Ezekiyele 9:1-11
9 Se a huwelela ka tindleve ta mina hi rito lalikulu, a ku: “Vitana lava nga ta khatisa doropa, mun’wani ni mun’wani na a khome nchumu xa ku dlaya hi xona ka voko la yena!”
2 Ni vona 6 wa vavanuna lava a va huma hi tlhelweni ka nyanghwa wa le henhla+ lowu nga txuvukana ni norte,* mun’wani ni mun’wani na a khome nchumu xa ku pfotlosa hi xona; naswona a ku ni wanuna mun’wani xikarhi ka vona lweyi a a yambale mpahla ya ku yendliwa hi panu, a a ni limhondzo* la ku chela ka lona tinta la sekretariyu* ka masenge ya yena; se va nghena va fika va nyima tlhelweni ka altari ya kobre.+
3 Kutani ku phatima ka Xikwembu xa Israyele+ ku suka henhla ka makerubu ku ya ka nyanghwa wa yindlo,+ se Xikwembu xi tlakusa rito xi sungula ku vulavula ni wanuna lweyi a a yambale mpahla ya ku yendliwa hi panu, lweyi a a ni limhondzo la ku chela ka lona tinta la sekretariyu ka masenge ya yena.
4 Yehovha a mu byela a ku: “Famba doropeni, ka tiko hinkwalu la Yerusalema, u markara swimombo swa vanhu lava nga ni nhlomulu ni lava konyaka+ hi mhaka ya swilo hinkwaswu swa ku nyenyentsa leswi yendliwaka adoropeni.”+
5 A gama a byela lavan’wani na ni swi twa a ku: “Mu landzeleni mi ya doropeni mi fika mi dlaya vanhu. Mi nga va tweli wusiwana naswona mi nga va tsetseleli.+
6 Mi fanele mi dlaya lava nga guga, madjaha, tintombhi, swivanani ni vavasati.+ Kambe munhu mun’wani ni mun’wani lweyi a nga ni marka mi nga mu dlayi.+ Mi fanele mi sungula hi ka ndhawu ya mina leyi kwetsimaka.”+ Se va sungula hi madoda lawa a ma li phambheni ka yindlo.+
7 A gama a va byela a ku: “Chakisani yindlo mi tata mikintari* hi vanhu lava nga dlayiwa.+ Fambani!” Kutani va famba va ya dlayetela vanhu adoropeni.
8 Nkama na va va dlayetela, ni sale na ni li noxe ni gama ni khizama nghohe* ya mina yi txuvuka hansi, ni huwelela ni ku: “Yehovha Hosi Leyikulu! U ta dlaya Vayisrayele hinkwavu lava nga sala na wu chulula ku kwata ka wena henhla ka Yerusalema?”+
9 Kutani a ni byela a ku: “Xihoxo xa vanhu va Israyele ni va Yuda i xikulu ngopfu.+ Tiko li tale hi ku halata ngati+ naswona doropa li tale hi wukanganyisi.+ Hikusa va li: ‘Yehovha a li tshikile tiko leli funtshi Yehovha a nga voni nchumu.’+
10 Kambe a ni nga ta va twela wusiwana naswona a ni nga ta va tsetselela.+ Ni ta va khoma hi ku ya hi mintirho ya vona.”
11 Se ni vona wanuna lweyi a nga yambala mpahla ya ku yendliwa hi panu, lweyi a a ni limhondzo la ku chela ka lona tinta ka masenge ya yena, a fika a ku: “Ni yendle hinkwaswu leswi u nga ni rhuma swona.”
Tinhlamunselu ta le hansi
^ Kumbe: “n’walungu”.
^ Kumbe: “nchumu xa ku chela tinta ya sekretariyu”.
^ Kumbe: “matsalana; mabalani”.
^ Vona Ntlhamuselo.
^ Kumbe: “kara la”.
