Ezekiyele 41:1-26
41 Kutani a ni yisa ka ndhawu leyi kwetsimaka ya le handle,* se a pima mapilari ya le matlhelweni; a ma yaname 3,1 wa mametru* ka tlhelo lin’we, ma yanama 3,1 wa mametru ka tlhelo lelin’wani.
2 Ndhawu ya ku nghena hi yona a yi yaname kolomuyani ka 5,2 wa mametru* naswona makhumbi ya le matlhelweni ka ndhawu ya ku nghena hi yona a ma yaname 2,6 wa mametru* ka tlhelo lin’we ni 2,6 wa mametru ka tlhelo lelin’wani. A pime ku leha ka tempele a kuma swaku a ku li 20,7 wa mametru,* naswona a yi yaname 10,4 wa mametru.*
3 Se a gama a nghena phakati,* a pima pilari la le tlhelweni ka ndhawu ya ku nghena hi yona, a li kule kolomuyani ka metru lin’we,* kasi ndhawu ya ku nghena hi yona a yi yaname 3,1 wa mametru. Makhumbi ya le matlhelweni ka ndhawu ya ku nghena hi yona a ma yaname 3,6 wa mametru.*
4 A game a pima kwartu leli nga txuvukana ni ndhawu leyi kwetsimaka ya le handle, a li lehe 10,4 wa mametru li yanama 10,4 wa mametru.+ Se a gama a ni byela a ku: “Leyi i Ndhawu Ya Ku Kwetsima Hintamu.”+
5 Se a gama a pima khumbi la tempele, a li kule 3,1 wa mametru. Makwartu ya le matlhelweni lawa ma nga rhendzela tempele a ma yaname mametru mambirhi.*+
6 Makwartu ya le matlhelweni a ma ni maandari manharhu, lin’we ahenhla ka lin’wani, andari lin’we a li ni 30 wa makwartu. A ku ni swilo swa ku tiyisa hi swona leswi a swi li matlhelweni ka khumbi la tempele leswi a swi tiyisa makwartu ya le matlhelweni swaku khumbi la tempele li nga boxiwi.+
7 Ka matlhelo hamambirhi ya tempele a ku ni koredori leli a li rhendzeleka* leli a li ya li pfuleka nkama li yaka ka makwartu ya le henhla.+ A li ya li pfuleka loko u suka ka andari lin’we ku ya ka lin’wanyani, nkama lowu munhu a yaka henhla a suka ka andari la le hansi a hundza hi ka andari la le xikarhi a ya ka andari la le henhla.
8 Ni vone nchumu* xa ku tlakuka ka matlhelo hinkwawu ya tempele naswona masungulo ya makwartu ya le matlhelweni a ma ringana ni lihlanga hinkwalu leli a li ni 3,1 wa mametru ku ya fika ka ponta.
9 Khumbi la le handle la makwartu ya le matlhelweni a li yaname 2,6 wa mametru. A ku ni ndhawu ya ku pfuleka* atlhelweni ka makwartu lawa a ma li matlhelweni leyi na yona a yi lumba tempele.
10 Axikarhi ka tempele ni masala ya ku dlela ka wona+ a ku ni ndhawu leyi a yi yaname 10,4 ma mametru ka tlhelo ha lin’we.
11 A ku ni ndhawu ya ku nghena hi yona axikarhi ka makwartu ya le matlhelweni ni ndhawu leyi nga pfuleka ka tlhelo la le norte* naswona a ku ni ndhawu yin’wani ya ku nghena hi yona ka tlhelo la le sul.* Ndhawu leyi ya ku pfuleka a yi yaname 2,6 wa mametru ka matlhelo hinkwawu.
12 Yindlo leyi a yi yakiwile awupeladlambu leyi a yi txuvukane ni ndhawu ya ku pfuleka a yi yaname 36,3 wa mametru yi leha 46,6 wa mametru; makhumbi ya yindlo yoleyo a ma kule 2,6 wa mametru ka matlhelo hinkwawu.
13 Kutani a pima tempele, a yi lehe 51,8 wa mametru.* Ndhawu ya ku pfuleka, yindlo* leyi a yi yakiwile ni makhumbi ya yona na swona a swi lehe 51,8 wa mametru.
14 Ku yanama ka ndhawu leyi nga phambheni ka tempele leyi nga txuvuka awuxeni ni ku yanama ka ndhawu leyi nga pfuleka a ku li 51,8 wa mametru.
15 Se a gama a pima ku leha ka yindlo leyi nga txuvukana ni ndhawu leyi nga pfuleka andzhaku ka tempele, a tlhela a pima ni makoredori ya kona ka matlhelo hamambirhi, a swi ni 51,8 wa mametru.
A tlhele a pima ni ndhawu leyi kwetsimaka ya le handle, ndhawu leyi kwetsimaka ya le ndzeni+ ni mavharanda ya kintari,*
16 ku patsa ni tindhawu ta ku nghena hi tona, majanela lawa ma nga ni maaru ya ku lala+ ni makoredori lawa a ma li ka tindhawu leto ta tinharhu. Akusuhi ni ndhawu ya ku nghena hi yona a ku namarhetiwe mapulangu+ ku sukela hansi ku ya fika ka majanela; majanela a ma mbhonyiwa.
