Ezekiyele 38:1-23
38 Yehovha a tlhela a khuluma na mina a ku:
2 “N’wana wa munhu, txuvuka Goge wa tiko la Magoge,+ murhangeli wamukulu wa Mixeke na Tubali,+ u gama u profeta leswi lwisanaka na yena.+
3 U fanele u ku: ‘Yehovha Hosi Leyikulu a li: “Ni lwa na wena Goge, murhangeli wamukulu wa Mixeke na Tubali.
4 Ni ta ku ndzuluta, ni tlhoma swiyove ka tinhlaya* ta wena,+ ni ku humesa ni masonchwa ya wena hinkwawu ya nyimpi,+ makavhalu ya wena ni vafambisi va makavhalu, hinkwavu na va yambale mpahla ya ku saseka ngopfu, ntlawa hinkwawu wawukulu swinene lowu nga khoma swivhikelo swaswikulu ni swaswitsongo, hinkwavu na va ni swipada swa vona;
5 va ta va na Persiya, Etiyopiya na Puti,+ hinkwavu na va khome swivhikelo naswona na va yambale makapaseti ya nyimpi;
6 na Gomeri ni masonchwa ya yena hinkwawu, vatukulu va Torgama+ lava taka hi ka tindhawu ta le kule swinene ta le norte* ni masonchwa ya vona hinkwawu, vanhu va vanyingi va na wena.+
7 “‘“Lunghekani, mi tilunghiselela, wena ni masonchwa ya wena lama nga hlengeletana na wena, se wena u ta va murhangeli* wa wona.
8 “‘“U ta vitaniwa loko se ku hele masiku ya manyingi. Ka malembe ya wugamu u ta hlasela tiko la vanhu lava nga vuyisiwa ni lava nga ponisiwa ka xipada, lava nga hlengeletiwa va huma ka vanhu va vanyingi va tisiwa ka tintshava ta Israyele, lani ku nga hela nkama wa wunyingi na ku nga tshami vanhu. Vanhu lava tshamaka ka tiko leli va vuyisiwe hi ka matiko naswona hinkwavu va tshama na va vhikelelekile.+
9 U ta va yela ku fana ni xidzedze, u ta mbhonya tiko ku fana ni marhefu, wena ni masonchwa ya wena hinkwawu ni vanhu va vanyingi lava nga na wena.”’
10 “Yehovha Hosi Leyikulu a li: ‘Hi siku lolelo ku ni leswi u nga ta swi pimisa ka mbilu ya wena naswona u ta hamba maplanu* ya ku yendla swa ku biha.
11 U ta ku: “Ni ta hlasela tiko la lava tshamaka ka swidoropani leswi kalaka swi nga vhikeleliwanga.+ Ni ta lwa ni lava tshamaka ka tindhawu leti nga hlayiseka, lava kalaka va nga karhatiwi hi nchumu, hinkwavu va tshama ka swidoropani leswi kalaka swi nga na mimuru ya ku swi vhikela, swa ku khiya hi swona kumbe tinyanghwa.”
12 Planu la kona ku ta va ku teketela minchumu ya yinyingi, ku hlasela tindhawu leti a ti hohlokelile* kambe swoswi se ku tshamaka vanhu+ ni vanhu lava nga tlhela va hlengeleteliwa va huma ka matiko man’wani,+ lava hlengeletaka tshomba ni nhundzu,+ lava tshamaka xikarhi ka misava.
13 “‘Xeba+ na Dedani+ ni vaxavisi va Tarxixi+ ni tinhenha* hinkwatu ta yena va ta ku vutisa va ku: “U ta hlasela swaku u teketela minchumu ya yinyingi? U hlengelete masonchwa ya wena swaku ma teka prata ni woru, ma teka tshomba ni nhundzu ni ku teketela minchumu ya yinyingi hintamu?”’
14 “Se profeta n’wana wa munhu, u byela Goge u ku: ‘Yehovha Hosi Leyikulu a li: “Hi siku lolelo u ta swi tiva swaku vanhu va mina ku nga Vayisrayele va tshama na va vhikelelekile.+
15 U ta ta hi ka ndhawu ya wena, u sukela ka tindhawu ta le kule swinene ta le norte,+ wena ni vanhu va vanyingi lava nga na wena, hinkwavu na va li ka makavhalu, na va li masonchwa ya manyingi.+
16 Ku fana ni marhefu lama mbhonyaka tiko, u ta ta u ta lwa ni vanhu va mina ku nga Vayisrayele. Ka masiku ya wugamu ni ta ku tisa swaku u ta lwa ni tiko la mina,+ leswaku matiko ma ta ni tiva nkama ni nga ta tirhisa wena swaku ni tikwetsimisa phambheni ka wona, Wena Goge.”’+
17 “Yehovha Hosi Leyikulu a li: ‘Kasi a hi wena lweyi ni nga vulavula hi yena khale swinene hi ku tirhisa vatirheli va mina ku nga vaprofeta va Israyele, lava nga profeta ku ringana malembe ya manyingi swaku hi wena u nga ta lwa na vona?’
18 “‘Hi siku lolelo, ku nga siku leli Goge a nga ta hlasela tiko la Israyele hi lona,’ ku vula Yehovha Hosi Leyikulu, ‘ni ta kwata swinene.+
19 Ni ta khuluma na ni kwatile hintamu; hi siku lolelo ku ta va ni ku tsekatseka kakukulu ka misava ka tiko la Israyele.
20 Tihlampfi, swinyanyani, swiharhi swa khwati, ni swiharhi hinkwaswu leswi fambaka hi khwirhi ni vanhu hinkwavu va ta rhurhumela hi mhaka ya mina, tintshava hinkwatu ti ta diliziwa,+ ndhawu yin’wani ni yin’wani leyi yehlaka mati* yi ta wa ni mimuru hinkwayu yi ta wetetela.’
21 “‘Ni ta rhumela xipada swaku xi hlasela Goge ka tintshava ta mina hinkwatu,’ ku vula Yehovha Hosi Leyikulu. ‘Xipada xa munhu mun’wani ni mun’wani xi ta lwa ni makwavu.+
22 Ni ta mu yavanyisa. Ni ta rhumela ntungu+ ka yena ni ka masonchwa ya yena. Vanhu va ta fa; ni ta nisa mpfula ya matimba ni marhalala*+ ni ndzilu+ ni xivavula*+ ahenhla ka yena ni masonchwa ya yena ni ka vanhu va vanyingi lava a nga na vona.+
23 Ni ta titlakusa ni tlhela ni tikwetsimisa, ni titivisa phambheni ka matiko ya manyingi; ma ta swi tiva swaku hi mina Yehovha.’
Tinhlamunselu ta le hansi
^ Ku nga marhambu lawa ma khomaka matinyu.
^ Kumbe: “n’walungu”.
^ Hi Xiheberu: “murindzi”.
^ Kumbe: “makungu”.
^ Kumbe: “a ti li marhumbi”.
^ Kumbe: “swinghonyamani swa ku leva”.
^ Kumbe: “ndhawu leyi nga riwa”.
^ Kumbe: “marhalani”.
^ Ka ndzimana leyi rito leli li vula muxaka wa maribye ya ku hisa.
