Ezekiyele 34:1-31
34 Yehovha a tlhela a vulavula na mina a ku:
2 “N’wana wa munhu, profeta leswi lwisanaka ni varisi va Israyele. Profeta u byela varisi u ku: ‘Yehovha Hosi Leyikulu a li: “Khombo ka varisi va Israyele,+ lava va tihlayisaka vona vinyi! Kasi a va nga fanelanga va hlayisa ntlhambi?+
3 Mi dla mafurha, mi yambala mpahla ya ku yendliwa hi mavoya naswona mi dlaya swifuyu swa ku nona+ kambe a mi wu hlayisi ntlhambi.+
4 A mi ti tiyisanga tinyempfu leti nga hela ntamu kumbe ku holisa leti vabyaka kumbe mi bohelela leti nga vavisiwa kumbe mi vuyisa leti nga huma ndleleni kumbe mi lava leti nga lahleka;+ kambe mi ti fume hi ndlela ya ku biha ni ya mona.+
5 Se ti hangalakelile hikusa a ti nga na murisi;+ ti hangalakile ti va swakudla swa swiharhi.
6 Tinyempfu ta mina ti lahlekile ka tintshava hinkwatu ni ka maganga hinkwawu; tinyempfu ta mina ti hangalakelile ni misava hinkwayu ku nga na munhu lweyi a yaka a ya ti lava.
7 “‘“Kutani n’wina varisi yingisani rito la Yehovha leli nge:
8 ‘“Leswi ni hanyaka,” ku vula Yehovha Hosi Leyikulu, “leswi tinyempfu ta mina ti nga dlayiwa ti tlhela ti va swakudla swa swiharhi hinkwaswu hikusa a ku nga na murisi naswona varisi va mina a va ti lavetelanga tinyempfu ta mina, kambe va tame va tihlayisa vona vinyi va nga na mhaka ni tinyempfu ta mina,”’
9 yingisani rito la Yehovha, n’wina varisi.
10 Yehovha Hosi Leyikulu a li: ‘Ni lwa ni varisi naswona ni ta lava tinyempfu ta mina ka vona, ni ta va tshikisa ku hlayisa tinyempfu ta mina+ naswona na vona varisi a va nga ha ta tihlayisa vona vinyi. Ni ta ponisa tinyempfu ta mina ka nomo wa vona, a ti nge he vi swakudla swa vona.’”
11 “‘Yehovha Hosi Leyikulu a li: “Ni kona naswona ni ta lavetela tinyempfu ta mina, ni ta ti hlayisa.+
12 Ni ta hlayisa tinyempfu ta mina ku fana ni murisi lweyi a nga kuma tinyempfu ta yena leti a ti hangalakelile kutani a ti risa.+ Ni ta ti ponisa ka tindhawu hinkwatu leti nga hangalakela ka tona hi siku la marhefu ni la munyama wawukulu.+
13 Ni ta ti humesa axikarhi ka vanhu, ni ti hlengeleta ka matiko man’wani lawa ti nga ka wona, ni ti tisa ka tiko la tona ni ti hlayisa ka tintshava ta Israyele,+ ka swinambyani ni ka tindhawu hinkwatu ta tiko leti ku tshamiwaka ka tona.
14 Ni ta ti lusa ka byanyi lalinene naswona tiko leli ti nga ta dlela ka lona li ta va ka tintshava ta ku tlakuka ta Israyele.+ Ti ta humula ka tiko lolelo leli nga ni byanyi lalinene+ naswona ti ta dla byanyi lalinene ka tintshava ta Israyele.”
15 “‘“Ni ta hlayisa tinyempfu ta mina hi noxe,+ ni ta ti tshika ti humula,”+ ku vula Yehovha Hosi Leyikulu.