17 Ku pimiwe ahenhla ka ndhawu ya ku nghena hi yona ni le phakati ka tempele ni handle ka yona ni matlhelo hinkwawu ya muru.
18 A ku ni swifaniso swa makerubu+ leswi nga tsaliwa ni swifaniso swa minsinya ya mintxindzu,+ axikarhi ka makerubu mambirhi a ku ni xifaniso xin’we xa nsinya wa ntxindzu naswona kerubu lin’wani ni lin’wani a li ni tinghohe* timbirhi.
19 Nghohe ya munhu a yi txuvuke xifaniso xa nsinya wa ntxindzu ka tlhelo lin’wani, kasi nghohe ya nghonyama a yi txuvuke xifaniso xa nsinya wa ntxindzu ka tlhelo lelin’wani.+ A swi tsalisiwe swoleswo ka tempele hinkwayu.
20 Ku sukela ahansi ku ya fika henhla ka ndhawu ya ku nghena hi yona a ku tsaliwe makerubu ni swifaniso swa minsinya ya mintxindzu ka khumbi la ndhawu leyi kwetsimaka.
21 Maaru ya swipfalu* swa ndhawu leyi kwetsimaka* a ma ni 4 wa matlhelo ya ku ringana.+ Aphambheni ka ndhawu ya ku kwetsima a ku li ni nchumu wa ku fana ni
22 altari ya mapulangu+ lowu a wu tlakuke 1,5 metru* wu leha kolomuyani ka metru lin’we.* A wu li ni mapilari ka tiponta naswona hansi ni le matlhelweni ka wona a wu yendliwe hi mapulangu. Se a gama a ni byela a ku: “Lowu i meza lowu nga phambheni ka Yehovha.”+
23 Ndhawu leyi kwetsimaka ya le handle a yi ni tinyanghwa timbirhi ni ndhawu ya ku kwetsima a yi ni tinyanghwa timbirhi.+
24 Tinyanghwa ta kona a ti ni swipfalu swimbirhi leswi a swi pfulekela phakati ni le handle.
25 A ku ni makerubu ni swifaniso swa nsinya wa ntxindzu leswi a swi tsaliwile ka tinyanghwa ta ndhawu leyi kwetsimaka, swa ku fana ni leswi nga tsaliwa ka makhumbi.+ Naswona a ku ni ndhawu leyi nga fuleliwa hi mapulangu aphambheni ka vharanda leli nga handle.
26 A ku ni majanela lawa ma nga ni maaru ya ku lala+ ni swifaniso swa nsinya wa ntxindzu ka matlhelo hamambirhi ya vharanda ni ka makwartu ya le matlhelweni ya tempele ni ka ndhawu leyi nga fuleliwa.
Tinhlamunselu ta le hansi
^ Hi Xiheberu: “atempeleni”. Ka ndzima 41 na 42 rito leli li kombetela ka ndhawu ya ku kwetsima ya le handle (Ndhawu Ya Ku Kwetsima) kumbe ka ndhawu hinkwayu ya ku kwetsima (tempele ku patsa ni Ndhawu Ya Ku Kwetsima ni Ndhawu Ya Ku Kwetsima Hintamu).
^ Hi Xiheberu: “6 wa swisungunu”. Vona Xiyengetelo B14.
^ Hi Xiheberu: “10 wa swisungunu”.
^ Hi Xiheberu: “5 wa swisungunu”.
^ Hi Xiheberu: “40 wa swisungunu”.
^ Hi Xiheberu: “20 wa swisungunu.”
^ Ku nga ndhawu ya ku kwetsima ya le ndzeni kumbe Ndhawu Ya Ku Kwetsima Hintamu.
^ Hi Xiheberu: “swisungunu swimbirhi”.
^ Hi Xiheberu: “7 wa swisungunu.”
^ Hi Xiheberu: “4 wa swisungunu.”
^ Swi tikomba ku kombeteliwa ka swikada leswi rhendzelekaka.
^ Kumbe: “xitubu; plataforma”.
^ Ku kombeteliwa ka ndhawu ya ku famba ka yona tlhelweni ka tempele.
^ Kumbe: “dzongeni.”
^ Kumbe: “n’walungu”.
^ Hi Xiheberu: “100 wa swisungunu.”
^ Ku nga yindlo leyi nga wupeladlambu ka yindlo ya ku kwetsima.
^ Vona Ntlhamuselo.
^ Kumbe: “makara”.
^ Hi Xiheberu: “swi tikomba ku kombeteliwa ka ndhawu ya ku nghena hi yona ka Ndhawu Ya Ku Kwetsima”.
^ Swi tikomba na ku kombeteliwa ka Ndhawu Ya Ku Kwetsima Hintamu.
^ Hi Xiheberu: “swisungunu swinharhu”.
^ Hi Xiheberu: “swisungunu swimbirhi.”
