Ezekiyele 39:1-29
39 “Wena n’wana wa munhu, profeta leswi lwisanaka na Goge,+ u mu byela u ku: ‘Yehovha Hosi Leyikulu a li: “Ni lwa na wena Goge, murhangeli wamukulu wa Mixeke na Tubali.+
2 Ni ta ku ndzuluta, ni ku kongomisa, ni ku humesa ka tindhawu ta le kule swinene ta le norte,*+ ni ku tisa ahenhla ka tintshava ta Israyele.
3 Ni ta ba ligubu la wena li nga ka voko la wena la ximatsi, ni wisa mimpaxwa* ya wena yi nga ka voko la wena la xinene.
4 U ta wa ka tintshava ta Israyele,+ wena ni masonchwa ya wena hinkwawu ni vanhu lava nga ta va na va na wena. Ni ta yendla swaku u dliwa hi swinyanyani swa mixaka hinkwayu leswi dlaka nyama ni hi swiharhi swa khwati.”’+
5 “‘U ta wa akhwatini,+ hikusa mina ni swi vulile,’ ku vula Yehovha Hosi Leyikulu.
6 “‘Ni ta rhumela ndzilu ka Magoge ni ka lava tshamaka ka swihlala* na va vhikelelekile,+ kutani va ta swi tiva swaku hi mina Yehovha.
7 Ni ta yendla swaku vito la mina la ku kwetsima li tiviwa xikarhi ka vanhu va mina ku nga Vayisrayele, a ni nge he pfumeli swaku vito la mina la ku kwetsima li tlhela li chakisiwa; matiko ma ta swi tiva swaku hi mina Yehovha,+ Mukwetsimi wa Israyele.’+
8 “‘Minchumu leyi ya ta naswona yi ta yendleka,’ ku vula Yehovha Hosi Leyikulu. ‘Leli i siku leli ni nga vulavula hi lona.
9 Lava tshamaka ka madoropa ya Israyele va ta huma va ya tshivela ndzilu hi swilo swa ku lwa hi swona, ku nga swivhikelo swaswikulu ni swaswitsongo, tigubu ni mimpaxwa, tinhonga ta ku lwa hi tona ni matlharhi. Va ta tshivela ndzilu hi swona+ anze ku hela 7 wa malembe.
10 A va nge he boheki ku rhwala tihunyi anhoveni kumbe ku rholela tihunyi amakhwatini, hikusa va ta tshivela ndzilu hi swilo swa ku lwa hi swona.’
“‘Va ta teketela swilo swa lava a va va tekele minchumu ya vona, va hlasela lava a va va hlaselile,’ ku vula Yehovha Hosi Leyikulu.
11 “‘Hi siku lolelo, Goge+ ni ta mu nyika simitela aIsrayele, ka nkova lowu lava yaka awuxeni la lwandle va hundzaka hi ka wona, li ta pfala ndlela ya lava hundzaka. Hi kolanu va nga ta lahla Goge ni vanhu hinkwavu lava nga na yena, se ndhawu yoleyo va ta yi vitana swaku i Nkova wa Hamoni-Goge.*+
12 Vanhu va Israyele va ta heta 7 wa tiwheti na va va lahla va basisa tiko.+
13 Vanhu hinkwavu va tiko va ta va lahla, kutani leswi swi ta yendla swaku va va ni ndhuma hi siku leli ni nga ta tikwetsimisa hi lona,’+ ku vula Yehovha Hosi Leyikulu.
14 “‘Ku ni vavanuna lava nga ta vekiwa swaku va rhendzelekela tikweni swaku va lahla mintsumbu leyi nga ta va na yi salile, leswaku va li basisa. Va ta tama va yi lavetela anze ku hela 7 wa tiwheti.
