Mahungu Ya Ku Tsakisa Ya Ku Tsaliwa Hi Luka 15:1-32
15 Hinkwavu lava a va hakelisa rhesa* ni vadjohi hinkwavu a va ta ka Yesu va ta mu yingisela.+
2 Se Vafarisi ni vatsali a va tshamela ku ngurangura va ku: “Wanuna lweyi i munghanu wa vadjohi naswona a dla na vona.”
3 Kutani a va byela xifaniso a ku:
4 “Loko mun’we ka n’wina a ni 100 wa tinyempfu, a gama a lahlekeliwa hi yin’we ya tona, indjhe a nge ti siyi leti ta 99 nhoveni, a ya lava leyi nga lahleka anze a yi kuma ke?+
5 Loko se a yi kumile, wa yi tlakula a yi pakatsa na a tsakile.
6 Se loko a fika kaya, a vitana vanghanu ni vavhizinyu va yena a ku: ‘Tsakani na mina hikusa ni kume nyempfu ya mina leyi a yi lahlekile.’+
7 Hi ku fana, ku ta tsakiwa hintamu tilweni loko mudjohi mun’we a tisola+ ku tlula lava 99 lava nga lulama naswona swi kalaka swi nga lavi swaku va tisola.
8 “I wansati muni lweyi loko a ni 10 wa tidrakma,* se a lahlekeliwa hi yin’we ntsena, a kalaka a nga tlhaviki xa ku vona hi xona, a kukula* ndlwini, a gama a yi lavetela kahle anze a yi kuma ke?
9 Se loko a yi kumile, a vitana vanghanu ni vavhizinyu va yena, a ku: ‘Tsakani na mina, hikusa ni kume drakma ya mina leyi a yi lahlekile.’
10 Hi ku fana, na mi byela: Tintsumi ta Xikwembu ta tsaka loko mudjohi mun’we a tisola.”+
11 A tlhela a ku: “A ku ni wanuna lweyi a a ni vana vambirhi va madjaha.
12 Se lweyi wa xigumandzeni a byela papayi wa yena a ku: ‘Papayi, ni nyiki tshomba la mina ka leswi u nga na swona.’ Kutani papayi wa vona a va yavela tshomba la yena.
13 Loko ku hundze masikunyana, lweyi wa xigumandzeni a longela minchumu ya yena hinkwayu a gama a famba a ya ka tiko la le kule swinene, a fika a titlonya hi tshomba la yena hi ku hanya wutomi la wuphunta.*
14 Nkama a nga heta hinkwaswu, ku ve ni ndlala ka tiko lolelo, kutani a sungula ku biwa hi ndlala.
15 A ze a tirhela munhu mun’wani wa tiko lolelo, se a mu nyika ntirho wa ku dlisa makhumba.+
16 A a navela ni ku dla swakudla swa makhumba, kambe a a nga nyikiwi nchumu.
17 “Se a sungula ku pimisa a ku: ‘Phela papayi a ni vatirhi va vanyingi lava dlaka va xurha kuve mina no fa hi ndlala!
18 Na ha tlhelela ka papayi ni fika ni ku: “Papayi, ni djohele Xikwembu* ni tlhela ni djohela wena;
19 a swa ha ni faneli ku va n’wana wa wena. Ni yendli mun’wani wa vatirhi va wena.”’
20 Kutani a tlhelela ka papayi wa yena. Loko a ha li kulenyana, papayi wa yena a mu vona a mu twela wusiwana, a gama a tsutsuma a mu tlhangaveta a fika a mu barasara, a mu bejara.*
21 Se a byela papayi wa yena a ku: ‘Papayi, ni djohele Xikwembu* ni tlhela ni djohela wena.+ A swa ha ni faneli ku va n’wana wa wena.’
22 Kambe papayi wa yena a byela vatirhi va yena a ku: ‘Hantlisani mi ta ni mpahla ya lisima ku tlula hinkwayu, mi mu yambexa; mi mu yambexa ni masandaliya mi tlhela mi mu veka aneli.
23 Tisani homu yayitsongo ya ku nona mi yi dlaya, leswaku hi dla hi tlhela hi tsaka,
24 hikusa n’wana lweyi wa mina a a file, kambe se wa hanya;+ a a lahlekile kutani a kumekile.’ Se va sungula ku tikhorisa.
25 “N’wana wa yena wa matevula a a li masin’wini, loko a vuya a fika kusuhi ni kaya, a twa swaku ko yimbeleliwa ku tlhela ku txiniwa.
26 Kutani a vitana mun’we wa vatirhi, a mu vutisa swaku ku humelela yini.
27 Se mutirhi a hlamula a ku: ‘Makwenu a vuyile, se papayi wa wena a dlaye homu yayitsongo ya ku nona, hikusa a vuye na a li kahle.’
28 A gama a kwata hintamu, a yala ni ku nghena ndlwini. Kutani papayi wa yena a huma, a fika a mu kombela swaku a nghena.
29 Se a hlamula papayi wa yena a ku: ‘Ni ku tirhele malembe ya manyingi swinene, funtshi minkama hinkwayu na ku yingisa, kambe a wu se tshama u ni nyika ximbutani swaku ni tikhorisa ni vanghanu va mina.
30 Kambe leswi ku nga fika n’wana wa wena lweyi a nga tlanga hi tshomba la wena ni tinghwavani, u mu dlayele homu yayitsongo ya ku nona.’
31 Se papayi wa yena a ku: ‘N’wananga, a wu se tshama u famba u ni siya, naswona minchumu hinkwayu leyi nga ya mina i ya wena.
32 Hi fanele hi tsaka hi tlhela hi ba minkulungwani, hikusa makwenu a a file kambe se wa hanya; a a lahlekile kutani se a kumekile.’”
Tinhlamunselu ta le hansi
^ Kumbe: “impoxtu; tinemba”.
^ Vona Xiyengetelo B14.
^ Kumbe: “a swiyela”.
^ Kumbe: “leli kalaka li nga pfuni nchumu.”
^ Hi Xigriki: “tilo”.
^ Kumbe: “n’quta; nyunta.”
^ Hi Xigriki: “tilo”.
