Ezekiyele 45:1-25
45 “‘Loko mi yava tiko swaku li va tshomba,+ mi fanele mi nyika Yehovha ndhawu yin’wani ya tiko swaku yi va ndhawu ya ku kwetsima.+ Yi fanele yi leha 13 wa makilometru,* yi yanama 5,2 wa makilometru.*+ Ndhawu yoleyo hinkwayu yi ta va ndhawu ya ku kwetsima.
2 Phakati ka ndhawu yoleyo ku ta va ni ndhawu ya ku kwetsima leyi nga ni 4 wa matlhelo ya ku ringana, lani tlhelo ha lin’we li nga ta va ni 259 wa mametru*+ naswona yi ta va ni ndhawu ya ku lusela ka yona swifuyu leyi nga leha 25,9 wa mametru* ka matlhelo hinkwawu ya 4.+
3 Ka mpimu lowu mi fanele mi pima ndhawu leyi nga leha 13 wa makilometru yi yanama 5,2 wa makilometru naswona phakati ka yona ku ta va ni ndhawu leyi kwetsimaka, ku nga nchumu wa ku kwetsima ngopfu.
4 Yi ta va ndhawu ya ku kwetsima ya vaprista atikweni,+ lava va tirhaka ka ndhawu leyi kwetsimaka, lava tshinelaka swaku va tirhela Yehovha.+ Yi ta va ndhawu ya tiyindlo ta vona ni ndhawu leyi kwetsimaka ya tempele.
5 “‘Se a Valevhi lava tirhaka tempeleni va ta va ni ndhawu leyi nga leha 13 wa makilometru, yi yanama 5,2 wa makilometru+ naswona va ta va ni 20 wa masala ya ku dlela ka wona.+
6 “‘Doropa mi fanele mi li nyika ndhawu leyi nga leha 13 wa makilometru (leyi ringanaka ni munyikelo wa ku kwetsima) naswona na yi yaname 2,6 wa makilometru.*+ Yi ta va ya vanhu hinkwavu va Israyele.
7 “‘Ndhawu ya murhangeli yi ta va ka matlhelo hamambirhi ya munyikelo wa ku kwetsima ni ka ndhawu leyi nga nyikiwa doropa. Yi ta va tlhelweni ka ndhawu leyi nga munyikelo wa ku kwetsima ni ka ndhawu leyi nga nyikiwa doropa. Yi ta va hi ka tlhelo la wupeladlambu ni la le wuxeni. Ku leha ka ndhawu leyi loko u sukela lomu doropa li tsemaka hi kona hi tlhelo la wupeladlambu ku ya fika lomu doropa li tsemaka hi kona hi ka tlhelo la le wuxeni ku ta ringana ni yin’wani ya tindhawu leti nga yaveliwa tinxaka letin’wani.+
8 Ndhawu leyi yi ta va ya yena murhangeli aIsrayele. Varhangeli va mina a va nge he va khomi hi ndlela ya ku biha vanhu va mina+ naswona va ta nyika vanhu va Israyele ndhawu hi ku ya hi tinxaka ta vona.’+
9 “Yehovha Hosi Leyikulu a li: ‘Mi djohile swa xega, n’wina varhangeli va Israyele!’
“‘Tshikani tinyimpi ni ku karhata vanhu, mi yendla swaswinene.+ Tshikani ku teketela tindhawu ta vanhu va mina,’+ ku vula Yehovha Hosi Leyikulu.
10 ‘Mi fanele mi tirhisa mabalansa* lama pimaka kahle, mi pima mpimu lowu nga wona wa efa* ni mpimu lowu nga wona wa bati.*+
11 Ku fanele ku va ni mpimu wa ku kala wu nga txintxatxintxi wa efa ni wa bati. 10 wa tibati ti ringana ni homere* lin’we ni 10 wa tiefa ti ringana ni homere lin’we. Ku fanele ku tirhisiwa homere swaku ku pimiwa hi lona.
12 A xikele*+ yi fanele yi ringana ni 20 wa tigera.* A 20 wa tixikele loko ti tlhanganisiwa ni 25 wa tixikele ti tlhela ti tlhanganisiwa ni 15 wa tixikele ti ta ringana ni mane* yin’we leyi mi yi tirhisaka.’
13 “‘Lowu i munyikelo lowu mi faneleke mi wu humesa: Ka 160 wa makilu* ya trigu mi fanele mi nyikela makilu manharhu,* ka 130 wa makilu* ya maxalani* mi fanele mi nyikela makilu mambirhi.*
14 Mpimu wa mafurha wu fanele wu pimiwa hi tibati. 10 wa tibati ti ringana ni koro* yin’we naswona 10 wa tibati i homere lin’we, hikusa 10 wa tibati ti ringana ni homere.
