Mahungu Ya Ku Tsakisa Ya Ku Tsaliwa Hi Luka 9:1-62
-
12 wa vadjondzisiwa va byeliwa leswi a va fanele va chumayelisa xiswona (1-6)
-
Heroda a dungeka nhloko hi mhaka ya Yesu (7-9)
-
Yesu a phamela 5.000 wa vanhu (10-17)
-
Pedru a vula swaku Yesu i Kreste (18-20)
-
Yesu a vulavula hi ta lifu la yena (21, 22)
-
Leswi ku va mudjondzisiwa wa Kreste swi vulaka swona (23-27)
-
Ku txintxiwa ka Yesu (28-36)
-
Ku hanyisiwa ka djaha leli a li ni dimoni (37-43a)
-
Yesu a tlhela a vulavula hi ta lifu la yena (43b-45)
-
Vadjondzisiwa va holovisana hi leswaku i mani wamukulu ka vona (46-48)
-
Lweyi a kalaka a nga lwisani na hina a nyima na hina (49, 50)
-
Vanhu va xidoropani xa Samariya va yala Yesu (51-56)
-
Ndlela ya ku landzela Yesu (57-62)
9 Kutani a vitana lava 12 a va nyika matimba ya ku hlongola madimoni+ ni ya ku hanyisa mavabyi.+
2 A va rhuma swaku va ya chumayela hi Mfumu wa Xikwembu ni ku hanyisa lava vabyaka,
3 a va byela a ku: “Mi nga fambi ni nchumu; hambi nhonga, nkwama wa swakudla, pawu kumbe male;* naswona mi nga teki mpahla ya ku txintxa* hi yona.+
4 Kambe ka munti wun’wani ni wun’wani lowu mi nga ta nghena ka wona, tshamani kona anze mi suka ka doropa lolelo.+
5 Hinkwaku lomu vanhu va kalaka va nga mi yamukeli, nkama mi humaka ka doropa lolelo, phuhunani wuthulu ka minenge ya n’wina leswaku swi ta va wumboni ka vona.”+
6 Se va famba hi swidoropani va chumayela mahungu ya ku tsakisa ni ku hanyisa lava vabyaka.+
7 Nkama Heroda,* govhernadori wa dixtritu la Galileya a nga twa leswi Yesu a a swi yendla, a dungeka nhloko hikusa van’wani a va vula swaku Yohani a pfuxiwile ka lava nga fa,+
8 kambe van’wani a va vula swaku i Eliya, kasi van’wanyani a va vula swaku i mun’wani wa vaprofeta va khale lweyi a nga pfuxiwa.+
9 Heroda a ku: “Yohani ni mu tseme nhloko.+ Se i mani lweyi a yendlaka swilo leswi?” A a lava ku mu vona.+
10 Nkama vapostolo va nga vuya, va byele Yesu hinkwaswu leswi va nga swi yendla.+ Kutani a va teka a famba na vona na va li voxe, va ya ka doropa leli vitaniwaka Betisayida.+
11 Kambe nkama xitshungu xi nga swi twa, xi mu landza. Kutani a xi yamukela hi lirhandzu, a sungula ku xi djondzisa hi Mfumu wa Xikwembu ni ku hanyisa lava vabyaka.+
12 Nkama li nga sungula ku pela, lava 12 va ye ka Yesu va ku: “Byela vanhu lava swaku va ya ka swidoropani leswi nga kusuhi leswaku va ya tilavela ndhawu ya ku yetlela ni swakudla, hikusa lomu hi nga kona hi le nhoveni.”+
13 Kambe Yesu a ku: “Va nyikeni swakudla n’wina.”+ Va mu hlamula va ku: “Ho va ni 5 wa mapawu ni tihlampfi timbirhi ntsena. Se swi lava hi ya va xavela swakudla vanhu hinkwavu lava?”
14 A ku ni kolomuyani ka 5.000 wa vavanuna. Se Yesu a byela vadjondzisiwa va yena a ku: “Va byeleni va tshama hi mintlawa ya kolomuyani ka 50 wa vanhu.”
15 Se va byela vanhu swaku va tshama hansi.
16 A teka 5 wa mapawu ni tihlampfi timbirhi, a txuvuka tilweni a swi khongelela. A gama a sungula ku swi khema a swi nyika vadjondzisiwa va yena swaku va phamela vanhu.