16 “Leyi nga lahleka ni ta yi lavetela,+ leyi nga huma ndleleni ni ta yi vuyisa, leyi nga vavisiwa ni ta yi bohelela, leyi nga hela ntamu ni ta yi tiyisa; kambe leyi nga nona ni leyi nga ni matimba ni ta yi helisa. Ni ta yi yavanyisa naswona ni ta yi khatisa hi ku ya hi mintirho ya yona.”
17 “‘N’wina tinyempfu ta mina, Yehovha Hosi Leyikulu a li: “Ni ta yavanyisa tinyempfu ta mina ku nga li khale, ni ta yavanyisa ta xinuna ni swiphongo.+
18 Kasi a swi yenelanga leswi mi dlaka byanyi lalinene hintamu? Mi fanele mi tlhela mi kandzihetela ni ndhawu ya n’wina leyin’wani leyi mi dlelaka ka yona? Mi fanele mi dunga mati hi minenge ya n’wina loko se mi phuzile mati lama nga tenga swinene?
19 Indjhe tinyempfu ta mina ti fanele ti dla ka byanyi leli nga kandziheteliwa hi n’wina, ti tlhela ti phuza mati lama nga dungiwa hi n’wina?”
20 “‘Kutani Yehovha Hosi Leyikulu a va byela leswi: “Ni kona naswona ni ta yavanyisa xikarhi ka nyempfu ya ku nona ni nyempfu ya ku wondza,
21 hikusa a mi tshamela ku ti susumeta hi muzimbha ni katla naswona a mi tshamela ku susumeta hinkwatu leti vabyaka hi timhondzo anze mi ti hangalasa ka matiko man’wani.
22 Ni ta ponisa tinyempfu ta mina, a ti nga ha ta hlaseliwa;+ ni ta yavanyisa tinyempfu ta mina.
23 Ni ta ti vekela murisi mun’we,+ mutirheli wa mina Davhida,+ a ta ti hlayisa. A ta ti hlayisa naswona a ta va murisi wa tona.+
24 Mina Yehovha, ni ta va Xikwembu xa tona+ naswona mutirheli wa mina Davhida a ta va murhangeli xikarhi ka tona.+ Mina Yehovha ni swi vulile.
25 “‘“Ni ta yendla ntwananu wa ku rhula na tona+ naswona ni ta helisa swiharhi swa ku chavisa leswi nga ni khombo atikweni+ leswaku ti ta tshama na ti hlayisekile amananga, ti yetlela makhwatini.+
26 Ni ta yendla swaku tona ni ndhawu leyi nga kusuhi ni ntshava ya mina swi va nkateko+ naswona ni ta yendla swaku mpfula yi na hi nkama wa kona. Minkateko yi ta na ku fana ni timpfula.+
27 Minsinya yi ta psala mihandzu, misava yi ta humesa ntshovelo wa yona+ naswona tinyempfu ta mina ti ta tshama na ti hlayisekile atikweni. Ti ta swi tiva swaku hi mina Yehovha nkama ni nga ta tshova makange* ya tona+ ni nkama ni nga ta ti ponisa ka lava ti yendlaka swikarawa.
28 Matiko a ma nge he ti hlaseli, swiharhi a swi nge he ti dli naswona ti ta tshama na ti hlayisekile, ti nga chavisiwi hi munhu.+
29 “‘“Ni ta ti yendlela ndhawu ya ku byala ka yona leyi nga ni ndhuma, a ti nge he dlayiwi hi ndlala atikweni+ naswona a ti nge he danisiwi hi matiko.+
30 ‘Kutani ti ta swi tiva swaku mina Yehovha ni Xikwembu xa tona naswona ni na tona ni leswaku tona, ku nga Vayisrayele i vanhu va mina,’+ ku vula Yehovha Hosi Leyikulu.”’
31 “‘N’wina tinyempfu ta mina,+ tinyempfu leti ni ti hlayisaka, mo va vanhu ntsena naswona mina ni Xikwembu xa n’wina,’ ku vula Yehovha Hosi Leyikulu.”
Tinhlamunselu ta le hansi
^ Kumbe: “madjoko; jugos”.
