a vulavula na mina a ku:
2 “N’wana wa munhu, yimbelela lisimu la xirilo u yimbelelela Faru hosi ya Gibita, u ku:‘A wu fana ni xinghonyamani xa matiko lexi nga ni matimba,Kambe u pfaliwe nomo.
A wu fana ni xiharhi xa ku chavisa xa le lwandle,+ u hlambela ka minambu ya wena,U dunga mati hi minenge ya wena u tlhela u chakisa minambu.’
3 Yehovha Hosi Leyikulu a li:
‘Ni ta hoxa redi la mina henhla ka wena hi ku tirhisa ntlawa wa matiko ya manyingi,Kutani ma ta ku koka hi redi la mina.
4 Ni ta ku tshika atikweni;Ni ta ku txukumeta akhwatini.
Ni ta yendla swaku swinyanyani hinkwaswu swi tshama henhla ka wena,Ni ta xurhisa swiharhi swa misava hinkwayu hi wena.+
5 Ni ta txukumeta nyama ya wena ka tintshava,Ni ta tata minkova hi nyama ya wena leyi nga ta sala.+
6 Ni ta tsakamisa tiko hi ngati ya wena leyi xiririkaka anze ka tintshava,Yi ta tata swinambyani.’
7 ‘Nkama u nga ta timiwa, ni ta pfala matilo ni yendla tinyeleti ti va munyama.
Ni ta mbhonya dlambu hi marhefu,N’weti a wu nge humesi ku vonakala ka wona.+
8 Hinkwaswu leswi voningaka matilweni ni ta swi yendla munyama hi mhaka ya wena,Ni ta yendla swaku tiko la wena li va ni munyama,’ ku vula Yehovha Hosi Leyikulu.
9 ‘Ni ta yendla swaku timbilu ta vanhu va vanyingi ti karhateka nkama ni nga ta humesa swikarawa swa wena swi ya ka matiko man’wani,Ka matiko lawa u kalaka u nga ma tivanga.+
10 Ni ta yendla swaku vanhu va vanyingi va hlamala,Tihosi ta vona ti ta rhurhumela hi ku chava hi mhaka ya wena, nkama ni nga ta phatimisa xipada xa mina phambheni ka tona.
Ti ta tshamela ku rhurhumela, yin’wani ni yin’wani yi chavela wutomi la yona,Hi siku leli u nga ta wa hi lona.’
11 Hikusa Yehovha Hosi Leyikulu a li:
‘U ta hlaseliwa hi xipada xa hosi ya le Babilona.+
12 Ni ta yendla swaku vanhu va vanyingi lava nga na wena va dlayiwa hi swipada swa tinhenha leti nga ni matimba,Ta matiko lama nga ni mona swinene, vanhu hinkwavu.+
Ma ta helisa swilo leswi tiko la Gibita li tibyelaka hi swona naswona vanhu va vanyingi lava nga tikweni va ta helisiwa.+
13 Ni ta helisa swifuyu swa yena hinkwaswu leswi nga kusuhi ni mati ya yena ya manyingi,+A ku na nenge wa munhu kumbe wa xifuyu lowu nga ta tlhela wu ma dunga.’+
14 ‘Hi nkama wolowo ni ta yendla swaku mati ya vona ma basa,Minambu ya vona ni ta yi yendla yi famba ku fana ni mafurha,’ ku vula Yehovha Hosi Leyikulu.
15 ‘Nkama ni nga ta yendla swaku tiko la Gibita li hohlokela,* li va tiko leli nga tekeliwa minchumu ya lona hinkwayu,+Nkama ni nga ta dlaya hinkwavu lava tshamaka ka lona,Va ta swi tiva swaku hi mina Yehovha.+
16 Leli i lisimu la xirilo, vanhu va ta li yimbelela;Vanhu va matiko va ta li yimbelela.
Va ta li yimbelelela tiko la Gibita ni vanhu va lona hinkwavu,’ ku vula Yehovha Hosi Leyikulu.”
17 Se hi siku la wu 15 ka wheti, hi lembe la wu 12, Yehovha a vulavula na mina a ku:
18 “N’wana wa munhu, rilela vanhu va Gibita, u mu yehlisa asirheni, yena ni vanhu va matiko lava nga ni matimba ni lava yehlaka asirheni.
19 “‘U tlula mani hi ku saseka? Famba u ya lahliwa ni lava kalaka va nga tsemanga nsuvu!’*
20 “‘Va ta wa xikarhi ka lava nga dlayiwa hi xipada.+ A nyikeliwe ka xipada; mu kokeni a suka xikan’we ni vanhu va yena hinkwavu.
