Ezekiyele 47:1-23
47 Kutani a gama a ni tlhelisela lani ku ngheniwaka hi kona ka tempele+ naswona kolanu ni vone mati lama fambaka ma ya wuxeni na ma huma hi hansi ka ndhawu ya ku nghena hi yona ka tempele,+ hikusa a tlhelo la le phambheni ka tempele a li txuvuke awuxeni. Mati a ma famba na ma huma hi hansi ka tlhelo la xinene la tempele, hi ka tlhelo la sul* la altari.
2 Se a gama a ni humesa hi nyanghwa wa le norte,*+ a ni humesa handle a ni yisa ka nyanghwa wa le handle lowu nga txuvuka ka tlhelo la le wuxeni,+ kutani ni vona mati lama fambaka hi katsongokatsongo hi ka tlhelo la xinene.
3 Nkama wanuna lweyi a nga ya ka tlhelo la le wuxeni na a khome goda la ku pima hi lona,+ a pime 518 wa mametru* a gama a ni tsemakanyisa ka mati; mati a ma fika henhlanyana ka swirhendze swa minenge.
4 Se a tlhela a pima 518 wa mametru a gama a ni tsemakanyisa ka mati, a ma fika hi ka matsolo.
A tlhela a pima 518 wa mametru se a ni tsemakanyisa, mati a ma fika hi ka masenge.
5 Nkama a nga tlhela a pima 518 wa mametru, a ku ni nambu lowu a ni nga swi koti ku wu tsemakanya, hikusa mati ya kona a ma yentile swinene lakakuva munhu a a fanele a yendla hi ku hlambela, a ku ni nambu lowu a swi nga koteki ku wu tsemakanya hi minenge.
6 Se a ni vutisa a ku: “Indjhe u swi vonile leswi, n’wana wa munhu?”
A gama a ni fambisa ni tlhelela akusuhi ni nambu.
7 Nkama ni nga tlhela, ni vone swaku ka matlhelo hamambirhi ya kusuhi ni nambu a ku ni minsinya ya yinyingi swinene.+
8 Kutani a ni byela a ku: “Mati lawa ma famba ma ya ka ndhawu leyi nga wuxeni se ma ngirimela ma ya fika aAraba*+ ma gama ma nghena alwandle. Loko se ma nghenile alwandle,+ mati ya kona ma ta txintxa ma va ya ku nandziha.*
9 Swiharhi swa swinyingi leswi fambaka hi mintlawa swi ta kota ku hanya kun’wani ni kun’wani lomu mati ma fambaka ma ya kona. Ku ta va ni tihlampfi ta tinyingi swinene hikusa mati lawa ma ta ngirimela ma ya kolanu. Mati ya lwandle ma ta txintxa ma va ya ku nandziha* naswona swilo hinkwaswu swi ta hanya kun’wani ni kun’wani lomu mati* ya nambu lowu ma fambaka ma ya kona.
10 “Vaphasi va tihlampfi va ta nyima tlhelweni ka wona ku sukela aEni-Jedi+ ku ya fika aEni-Eglayimi, lani ku nga ta va ni ndhawu ya ku womisa maredi. Ku ta va ni tihlampfi ta tinyingi swinene ta mixakaxaka, ku fana ni tihlampfi ta le Lwandle Lalikulu.*+
11 “Kolanu ku ta va ni tindhawu leti nga ni mabyanyi ka mati ni tindhawu leti nga ni madaka, naswona tindhawu leti ti ta tshamisa swoleswo.* Ti ta tshama na ti ni munyu.+
12 “Ka matlhelo hamambirhi ya kusuhi ni nambu ku ta mila minsinya leyi psalaka mihandzu ya mixaka hinkwayu. Matluka ya yona a ma nge vuni; ni mihandzu ya yona a yi nge heli. Wheti ni wheti yi ta psala mihandzu ya nyuwani hikusa yi ta regariwa hi mati lama humaka hi ka ndhawu leyi kwetsimaka.+ Mihandzu ya yona yi ta dliwa ni matluka ya yona ma ta va ya ku hanyisa.”+
13 Yehovha Hosi Leyikulu a li: “Leyi i ndhawu leyi mi nga ta yi yavela 12 wa tinxaka ta Israyele swaku yi va tiko leli nga tshomba la tona naswona Yosefa a ta kuma tindhawu timbirhi.+
14 Yi ta va tshomba la n’wina naswona mi ta kuma tindhawu ta ku ringana. Ni fungile swaku tiko leli ni ta li nyika vavhovho va n’wina+ kutani swoswi li nyikiwa n’wina swaku li va tshomba.
