Ezekiyele 48:1-35
48 “Lawa i mavito ya tinxaka a ku sukela magamu ya le norte:* Ndhawu ya Dani+ yi famba hi tlhelweni ka ndlela ya le Etiloni anze aLebo-Amati*+ ku ya fika Azari-Enani, atlhelweni ka ndhawu leyi tiko la Damaxka li tsemaka hi kona hi ka tlhelo la norte, atlhelweni ka Amati;+ naswona yi sukela lani tlhelo la le wuxeni li tsemaka hi kona yi ya fika lani tlhelo la le wupeladlambu li tsemaka hi kona.
2 Ndhawu ya Aseri+ yi sukela lani ndhawu ya Dani yi gamaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
3 Ndhawu ya Naftali+ yi sukela lani ndhawu ya Aseri yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
4 Ndhawu ya Manasi+ yi sukela lani ndhawu ya Naftali yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
5 Ndhawu ya Efrayimi yi sukela lani ndhawu ya Manasi+ yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
6 Ndhawu ya Rubeni yi sukela lani ndhawu ya Efrayimi+ yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
7 Ndhawu ya Yuda yi sukela lani ndhawu ya Rubeni+ yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
8 Lani ndhawu ya Yuda yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona, mi fanele mi nyikela ndhawu leyi nga yanama 13 wa makilometru*+ naswona ku leha ka yona ku fanele ku ringana ni tindhawu ta tinxaka letin’wani, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona. Ndhawu leyi kwetsimaka yi ta va xikarhi ka ndhawu yoleyo.
9 “Munyikelo lowu mi nga ta wu nyikela ka Yehovha wu fanele wu leha 13 wa makilometru wu yanama 5,2 wa makilometru.*
10 Lowu wu ta va munyikelo wa ku kwetsima wa vaprista.+ Wu ta va wa 13 wa makilometru ka tlhelo la le norte, wu va wa 5,2 wa makilometru ka tlhelo la wupeladlambu, wu va 5,2 wa makilometru ka tlhelo la wuxeni naswona wu va wa 13 wa makilometru ka tlhelo la sul.* Ndhawu ya Yehovha leyi kwetsimaka yi ta va xikarhi ka ndhawu yoleyo.
11 Wu ta va wa vaprista lava nga langiwa ka vana va Zadoki,+ lava nga ni tirhela naswona va kalaka va nga ni tshikanga nkama Vayisrayele ni Valevhi va nga ni tshika.+
12 Va ta kuma ndhawu leyi nga ya munyikelo ka munyikelo wa tiko lowu nga nchumu wa ku kwetsima ngopfu, lani ndhawu ya Valevhi yi tsemaka hi kona.
13 “Kolanu tlhelweni ka ndhawu ya vaprista, Valevhi va ta va ni ndhawu leyi nga leha 13 wa makilometru yi yanama 5,2 wa makilometru. (Ndhawu hinkwayu yi ta va na yi lehe 13 wa makilometru yi yanama 5,2 wa makilometru.)
14 A va fanelanga va xavisa, va txintxisa kumbe va nyika munhu mun’wani ndhawu yayinene hintamu ka ndhawu leyi, hikusa i nchumu wa ku kwetsima ka Yehovha.
15 “Ndhawu leyi nga sala leyi nga yanama 2,6 wa makilometru* yi leha 13 wa makilometru yi ta tirhiseliwa ku yendla swilo leswi tolovelaka ku yendliwa adoropeni;+ ku ta yakiwa ka yona yi tlhela yi va ndhawu ya ku dlisa ka yona swifuyu. Doropa li ta va xikarhi ka yona.+
16 Leyi i mimpimu ya doropa: Lani doropa li tsemaka hi kona hi ka tlhelo la norte ku ta va 2,3 wa makilometru,* hi ka tlhelo la sul ku ta va 2,3 wa makilometru, hi ka tlhelo la wuxeni ku ta va 2,3 wa makilometru naswona hi ka tlhelo la le wupeladlambu ku ta va 2,3 wa makilometru.
17 Ndhawu ya ku lusa swifuyu ka doropa yi ta va ni 130 wa mametru* ku ya norte, 130 wa mametru ku ya sul, 130 wa mametru ku ya wuxeni ni 130 wa mametru ku ya wupeladlambu.
18 “Ndhawu leyi nga sala yi ta ringana ni munyikelo wa ku kwetsima hi ku leha,+ yi ta va 5,2 wa makilometru ku ya wuxeni ni 5,2 wa makilometru ku ya wupeladlambu. Yi ta ringana ni munyikelo wa ku kwetsima funtshi leswi nga ta tshoveliwa ka yona swi ta dliwa hi lava tirhaka doropeni.
19 Lava tirhaka doropeni lava taka hi ka tinxaka hinkwatu ta Israyele hi vona va nga ta rima ndhawu leyi.+
20 “Matlhelo hinkwawu ya munyikelo i 13 wa makilometru. Mi fanele mi wu nyikela swaku wu va munyikelo wa ku kwetsima ku patsa ni ndhawu leyi nga nyikiwa doropa.
