Ezekiyele 37:1-28
37 Ni twe matimba* ya Yehovha na ma li ka mina, se Yehovha a ni tlakula hi matimba ya yena, a ni veka ka ndhawu leyi nga pfuleka+ naswona a yi tale hi marhambu.
2 A ni hundzise hi kusuhi na wona, se ni vona marhambu ya manyingi swinene ka ndhawu leyi nga pfuleka naswona a ma wome ngopfu.+
3 A ni vutisa a ku: “N’wana wa munhu, indjhe marhambu lawa ma nga tlhela ma hanya?” Se ni hlamula ni ku: “Yehovha Hosi Leyikulu, hi wena u swi tivaka.”+
4 Kutani a ni byela a ku: “Profeta hi ta marhambu lawa, u ma byela u ku: ‘N’wina marhambu ya ku woma, yingisani leswi Yehovha a swi vulaka:
5 “‘Yehovha Hosi Leyikulu a byela marhambu lawa a ku: “Ni ta nghenisa moya wa wutomi* ka n’wina, mi ta tlhela mi hanya.+
6 Ni ta nghenisa minsiha ni nyama ka n’wina, ni ta mi namarheta xikhumba, ni ta nghenisa moya wa wutomi ka n’wina, mi ta tlhela mi hanya; se mi ta swi tiva swaku hi mina Yehovha.”’”
7 Se ni profeta hi ku landza leswi ni nga rhumiwa swona. Loko se ni profetile ku game ku twakala guwa la ku banana ka marhambu, se marhambu ma sungula ku tlhangana.
8 Se ni ma vona ma va ni minsiha ni nyama, ma gama ma mbhonyiwa hi xikhumba. Kambe a ma nga hefemuli.
9 A gama a ni byela a ku: “Profeta ka moya. Profeta n’wana wa munhu, u byela moya u ku: ‘Yehovha Hosi Leyikulu a li: “Wena moya bana u huma hi ka matlhelo hinkwawu ya misava,* u nghena ka vanhu lava a va dlayiwile swaku va tlhela va hanya.”’”
10 Kutani ni profeta hi ku landza leswi ni nga byeliwa swona, se moya wa wutomi wu nghena ka vona va gama va sungula ku hanya, va nyima hi minenge,+ a va li ntlawa wawukulu swinene wa masonchwa ya nyimpi.
11 Kutani a ni byela a ku: “N’wana wa munhu, marhambu lawa i vanhu hinkwavu va Israyele.+ Vona va li: ‘Marhambu ya hina ma womile, a ha ha na ntshembo.+ Hi hambanisiwile ni vanhu van’wani.’
12 Se profeta u va byela u ku: ‘Yehovha Hosi Leyikulu a li: “Ni ta pfula masirha ya n’wina,+ ni ta mi humesa ka wona n’wina vanhu va mina, ni mi tisa ka tiko la Israyele.+
13 Mi ta swi tiva swaku hi mina Yehovha nkama ni nga ta pfula masirha ya n’wina ni nkama ni nga ta mi humesa ka wona, n’wina vanhu va mina.”’+
14 ‘Ni ta nghenisa matimba ya mina ka n’wina, mi ta tlhela mi hanya,+ ni ta mi tshamisa ka tiko la n’wina; kutani mi ta swi tiva swaku mina Yehovha, ni swi vulile naswona ni swi yendlile,’ ku vula Yehovha.”
15 Yehovha a tlhela a vulavula na mina a ku:
16 “Wena n’wana wa munhu, teka nhonga u tsala ka yona u ku: ‘Ya Yuda ni Vayisrayele hinkwavu lava nga na yena.’*+ U gama u teka nhonga yin’wani u tsala ka yona u ku: ‘Ya Yosefa, ku nga nhonga leyi fanekiselaka Efrayimi ni Vayisrayele hinkwavu lava nga na yena.’*+
17 Ti khomi u ti tlhanganisa ti va nhonga yin’we ka voko la wena.+
18 Loko vanhu va tiko la wena va ku vutisa va ku: ‘U nga hi byela swaku swilo leswi swi vula yini?’
19 Va byeli u ku: ‘Yehovha Hosi Leyikulu a li: “Ni ta teka nhonga ya Yosefa leyi nga ka voko la Efrayimi ni tinxaka ta Israyele leti nga na yena, ni gama ni va tlhanganisa ni nhonga ya Yuda; ni ta va yendla nhonga yin’we,+ va ta va nchumu wun’we ka voko la mina.”’
20 Tinhonga leti u tsalaka ka tona u fanele u ti khoma hi voko swaku va ta ti vona.
21 “U gama u va byela u ku: ‘Yehovha Hosi Leyikulu a li: “Ni ta teka Vayisrayele xikarhi ka matiko lawa va nga ya ka wona, ni ta va hlengeleta ka matlhelo hinkwawu, ni va tisa ka tiko la vona.+
22 Ni ta va yendla lixaka lin’we ka tiko leli,+ ka tintshava ta Israyele, hinkwavu va ta fumiwa hi hosi yin’we,+ a va nga ha ta va tinxaka timbirhi; naswona a va nga ha ta va mimfumu yimbirhi.+
23 A va nga ha ta tichakisa hi swikwembu swa vona swa ku nyenyentsa* ni hi mintirho ya vona ya ku nyenyentsa ni hi swidjoho swa vona.+ Ni ta va ponisa ka ku kala ku tshembeka ka vona loku nga yendla swaku va djoha, ni ta va basisa. Va ta va vanhu va mina kutani mina ni ta va Xikwembu xa vona.+
24 “‘“Mutirheli wa mina Davhida a ta va hosi ya vona+ naswona hinkwavu va ta va ni murisi mun’we.+ Va ta yingisa swiboho swa mina swa ku yavanyisa ni minawu ya mina.+
25 Va ta tshama ka tiko leli ni nga li nyika mutirheli wa mina Yakobe lani vavhovho va n’wina va nga tshama kona,+ va ta tshama ni vana* va vona ka lona ni vatukulu va vona+ hi nkama wa ku kala wu nga heli;+ naswona mutirheli wa mina Davhida a ta va murhangeli wa vona hi nkama wa ku kala wu nga heli.+
26 “‘“Ni ta yendla ntwananu wa ku va ni ku rhula na vona;+ wu ta va ntwananu wa ku kala wu nga heli na vona. Ni ta va lunghisela ndhawu ni yendla swaku va tala+ naswona ni ta veka ndhawu ya mina leyi kwetsimaka xikarhi ka vona hi nkama wa ku kala wu nga heli.
27 Tende* la mina li ta va xikarhi* ka vona, ni ta va Xikwembu xa vona kutani vona va ta va vanhu va mina.+
28 Matiko ma ta swi tiva swaku mina Yehovha, ni kwetsimisa Israyele nkama lowu ndhawu ya mina leyi kwetsimaka yi nga ta va xikarhi ka vona hi nkama wa ku kala wu nga heli.”’”+
Tinhlamunselu ta le hansi
^ Hi Xiheberu: “voko la”.
^ Kumbe: “ku hefemula”.
^ Hi Xiheberu: “ka 4 wa mimoya”.
^ Kumbe: “lava tirhisanaka na yena.”
^ Kumbe: “lava tirhisanaka na yena.”
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Hi Xiheberu: “vana va madjaha”.
^ Kumbe: “Ndhawu ya ku tshama ka yona; Kaya”.
^ Kumbe: “ahenhla ka”.