15 Loko lava rhendzelekaka atikweni va vona rhambu la munhu, va ta veka marka atlhelweni ka lona. Se lava nga vekiwa swaku va lahla va ta ya li lahla ka Nkova wa Hamoni-Goge.+
16 Naswona ku ta va ni doropa leli vitaniwaka Amona* kolanu. Na vona va ta basisa tiko.’+
17 “Wena n’wana wa munhu, Yehovha Hosi Leyikulu a li: ‘Byela swinyanyani hinkwaswu ni swiharhi hinkwaswu u ku: “Hlengeletanani mi ta. Hlengeletanani amatlhelweni ka gandzelo la mina leli ni mi lunghiselelaka lona, ku nga gandzelo lalikulu ka tintshava ta Israyele.+ Mi ta dla nyama mi tlhela mi phuza ngati.+
18 Mi ta dla nyama ya tinhenha mi tlhela mi phuza ngati ya varhangeli va misava, tinyempfu, timbuti ni tihomu, swifuyu hinkwaswu swa ku nona swa le Baxani.
19 Ka gandzelo leli ni mi lunghiselelaka lona, mi ta dla mafurha ya manyingi swinene mi tlhela mi phuza ngati anze mi dakwa.”’
20 “‘Ka meza wa mina mi ta dla makavhalu ni vafambisi va tinyolo,* vanhu va matimba ni tinhenha ta mixaka hinkwayu,’+ ku vula Yehovha Hosi Leyikulu.
21 “‘Ni ta kombisa ku phatima ka mina xikarhi ka matiko, se matiko hinkwawu ma ta vona ndlela leyi ni nga yavanyisa hi yona ni matimba lawa ni nga ma kombisa xikarhi ka wona.+
22 Ku sukela hi siku lolelo ku ya phambheni, vanhu va Israyele va ta swi tiva swaku hi mina Yehovha Xikwembu xa vona.
23 Matiko ma ta swi tiva swaku vanhu va Israyele va ye wukaraweni hi mhaka ya xihoxo xa vona, hi mhaka ya leswi va kalaka va nga tshembekanga ka mina.+ Ni va fihlele nghohe* ya mina,+ ni va nyikela ka valala va vona+ se hinkwavu va dlayiwe hi xipada.
24 Ni va khome hi ku ya hi leswi va nga tichakisisa swona ni hi ku ya hi xidjoho xa vona naswona ni va fihlele nghohe ya mina.’
25 “Kutani Yehovha Hosi Leyikulu a li: ‘Vanhu va Yakobe lava a va li wukaraweni+ ni ta va tlhelisela ka tiko la vona naswona ni ta va ni timpsalu ka vanhu hinkwavu va Israyele;+ ni ta tirhisa matimba swaku ni nyimelela vito la mina la ku kwetsima.+
26 Loko se va danisiwile hi mhaka ya leswi va kalaka va nga tshembekanga ka mina,+ va ta gama va tshama ka tiko la vona na va hlayisekile va nga chavisiwi hi munhu.+
27 Nkama ni nga ta va vuyisa xikarhi ka vanhu, ni va hlengeleta va huma ka matiko ya valala va vona,+ ni ta tlhela ni tikwetsimisa xikarhi ka vona na swi voniwa hi matiko ya manyingi.’+
28 “‘Va ta swi tiva swaku hi mina Yehovha Xikwembu xa vona nkama ni nga ta va yisa wukaraweni axikarhi ka matiko ni gama ni tlhela ni va hlengeleta va tlhela ka tiko la vona, ni nga siyi munhu.+
29 A ni nge he va fihleli nghohe ya mina,+ hikusa ni ta chulula moya wa mina wa ku kwetsima ka vanhu va Israyele,’+ ku vula Yehovha Hosi Leyikulu.”
Tinhlamunselu ta le hansi
^ Kumbe: “n’walungu”.
^ Kumbe: “maflexa”.
^ Ku nga ma ilhas.
^ Kumbe: “wa vanhu va vanyingi va Goge.”
^ Leswi vulaka “Vanhu Va Vanyingi”.
^ Kumbe: “tin’qolo; makalichi”.
^ Kumbe: “kara la”.