21 “Ndhawu leyi nga ta sala ka matlhelo hamambirhi ya munyikelo wa ku kwetsima ni ndhawu leyi nga nyikiwa doropa yi ta va ya murhangeli.+ Yi ta va tlhelweni ka lomu ti tsemaka hi kona tindhawu leti nga le wuxeni ni le wupeladlambu leti nga nyikeliwa, leti nga ni 13 wa makilometru. Yi ta ringana ni tindhawu leti nga kusuhi naswona yi ta va ya murhangeli. Munyikelo wa ku kwetsima ni ndhawu leyi kwetsimaka ya tempele swi ta va xikarhi ka yona.
22 “Ndhawu ya Valevhi ni ndhawu leyi nga nyikiwa doropa swi ta va xikarhi ka ndhawu leyi nga ya murhangeli. Ndhawu ya murhangeli yi ta va xikarhi ka lomu ndhawu ya Yuda+ yi tsemaka hi kona ni lomu ndhawu ya Benjamini yi tsemaka hi kona.
23 “Loko swi ta ka tinxaka letin’wani hinkwatu, ndhawu ya Benjamini yi ta sukela lani tlhelo la le wuxeni li tsemaka hi kona yi ya fika lani tlhelo la wupeladlambu li tsemaka hi kona.+
24 Ndhawu ya Simiyoni yi sukela lani ndhawu ya Benjamini+ yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
25 Ndhawu ya Isakara+ yi sukela lani ndhawu ya Simiyoni yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
26 Ndhawu ya Zebuloni yi sukela lani ndhawu ya Isakara+ yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.+
27 Ndhawu ya Gadi yi sukela lani ndhawu ya Zebuloni+ yi gamelaka kona, ku sukela lani tlhelo la le wuxeni li tsemaka hi kona anze lomu tlhelo la wupeladlambu li tsemaka hi kona.
28 Lani tlhelo la sul li tsemaka hi kona leli nga tlhelweni ka lani ndhawu ya Gadi yi tsemaka hi kona, li ta sukela aTamara+ li ya ka mati ya Meribati-Kadexi,+ ku ya fika ka Nkova*+ ni ku ya fika ka Lwandle Lalikulu.*
29 “Leli i tiko leli mi faneleke mi li yavela tinxaka ta Israyele+ swaku li va tshomba+ naswona tindhawu ta lona ti ta va ta vona,” ku vula Yehovha Hosi Leyikulu.
30 “Leti ku ta va tindhawu ta ku huma hi tona ka doropa: Tlhelo la le norte li ta va ni 2,3 wa makilometru.+
31 “Tinyanghwa ta doropa ti ta chuliwa mavito hi ku ya hi tinxaka ta Israyele. Ka tinyanghwa tinharhu ta norte, ku ni nyanghwa wun’we wa Rubeni, nyanghwa wun’we wa Yuda ni nyanghwa wun’we wa Levhi.
32 “Tlhelo la le wuxeni li ta va na li lehe 2,3 wa malikometru naswona ku ni tinyanghwa tinharhu: Nyanghwa wun’we wa Yosefa, nyanghwa wun’we wa Benjamini ni nyanghwa wun’we wa Dani.
33 “Tlhelo la le sul li ta va ni 2,3 wa makilometru naswona li ta va ni tinyanghwa tinharhu: Nyanghwa wun’we wa Simiyoni, nyanghwa wun’we wa Isakara ni nyanghwa wun’we wa Zebuloni.
34 “Tlhelo la le wupeladlambu li ta va na li lehe 2,3 wa makilometru naswona li ta va ni tinyanghwa tinharhu: Nyanghwa wun’we wa Gadi, nyanghwa wun’we wa Aseri ni nyanghwa wun’we wa Naftali.
35 “Mpfhuka lowu nga kona ka matlhelo hinkwawu ya doropa wu ta va wa 9,3 wa makilometru.* Kutani vito la doropa lolelo ku sukela hi siku lolelo ku ya phambheni li ta va: Yehovha A Kolanu.”+
Tinhlamunselu ta le hansi
^ Kumbe: “ka nyanghwa wa Amati”.
^ Kumbe: “n’walungu.”
^ Hi Xiheberu: “25.000 wa swisungunu”. Lani ku vulavuliwa hi swisungunu swa ku leha. Vona Xiyengetelo B14.
^ Hi Xiheberu: “10.000 wa swisungunu.”
^ Kumbe: “dzongeni.”
^ Hi Xiheberu: “5.000 wa swisungunu”.
^ Hi Xiheberu: “4.500 wa swisungunu”. Vona Xiyengetelo B14.
^ Hi Xiheberu: “250 wa swisungunu”.
^ Ku nga Nkova wa Gibita.
^ Ku nga Lwandle Lalikulu la Mediteraniyu.
^ Hi Xiheberu: “18.000 wa swisungunu.”