21 “‘Tinhenha leti nga ni matimba swinene ti ta vulavula na yena ni lava mu pfunaka na ti li phakati ka Sirha.* Va ta yehla naswona va ta lahliwa ku fana ni vanhu lava kalaka va nga tsemanga nsuvu lava nga dlayiwa hi xipada.
22 Asiriya ni vanhu va yena hinkwavu va kolanu. Masirha ya vona ma le matlhelweni ka yena, hinkwavu va dlayiwe hi xipada.+
23 Masirha ya yena ma le phakati ka sirha ni vanhu va yena va le matlhelweni ka sirha la yena, hinkwavu va dlayiwe hi xipada hikusa va vange ku chava ka tiko la lava hanyaka.
24 “‘Elamu+ a kolanu ni vanhu va yena hinkwavu amatlhelweni ka sirha la yena, hinkwavu va dlayiwe hi xipada. Lava va nga vanga ku chava ka tiko la lava hanyaka, va yehlisiwe sirheni na va nga tsemanga nsuvu. Va ta dana koseniyani ni lava yehlaka asirheni.
25 Va mu yendlele mubedu axikarhi ka lava nga dlayiwa naswona vanhu va yena hinkwavu va le matlhelweni ka masirha ya yena. Hinkwavu a va tsemanga nsuvu, va dlayiwe hi xipada hikusa va vange ku chava ka tiko la lava hanyaka; naswona va ta dana ni lava yaka sirheni. A vekiwe xikarhi ka lava nga dlayiwa.
26 “‘Mixeke na Tubali+ ni vanhu va vona hinkwavu va kolanu. Masirha ya vona* ma le matlhelweni ka yena.* Hinkwavu a va tsemanga nsuvu, va dlayiwe hi xipada hikusa va vange ku chava ka tiko la lava hanyaka.
27 Indjhe a va nga ta lahliwa ni tinhenha ta matimba leti kalaka ti nga tsemanga nsuvu, leti nga ya aSirheni* ni matlharhi ya tona? Va ta veka swipada swa tona hansi ka tinhloko ta tona* naswona swidjoho swa tona swi ta va henhla ka marhambu ya tona, hikusa tinhenha leti ta matimba ti vange ku chava ka tiko la lava hanyaka.
28 Kambe wena u ta helisiwa xikarhi ka lava kalaka va nga tsemanga nsuvu naswona u ta lahliwa ni lava nga dlayiwa hi xipada.
29 “‘Edomu+ a kolanu, tihosi ta yena ni varhangeli va yena hinkwavu va lahliwe xikarhi ka lava nga dlayiwa hi xipada hambileswi a va ni matimba; na vona va ta lahliwa ni lava kalaka va nga tsemanga nsuvu+ ni lava yaka asirheni.
30 “‘Varhangeli va le norte* va kolanu xikan’we ni Vasidoni hinkwavu,+ lava yehlaka sirheni na va dana xikan’we ni lava nga dlayiwa hambileswi va nga vanga ku chava hi mhaka ya matimba ya vona. Va ta lahliwa na va nga tsemanga nsuvu xikan’we ni lava nga dlayiwa hi xipada naswona va ta dana ni lava yehlaka asirheni.
31 “‘Faru a ta vona vanhu lava hinkwavu naswona a ta tiyisiwa ka hinkwaswu leswi nga yendlekela vanhu va yena;+ Faru ni masonchwa ya yena hinkwawu va ta dlayiwa hi xipada,’ ku vula Yehovha Hosi Leyikulu.
32 “‘Leswi a nga vanga ku chava ka tiko la lava hanyaka, Faru ni vanhu va yena hinkwavu va ta lahliwa* ni lava kalaka va tsemanga nsuvu, lava nga dlayiwa hi xipada,’ ku vula Yehovha Hosi Leyikulu.”
Tinhlamunselu ta le hansi
^ Kumbe: “li va rhumbi”.
^ Kumbe: “hambanga circuncisão.”
^ Kumbe: “Sheol.” Vona Ntlhamuselo.
^ Hi Xiheberu: “yena”.
^ Hi Xiheberu: “yena.”
^ Kumbe: “aSheol”. Vona Ntlhamuselo.
^ Kumbexana ku vulavuliwa hi tinhenha leti a ti lahliwa ni swipada swa tona na ku li ndlela ya ku ti hlonipha.
^ Kumbe: “n’walungu”.
^ Hi Xiheberu: “yetlela”.
