Ezekiyele 5:1-17
5 “Wena n’wana wa munhu, teka xipada u xi tirhisa ku fana ni xisingwani xa munhu lweyi a tsemetaka misisi. Tsemeta nhloko ni malepfu ya wena u gama u teka misisi ya kona u yi peza hi balansa,* u yi yava yi va mintlawa yinharhu.
2 Ntlawa wun’we u ta wu hisa hi ndzilu ndzeni ka doropa loko masiku ya ku li rhendzela se ma helile.+ U ta gama u teka ntlawa lowun’wani u wu tsemelela hi xipada ka doropa hinkwalu+ naswona ntlawa lowun’wani wa wugamu u ta wu tshika wu haha ni moya, kutani ni ta tlomula xipada leswaku ni va txatxa.+
3 “U fanele u tlhela u teka misisi yayitsongo u yi phutsela hi mpahla ya wena.
4 Teka misisi yin’wani u yi hoxa ka ndzilu u yi hisa. Ndzilu wolowo wu ta hisa yindlo hinkwayu ya Israyele.+
5 “Yehovha Hosi Leyikulu a li: ‘Lweyi i Yerusalema. Ni mu veke xikarhi ka matiko hinkwawu lawa ma nga matlhelweni ka yena.
6 Kambe a yale ku yingisa swiboho swa mina swa ku yavanyisa ni minawu ya mina, a yendle swilo swa ku biha hintamu ku tlula ni matiko hinkwawu lawa ma nga kusuhi na yena.+ A yale swiboho swa mina swa ku yavanyisa naswona a nga yi yingisanga minawu ya mina.’
7 “Kutani Yehovha Hosi Leyikulu a li: ‘Leswi mi nga yendla swilo swa ku biha hintamu ku tlula ni matiko hinkwawu lawa ma nga kusuhi na n’wina naswona mi kalaka mi nga yingisanga minawu ya mina kumbe swiboho swa mina swa ku yavanyisa, kambe mi nga yingisa swiboho swa ku yavanyisa swa matiko hinkwawu lawa ma nga kusuhi na n’wina,+
8 Yehovha Hosi Leyikulu a li: “Wena doropa la Yerusalema,+ ni nala wa wena. Ni ta ku yavanyisa na u voniwa hi matiko lawa ma nga kusuhi na wena.+
9 Ni ta ku yendla leswi ni kalaka ni nga se tshama ni swi yendla naswona a ni nge he tlheli ni swi yendla, hi mhaka ya mintirho ya wena hinkwayu ya ku nyenyentsa.+
10 “‘“Vapapayi lava nga xikarhi ka n’wina va ta dla vana va vona+ ni vana va ta dla vapapayi va vona, kutani ni ta mi yavanyisa ni mi hangalasa ka tindhawu hinkwatu.”’+
11 “‘Kutani leswi ni hanyaka,’ ku vula Yehovha Hosi Leyikulu, ‘leswi mi nga chakisa ndhawu ya mina leyi kwetsimaka hi swifaniso swa n’wina hinkwaswu swa ku nyenyentsa leswi mi swi gandzelaka ni mintirho ya n’wina hinkwayu ya ku nyenyentsa,+ na mina ni ta mi tsukula;* a ni nga ha ta mi twela wusiwana naswona a ni nga ha ta mi tsetselela.+
12 Ntlawa wun’wani wa vanhu lava tshamaka doropeni wu ta dlayiwa hi ntungu* kumbe wu fa hi ndlala. Ntlawa wun’wanyani wu ta dlayiwa hi xipada.+ Lava nga sala ni ta va hangalasa ka matlhelo hinkwawu naswona ni ta tlomula xipada swaku ni va txatxa.+
13 Se a ni nga ha ta va kwatela hikusa ni ta va se ni yendlile leswi a ni swi lava.+ Kutani nkama ni nga ta tshika ku va kwatela, va ta swi tiva swaku mina Yehovha, ni ze ni vulavula hi mhaka ya leswi ni lavaka swaku ku gandzeliwa mina ntsena.+
14 “‘Ni ta yendla swaku u va ndhawu ya ku wonhekela naswona matiko lawa ma nga kusuhi na wena ni lava hundzaka hi ndlela va ta ku rhuketela.+
15 U ta rhuketeliwa u tlhela u poyiliwa,+ naswona u ta va xikombiso naswona u ta chaviwa hi matiko lawa u nga kusuhi na wona nkama ni nga ta ku yavanyisa na ni kwatile ni tlhela ni ku khatisa hi ndlela ya ku vava. Hi mina Yehovha ni nga swi vula.
16 “‘Ni ta mi vangela ndlala leyi nga ta mi dlaya ku fana ni mimpaxwa* leyi dlayaka. Mimpaxwa leyi ni nga ta yi rhumela yi ta mi dlaya.+ Ni ta yendla swaku ndlala ya kona yi va yikulu hi ku yendla swaku mi nga kumi swakudla.+
17 Ni ta mi vangela ndlala ni mi rhumela ni swiharhi swa khwati leswi nga ni nghozi,+ swi ta mi dlayela vana. Ku ta va ni ntungu naswona ku ta halatiwa ngati ya yinyingi, kutani ni ta mi hlasela hi xipada.+ Hi mina Yehovha ni nga swi vula.’”
Tinhlamunselu ta le hansi
^ Kumbe: “xikalu”.
^ Kumbe: “pumba.”
^ Kumbe: “mavabyi”.
^ Kumbe: “maflexa lawa ma”.
