Ezekiyele 6:1-14
6 Yehovha a tlhela a vulavula na mina a ku:
2 “N’wana wa munhu, txuvuka ka tintshava ta Israyele u profeta hi leswi nga ta ti humelela.
3 U fanele u ku: ‘N’wina tintshava ta Israyele, twanani leswi Yehovha Hosi Leyikulu a swi vulaka: Yehovha Hosi Leyikulu a byela tintshava, maganga, swinambyani ni minkova a ku: “Phela ni ta lwa na n’wina hi xipada naswona ni ta helisa tindhawu ta n’wina ta ku tlakuka.
4 Maaltari ya n’wina ma ta fayeteliwa, minchumu ya n’wina ya ku tlhateka ka yona swinun’hwelisu* yi ta tshoviwa+ naswona vanhu va n’wina lava nga dlayiwa ni ta va txukumeta phambheni ka swikwembu swa n’wina swa ku nyenyentsa.*+
5 Ni ta txukumeta mintsumbu ya Vayisrayele phambheni ka swikwembu swa vona swa ku nyenyentsa naswona ni ta hangalasa marhambu ya n’wina ka matlhelo hinkwawu ya maaltari ya n’wina.+
6 Ka tindhawu hinkwatu leti mi tshamaka ka tona, madoropa ma ta helisiwa+ ni tindhawu ta ku tlakuka ti ta dilizeliwa ti sala na ti hohlokile.*+ Maaltari ma ta dilizeliwa ma hahluleliwa, swikwembu swa n’wina swa ku nyenyentsa swi ta helisiwa, minchumu ya n’wina ya ku tlhateka ka yona swinun’hwelisu* yi ta wiseteliwa ni leswi mi nga swi yendla swi ta helisiwa.
7 Van’wani va ta dlayiwa xikarhi ka n’wina,+ kutani mi ta swi tiva swaku hi mina Yehovha.+
8 “‘“Kambe van’wani va n’wina ni ta va siya va hanya, hikusa van’wani va n’wina va ta pona ku dlayiwa hi xipada xikarhi ka matiko, nkama mi nga ta hangalaseliwa ka matiko man’wani.+
9 Lava nga ta pona va ta ni khumbuka na va li ka matiko lawa va nga yisiwa wukaraweni ka wona.+ Va ta swi vona swaku a ni twe ku vava swinene hi mhaka ya leswi va kalaka va nga tshembekanga* ka mina+ ni hi mhaka ya leswi matihlo ya vona ma nga navela swikwembu swa vona swa ku nyenyentsa.+ Va ta dana va tlhela va nyenya swilo hinkwaswu swa ku biha ni swa ku nyenyentsa leswi va nga swi yendla.+
10 Va ta swi tiva swaku hi mina Yehovha ni swaku a ni tiyisile nkama ni nga hlaya swaku ni ta va tisela khombo leli.”’+
11 “Yehovha Hosi Leyikulu a li: ‘Bani mavoko* u tlhela u ba hansi hi nenge u rila hi mhaka ya swilo hinkwaswu swa ku biha ni swa ku nyenyentsa leswi nga yendliwa hi Vayisrayele, hikusa va ta dlayiwa hi xipada, hi ndlala ni hi ntungu.+
12 Lweyi a nga ta va na a li kule a ta dlayiwa hi ntungu, lweyi a nga ta va na a li kusuhi a ta dlayiwa hi xipada, kasi lweyi a nga ta pona swilo leswi a ta dlayiwa hi ndlala; ni ta chulula ku kwata ka mina hinkwaku henhla ka vona.+
13 U ta swi tiva swaku hi mina Yehovha,+ nkama lowu vanhu va vona lava nga dlayiwa va nga ta txukumetiwa xikarhi ka swikwembu swa vona swa ku nyenyentsa, akusuhi ni maaltari ya vona,+ ka maganga hinkwawu ya ku tlakuka, ahenhla ka tintshava hinkwatu, ahansi ka nsinya wun’wani ni wun’wani wawukulu ni le hansi ka tigadja ta minsinya yayikulu lomu va nga yendla magandzelo ya ku nun’hwela kona swaku va tsakisa swikwembu swa vona hinkwaswu swa ku nyenyentsa.+
14 Ni ta tlakusa voko la mina ni va khatisa kutani ni yendla swaku tiko la vona li hohlokela naswona tindhawu ta vona hinkwatu leti va tshamaka ka tona ti ta hohlokela ti nga ha tshami munhu ti tlula ni mananga lama nga kusuhi ni le Dibla. Va ta swi tiva swaku hi mina Yehovha.’”
Tinhlamunselu ta le hansi
^ Vona Ntlhamuselo.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Kumbe: “na ti li rhumbi.”
^ Vona Ntlhamuselo.
^ Kumbe: “va nga tikhoma hi ndlela ya ku biha”.
^ Marito lawa ma byeliwa Ezekiyele.