15 Ka ntlhambi wa tinyempfu ta Israyele, ku fanele ku tekiwa nyempfu yin’we ka 200 wa tona swaku yi va gandzelo. Magandzelo lawa ma ta va ya gandzelo la swakudla,+ gandzelo la ku hisiwa+ ni magandzelo ya ku kombela ku rhula+ leswaku mi kombelela vanhu ku rivaleliwa,’+ ku vula Yehovha Hosi Leyikulu.
16 “‘Vanhu hinkwavu va tiko va ta nyikela hi swilo leswi+ ka murhangeli wa Israyele.
17 Kambe murhangeli hi yena a nga ta nyikela gandzelo la ku hisiwa,+ gandzelo la swakudla,+ ni gandzelo la vhinyu hi nkama wa mafexta,+ hi nkama wa ku huma ka n’weti, hi nkama wa Tisavata+ ni hi minkama ya mafexta hinkwawu ya vanhu va Israyele.+ Hi yena a nga ta nyikela gandzelo la xidjoho, gandzelo la swakudla, gandzelo la ku hisiwa ni magandzelo ya ku kombela ku rhula leswaku a kombelela vanhu va Israyele ku rivaleliwa.’
18 “Yehovha Hosi Leyikulu a li: ‘Hi wheti ya ku sungula, hi siku la ku sungula la wheti, u fanele u teka xihon’wani xa ku hanya kahle kutani u basisa ndhawu leyi kwetsimaka ka xidjoho.+
19 Muprista a ta teka ngati yin’wani ya gandzelo la xidjoho, a yi tota ka aru la xipfalu xa tempele,+ ka 4 wa tiponta ta nchumu* lexi nga matlhelweni ka altari ni ka aru la xipfalu xa nyanghwa wa kintari* wa vaprista.
20 Leswo hi leswi u nga ta swi yendla hi siku la wu 7 la wheti loko munhu a djoha hi ku phazama kumbe na a nga swi vonanga;+ naswona u fanele u kombelela tempele ku rivaleliwa.+
21 “‘Hi wheti ya ku sungula, hi siku la wu 14 la wheti, mi ta yendla fexta la Paxkwa.+ Ku fanele ku dliwa pawu la ku kala li nga na fermentu ku ringana 7 wa masiku.+
22 Hi siku lolelo, murhangeli a ta nyikela hi xihon’wani swaku xi va gandzelo la xidjoho xa yena n’winyi ni xa vanhu hinkwavu atikweni.+
23 Ka 7 wa masiku ya fexta murhangeli a ta nyikela 7 wa swihon’wani leswi nga hanya kahle ni 7 wa tinyempfu leti nga hanya kahle swaku swi va gandzelo la ku hisiwa ka Yehovha siku ni siku anze ku hela 7 wa masiku+ naswona a ta tlhela a nyikela ni hi xiphongo swaku xi va gandzelo la xidjoho siku lin’wani ni lin’wani.
24 A fanele a tlhela a nyikela hi 11 wa makilu* ya mpupu ka xihon’wani xin’wani ni xin’wani ni 11 wa makilu ya mpupu ka nyempfu yin’wani ni yin’wani swaku swi va gandzelo la swakudla, ni malitru manharhu ni hafu* ya mafurha ka mpimu wun’wani ni wun’wani wa 11 wa makilu ya mpupu.
25 “‘Hi wheti ya wu 7, hi siku la wu 15 la wheti, a fanele a humesa swa ku fana ka gandzelo la xidjoho, ka gandzelo la ku hisiwa, ka gandzelo la swakudla ni mafurha ku ringana 7 wa masiku hi nkama wa fexta.’”+
Tinhlamunselu ta le hansi
^ Hi Xiheberu: “25.000 wa swisungunu”. Vona Xiyengetelo B14.
^ Hi Xiheberu: “10.000 wa swisungunu.”
^ Hi Xiheberu: “500 wa swisungunu”.
^ Hi Xiheberu: “50 wa swisungunu”.
^ Hi Xiheberu: “5.000 wa swisungunu.”
^ Kumbe: “swikalu”.
^ Vona Xiyengetelo B14.
^ Vona Xiyengetelo B14.
^ Vona Xiyengetelo B14.
^ Kumbe: “mina”. Vona Xiyengetelo B14.
^ Vona Xiyengetelo B14.
^ Vona Xiyengetelo B14.
^ Hi Xiheberu: “homere lin’we”. Vona Xiyengetelo B14.
^ Hi Xiheberu: “1/6 ya efa”. Vona Xiyengetelo B14.
^ Kumbe: “homere lin’we”. Vona Xiyengetelo B14.
^ Kumbe: “sevhada”.
^ Hi Xiheberu: “1/6 ya efa.” Vona Xiyengetelo B14.
^ Vona Xiyengetelo B14.
^ Kumbe: “xitubu; plataforma”.
^ Vona Ntlhamuselo.
^ Hi Xiheberu: “mpimu wa efa”.
^ Hi Xiheberu: “hini yin’we”. Vona Xiyengetelo B14.
