Mahungu Ya Ku Tsakisa Ya Ku Tsaliwa Hi Luka 6:1-49
-
Yesu, “Hosi ya Savata” (1-5)
-
Ku hanyisiwa ka wanuna wa ku limala voko (6-11)
-
12 wa vapostolo (12-16)
-
Yesu a djondzisa a tlhela a hanyisa vanhu (17-19)
-
Ku tsaka ni makhombo (20-26)
-
Ku rhandza valala (27-36)
-
Tshikani ku yavanyisa (37-42)
-
Nsinya wu tiviwa hi mihandzu ya wona (43-45)
-
Yindlo ya ku yakiwa kahle ni ya ku kala yi nga yakiwanga kahle (46-49)
6 Yesu a a hundza hi ka masimu ya trigu hi savata, kutani vadjondzisiwa va yena va khaya trigu+ va li swoswa hi mavoko va dla.+
2 Se Vafarisi van’wani va ku: “Hi mhaka muni mi yendla leswi tsimbisiwaka hi Savata?”+
3 Kambe Yesu a va hlamula a ku: “A mi se tshama mi lerha leswi Davhida a nga swi yendla nkama yena ni vavanuna lava a va li na yena va nga twa ndlala?+
4 Swaku a nghene ka yindlo ya Xikwembu kutani a nyikiwa mapawu ya ku kwetsima a dla, a tlhela a teka man’wani a nyika vavanuna lava a va li na yena, lawa a ku nga na munhu lweyi a a pfumeleliwa ku ma dla loko ku nga li vaprista ntsena?”+
5 Kutani Yesu a ku: “N’wana wa munhu i Hosi ya Savata.”+
6 Hi savata yin’wani,+ Yesu a nghena ka sinagoga* kutani a sungula ku djondzisa. Naswona a ku ni wanuna lweyi a a limale* voko la xinene.+
7 Vatsali ni Vafarisi a va mu txuvukisisa kahle na va lava ku vona swaku a ta mu hanyisa hi Savata ke, leswaku va ta kuma xa ku mu lumbeta hi xona.
8 Kambe yena a a swi tiva leswi a va swi pimisa,+ kutani a byela wanuna lweyi a ku: “Sekeleka u ta nyima lani xikarhi.” Se wanuna yelweyo a yendla swoleswo.
9 Kutani Yesu a va vutisa a ku: “I mpsini leswi pfumeleliwaka ku swi yendla hi Savata: Swaswinene kumbe swa ku biha? Ku ponisa wutomi kumbe ku dlaya?”+
10 Nkama a nga va txuvuka hinkwavu a byele wanuna yelweyo a ku: “Tshandzavuta voko la wena.” A li tshandzavuta kutani li wololoka.
11 Se vatsali ni Vafarisi va kwata swinene, va sungula ku yendla planu* la leswi va nga mu yendlaka swona Yesu.
12 Siku lin’wani a ye ntshaveni leswaku a ya khongela,+ naswona a khongele ka Xikwembu wusiku hinkwalu.+
13 Loko li xa, a vitana vadjondzisiwa va yena kutani a langa 12 xikarhi ka vona, lava a nga tlhela a va chula swaku i vapostolo, ku nga+
14 Simoni, lweyi Yesu a nga mu chula vito la Pedru ni makwavu Andre, Yakobe, Yohani, Filipi,+ Bartolomewu,
15 Matewu, Tomasi,+ Yakobe n’wana wa Alfewu, Simoni lweyi a a vitaniwa “wa ku hiseka,”
16 Yudasi n’wana wa Yakobe na Yudasi Skariyota lweyi a nga mu xavisa.
17 Kutani a xika na vona hi le ka ntshava a fika a nyima ka ndhawu leyi nga pfuleka, lomu a ku ni xitshungu xaxikulu xa vadjondzisiwa va yena ni vanhu va ku tala lava a va ta hi Yudiya, Yerusalema ni ka tiko leli nga kusuhi ni lwandle la le Tiru ni Sidoni, lava nga ta swaku va ta mu yingisela ni ku hanyisiwa.
18 Phela hambi lava a va hluphiwa hi madimoni a va hanyisiwa.
19 Vanhu hinkwavu a va lava ku mu khumba hikusa a ku huma matimba ka yena+ se hinkwavu va hanyisiwa.
20 Se a txuvuka vadjondzisiwa va yena a ku:
“Ma tsaka n’wina swisiwana, hikusa Mfumu wa Xikwembu i wa n’wina.+
21 “Ma tsaka n’wina mi twaka ndlala, hikusa mi ta xurha.+
“Ma tsaka n’wina mi rilaka, hikusa mi ta hleka.+
22 “Tsakani loko vanhu va mi nyenya,+ va mi hlongola,+ va mi rhuketela ni ku mi vula vanhu va ku biha* hi mhaka ya N’wana wa munhu.
23 Tsakani mi ba ni minkulungwani hi siku lolelo, hikusa hakelo ya n’wina i yikulu matilweni, naswona hi swoleswo vavhovho va vona a va swi yendla ka vaprofeta.+
24 “Kambe khombo ka n’wina va ku ganya,+ hikusa se mi yi kumile hakelo ya n’wina.+
25 “Khombo ka n’wina mi nga xurha, hikusa mi ta twa ndlala.
“Khombo ka n’wina mi hlekaka, hikusa mi ta rila mi tlhela mi ba nyandha.+
26 “Khombo ka n’wina loko vanhu va mi dzunisa,+ hikusa hi swoleswo vavhovho va vona va nga swi yendla ka vaprofeta va mavunhwa.