15 “Lani hi lani tiko li tsemaka hi kona hi ka tlhelo la le norte: Li sukela ka Lwandle Lalikulu hi ndlela leyi yaka aEtiloni+ anze aZedadi,+
16 aAmati,+ aBerota+ ni le Sibrayimi, lani ku kumekaka axikarhi ka tiko la Damaxka ni tiko la Amati anze aAzeri-Atikoni lani ku nga kusuhi ni lani Ayurani+ ku tsemaka hi kona.
17 Kutani ndhawu leyi tiko li tsemaka hi ka yona yi ta sukela ka lwandle yi famba anze aAzari-Enani,+ yi famba yi ya fika lani tiko la Damaxka li tsemaka hi kona li kongoma ka tlhelo la le norte ni lani tiko la Amati+ li tsemaka hi kona. Leyi i ndhawu leyi tiko li nga ta tsema hi ka yona hi ka tlhelo la norte.
18 “Tlhelo la le wuxeni li sukela axikarhi ka Ayurani na Damaxka ni le Yordani axikarhi ka Jiliyadi+ ni tiko la Israyele. Mi fanele mi pima ku sukela lani tlhelo la norte li tsemaka hi kona ku ya ka lwandle la le wuxeni.* Leyi i ndhawu leyi tiko li nga ta tsema hi ka yona hi ka tlhelo la wuxeni.
19 “A lani tiko li tsemaka hi kona hi ka tlhelo la sul* li ta sukela aTamara ku ya ka mati ya Meribati-Kadexi,+ kutani li famba li ya ka Nkova* li ya fika ka Lwandle Lalikulu.+ Leyi i ndhawu leyi tiko li nga ta tsema hi ka yona hi ka tlhelo la le sul.*
20 “A Lwandle Lalikulu li le ka tlhelo la wupeladlambu, ku sukela lani tlhelo la sul li tsemaka hi kona ku ya ka ndhawu leyi nga txuvukana ni Lebo-Amati.*+ Lani hi lani tiko li tsemaka hi kona hi ka tlhelo la wupeladlambu.”
21 “Mi ta yavelana tiko leli hi ku ya hi 12 wa tinxaka ta Israyele.
22 Mi fanele mi yavelana lona swaku li va tshomba mi tlhela mi yavela vanhu lava taka hi ka matiko man’wani lava tshamaka na n’wina lava nga va ni vana na va ha tshama na n’wina; naswona va ta fana ni Vayisrayele ka n’wina. Va ta kuma tshomba xikarhi ka tinxaka ta Israyele xikan’we na n’wina.
23 Munhu lweyi a taka hi ka tiko lin’wani mi fanele mi mu nyika tshomba ka muganga wa lixaka leli a tshamaka ka lona,” ku vula Yehovha Hosi Leyikulu.
Tinhlamunselu ta le hansi
^ Kumbe: “adzongeni”.
^ Kumbe: “n’walungu”.
^ Hi Xiheberu: “1.000 wa swisungunu”. Lani ku vulavuliwa hi swisungunu swa ku leha. Vona Xiyengetelo B14.
^ Hi Xiheberu: “ma ta hanyisiwa.”
^ Kumbe: “ndhawu leyi kalaka yi nga na nchumu amananga”.
^ Hi Xiheberu: “ma ta hanyisiwa”.
^ Hi Xiheberu: “minambu yimbirhi”.
^ Ku nga Lwandle Lalikulu la Mediteraniyu.
^ Hi Xiheberu: “a ti nge hanyisiwi.”
^ Ku nga Lwandle la Ku Fa.
^ Hi Xiheberu: “tlhelo la le sul hi le sul”.
^ Ku nga Nkova wa Gibita.
^ Hi Xiheberu: “tlhelo la le sul hi le sul.”
^ Kumbe: “nyanghwa wa Amati.”
