Filimoni 1:1-25
1 Mina Pawulo, ni nga djele+ hi mhaka ya Kreste Yesu, na makwerhu Timotiya;+ ni tsalela Filimoni lweyi a tirhaka na hina naswona hi mu rhandzaka,
2 na Afiya makwerhu wa xisati, na Arkipo+ lweyi a nga sonchwa la Kreste ku fana na hina, ni bandla leli tlhanganaka kaya ka wena:+
3 Ni mi navelela timpsalu tatikulu ni ku rhula loku taka hi ka Xikwembu Papayi wa hina ni le ka Hosi Yesu Kreste.
4 Minkama hinkwayu ni khensa Xikwembu xa mina loko ni vulavula hi wena ka swikhongelo swa mina,+
5 hileswi ni tamaka ni twa hi ta lipfumelo la wena ni ndlela leyi u rhandzaka Hosi Yesu ni vakwetsimi hinkwavu hi yona.
6 Ni khongelela swaku lipfumelo leli wena ni vapfumeli van’wani mi nga na lona li nga ku pfuna ku vona minkateko hinkwayu leyi hi nga na yona hi mhaka ya Kreste.
7 Kutani ni tsake ngopfu ni ku thoveka mbilu loko ni twa hi ta lirhandzu la wena, hikusa timbilu* ta vakwetsimi ti tiyisiwile hi mhaka ya wena makwerhu.
8 Kambe hambileswi ni nga chunseka swinene ku vulavula hi ta Kreste swaku ni ku byela leswi u faneleke u swi yendla,
9 ni vona swi li kahle ku ku kombela hi lirhandzu, hikusa mina Pawulo se ni gugile naswona swoswi ni le djele hi mhaka ya Kreste Yesu.
10 Na ku kombela hi mhaka ya n’wana wa mina Onezimu,+ lweyi ni nga va papayi+ wa yena na ni li djele.*
11 Khale a a nga pfuni nchumu ka wena, kambe swoswi a pfuna mina na wena.
12 Ni mu tlhelisela ka wena, yena lweyi ni mu rhandzaka swinene.
13 A ni ta tsakela ku tshama na yena kola swaku a ta ni tirhela ku fana ni leswi na wena a wu ta tsakela ku ni tirhelisa swona hileswi ni nga djele hi mhaka ya mahungu ya ku tsakisa.+
14 Kambe a ni lavi ku yendla nchumu na u nga ni pfumelelanga, leswaku u nga kombisi timpsalu ta wena hi ku sindzisiwa, kambe hi ku swi rhandza.+
15 Kumbexana leswo hi swona swi nga yendla swaku a suka ka wena swa nkamanyana,* a ta tlhela a va na wena hi masiku,
16 a nga ha li xikarawa+ kambe se i makwerhu wa lisima lweyi a rhandzekaka,+ ngopfungopfu ka mina, kambe ka wena a ta rhandzeka hintamu hikusa a ta va xikarawa a tlhela a va makwerhu aHosini.
17 Kutani loko ni li munghanu wa wena, mu yamukeli hi timpsalu hi ndlela leyi a wu ta ni yamukela hi yona.
18 Naswona loko a ku wonhelile kumbe a ku devha nchumu, ni ta ku hakela.
19 Mina Pawulo ni tsala hi voko la mina: Ni ta ku hakela, kambe na wena wa swi tiva swaku u ni devha ngopfu.
20 Makwerhu, ni navela swaku u nga ni pfuna hi mhaka ya Hosi; tiyisa mbilu* ya mina hi mhaka ya Kreste.
21 Na swi tiva swaku u ta ni yingisa, se ni ku tsalela hikusa na swi tiva swaku u ta yendla swa ku tlula leswi ni swi vulaka.
22 Kambe ni lulamiseli ni ndhawu leyi ni nga ta tshama ka yona, hikusa na tshemba swaku ni ta vuyisiwa ka n’wina*+ hi mhaka ya swikhongelo leswi mi swi yendlaka.
23 Wa ku rungula Epafrasi+ lweyi hi nga khomiwa xikan’we hi mhaka ya Kreste Yesu,
24 na Marka, Arixtaku,+ Demasi+ na Luka+ lava hi tirhaka xikan’we.
25 Ni navela swaku mi va ni timpsalu tatikulu ta Hosi Yesu Kreste hi mhaka ya mbilu leyi mi nga na yona.
Tinhlamunselu ta le hansi
^ Kumbe: “wunghanu lalikulu”.
^ Hi Xigriki: “ka machini.”
^ Hi Xigriki: “wora”.
^ Kumbe: “xinghanu xa xikulu”.
^ Kumbe: “chunseliwa n’wina”.