27 “Kambe na mi byela n’wina lava ni yingisaka leswaku mi tama mi rhandza valala va n’wina, mi va yendlela swaswinene lava mi nyenyaka,+
28 mi katekisa lava mi navelelaka swa ku biha, mi khongelela lava mi rhuketelaka.+
29 Loko munhu a ku yamasa rhama, mu nyiki ni lelin’wani; naswona loko munhu a ku tekela mudjansi* mu nyiki ni hembe.*+
30 Lweyi a kombelaka mu nyiki,+ naswona lweyi a ku tekelaka swa wena u nga mu londzi.
31 “Naswona leswi mi lavaka swaku van’wani va mi yendlela swona, na n’wina va yendleleni.+
32 “Loko mi rhandza lava mi rhandzaka, mi ta pfuneka hi yini ke? Hikusa hambi vadjohi va rhandza lava va va rhandzaka.+
33 Naswona loko mi yendla swaswinene ka lava mi yendlelaka swaswinene ntsena, mi ta pfuneka hi yini? Hambi vadjohi va yendla swoleswo.
34 Loko mi lomba* lava mi tshembaka swaku va ta mi tlhelisela, mi ta pfuneka hi yini?+ Hambi vadjohi va lomba vadjohi van’wani hi ku tiva swaku va ta va hakela.
35 Kambe n’wina, tamani mi rhandza valala va n’wina, mi yendla swaswinene, mi lombisa na mi nga nyimeli ku tlheliseliwa;+ kutani hakelo ya n’wina yi ta va yikulu naswona mi ta va vana va Xikwembu Xa Ku Tlakuka Hintamu, hikusa xi ni wumbilu ka lava kalaka va nga khensi ni lava ku biha.+
36 Mi nga tshiki ku va ni timpsalu ku fana ni Papayi wa n’wina.+
37 “Naswona tshikani ku yavanyisa van’wani leswaku na n’wina mi nga yavanyisiwi;+ tshikani ku nyika van’wani minandzu leswaku mi nga nyikiwi minandzu. Mi nga tshiki ku rivalela van’wani leswaku na n’wina mi ta rivaleliwa.+
38 Hanyani hi ku nyika, kutani na n’wina mi ta nyikiwa.+ Va ta mi chelela swi tala ka mpahla ya n’wina swi tlhela swi djindjiwa, swi hlunguhliwa swi tlhela swi dibekela. Hikusa leswi mi va khomisaka swona van’wani, na n’wina mi ta khomisiwa swoleswo.”
39 Se a tlhela a va byela xifaniso a ku: “Munhu lweyi a nga fa matihlo a nge kongomisi munhu mun’wani wa ku fa matihlo, a hi swona ke? Hikusa havambirhi va ta wela xikheleni.+
40 Mudjondzi* a nga mu tluli mudjondzisi wa yena, kambe lweyi a djondzisiwaka kahle a ta fana ni mudjondzisi wa yena.
41 Kutani hi mhaka muni u txuvuka xilavi lexi nga ka tihlo la makwenu, kambe u nga swi koti ku vona pulangu* leli nga ka tihlo la wena?+
42 U nga mu byelisa ku yini makwenu u ku: ‘Makwerhu, ni tshiki ni susa xilavi lexi nga ka tihlo la wena,’ kuve hambi wena a wu li voni pulangu leli nga ka tihlo la wena? Mukanganyisi ndziwena! Rhanga hi ku susa pulangu leli nga ka tihlo la wena, se hi kona u nga ta kota ku susa xilavi lexi nga ka tihlo la makwenu.
43 “Hikusa a ku na nsinya wawunene lowu nga psalaka mihandzu ya ku bola, naswona a ku na nsinya wa ku bola lowu nga psalaka mihandzu yayinene.+
44 Hikusa nsinya wun’wani ni wun’wani wu tiviwa hi mihandzu ya wona.+ Hi xikombiso, vanhu a va nge khayi makuwa ka mintwa, naswona a va nge tsemi mawuvha ka xinsinyani xa mintwa.
45 Munhu wamunene a humesa swilo swaswinene ka xuma xa yena xaxinene, kambe lweyi wa ku biha a humesa swilo swa ku biha ka xuma xa yena xa ku biha, hikusa nomo wa yena wu vulavula leswi mbilu yi nga tala hi swona.+
46 “Kutani hi mhaka muni mi ni vitana ‘Hosi,’ na mi nga yendli leswi ni mi byelaka swona?+
47 Mun’wani ni mun’wani lweyi a taka ka mina, a twa marito ya mina a tlhela a yendla leswi ni swi vulaka, ni ta mi komba leswaku a fana na mani:+
48 A fana ni wanuna lweyi loko a yaka yindlo, a nga txela a ya hansi swinene kutani a veka masungulo* ya yindlo ya yena henhla ka ribye. Se loko ku fika ndhambi, mati ya nambu ma ba yindlo yoleyo, kambe a yi tsekatsekanga hikusa a yi yakiwe yi tiya.+
49 Se lweyi a twaka marito ya mina kambe a nga yendli leswi ni swi vulaka,+ a fana ni munhu lweyi a nga yaka yindlo ka misava naswona a yi nga na masungulo ya kahle. Kutani loko yi biwa hi mati ya nambu yi wa hi ku hantlisa, yi hahlukela swinene.”
Tinhlamunselu ta le hansi
^ I ndhawu leyi Vayuda a va kumana ka yona swaku va khongela va tlhela va lerha matsalwa.
^ Kumbe: “khwanyale”.
^ Kumbe: “kungu”.
^ Kumbe: “leswaku vito la n’wina li bihile”.
^ Kumbe: “nguvu ya le handle”.
^ Kumbe: “nguvu ya le ndzeni.”
^ Ku nga ku lombisa na u nga nyimeli majuru.
^ Kumbe: “Lweyi a djondzisiwaka”.
^ Kumbe: “mhandzi leyi”.
^ Kumbe: “fundação la”.