17 Hinkwavu va dla va xurha, kutani va hlengeleta leswi nga sala, swi tata 12 wa mindzhava.+
18 Siku lin’wani na Yesu a li ku khongeleni na a li yexe, vadjondzisiwa va yena va mu yela, se a va vutisa a ku: “Kasi xitshungu xi li hi mina mani?”+
19 Va mu hlamula va ku: “Van’wani va li hi wena Yohani Mutsakamisi, van’wanyani va li hi wena Eliya, kambe van’wani va li u mun’we wa vaprofeta va khale lweyi a nga pfuka ku feni.”+
20 Kutani a ku: “Se n’wina ke, mi li hi mina mani?” Pedru a mu hlamula a ku: “Hi wena Kreste lweyi a nga rhumiwa hi Xikwembu.”+
21 Kutani a bula na vona a va kawuka swaku va nga byeli munhu mhaka leyi,+
22 kambe a ku: “N’wana wa munhu a fanele a xanisiwa hintamu ni ku yaliwa hi madoda, vaprista vavakulu ni vatsali, a gama a dlayiwa+ kutani a pfuxiwa hi siku la wunharhu.”+
23 A tlhela a ku: “Lweyi a lavaka ku ni landzela, a a titshiki,+ se a rhwala mhandzi ya yena ya nxaniso* siku ni siku, a ni landzela nkama hinkwawu.+
24 Hikusa lweyi a lavaka ku ponisa wutomi la yena a ta luzekeliwa hi lona; kambe lweyi a luzekeliwaka hi wutomi la yena hi mhaka ya mina, a ta tlhela a li kuma.+
25 Hikusa swi siza yini swaku munhu a kuma swilo hinkwaswu swa misava leyi kambe a luzekeliwa hi wutomi la yena kumbe a tilavela timhaka?+
26 Hikusa lweyi a nga ni tingana hi mhaka ya mina ni leswi ni swi vulaka, na yena N’wana wa munhu a ta va ni tingana hi yena loko a ta hi ku phatima ka yena ni ka Papayi wa yena ni ka tintsumi ta ku kwetsima.+
27 Kambe ni mi byela ntiyiso: Van’wani ka lava nga nyima lani a va nga ta fa na va nga rhanganga hi ku vona Mfumu wa Xikwembu.”+
28 Kunene, na se ku hundze kolomuyani ka 8 wa masiku na Yesu a vule marito lawa, a teke Pedru, Yohani na Yakobe a khwela na vona ntshava leswaku a ya khongela.+
29 Na a ha khongela, nghohe* ya yena yi txintxiwa naswona mpahla ya yena yi sungula ku phatima, yi basa yi ku baa!
30 A ku ni vavanuna vambirhi lava a va bula na yena: Moxe na Eliya.
31 A va phatima swinene, kutani va sungula ku vulavula hi ku famba ka yena loku a ku li kusuhi ni ku hetiseka aYerusalema.+
32 Pedru ni lava a va li na yena a va yetlelile, kambe loko va pfuka, va vona Yesu na a phatima,+ ni vavanuna vambirhi lava a va nyime na yena.
33 Se loko vavanuna lava va li ku fambeni, Pedru a byela Yesu a ku: “Mudjondzisi, swa tsakisa ku va lani. Hi pfumeleli hi hamba minchacha yinharhu, wun’we wu va wa wena, wun’wani wu va wa Moxe se wun’wanyani wu va wa Eliya.” Pedru a a nga xi tivi lexi a xi vulaka.
34 Kambe na a ha vulavula leswi, ku humelela rhefu li va funengeta. Nkama na va li ndzeni ka lona, va sungula ku chava.
35 Kutani ku twala rito+ na li huma hi ka rhefu li ku: “Lweyi i N’wananga, lweyi ni nga mu langa.+ Mu yingiseni.”+
36 Na rito la ha khuluma, va vone Yesu na a li yexe. Kambe ka masiku wolawo, a va byelanga munhu leswi va nga swi vona.+
37 Hi siku leli landzaka, na se va xikile ka ntshava, a teliwe hi xitshungu xaxikulu.+
38 Kutani wanuna mun’wani a huwelela na a li xikarhi ka xitshungu a ku: “Mudjondzisi, ni kombela u pfuna* n’wana wa mina, hikusa hi yena wa mun’we ntsena.+
39 Loko dimoni li mu hlasela, wa huwelela kutani li mu rhurhumelisa, li mu humesisa marhi li gama li mu tshika loko se li mu vavisile.
40 Ni kombele vadjondzisiwa va wena swaku va li hlongola kambe a va swi kotanga.”
41 Yesu a mu hlamula a ku: “N’wina vanhu* va ku biha ni va ku pfumala lipfumelo,+ kasi ni ta tama ni va na n’wina ni ku mi lehisela mbilu anze siku muni ke? Tisa n’wana wa wena halenu.”+
42 Kambe loko mufana a tshinela ka Yesu, dimoni li mu tlatlalatela hansi li tlhela li mu rhurhumelisa swinene. Kambe Yesu a laya dimoni a tlhela a hanyisa mufana a gama a mu nyikela ka papayi wa yena.
43 Kutani hinkwavu va hlamalisiwa hi matimba yamakulu ya Xikwembu.
Na va ha hlamalisiwa hileswi Yesu a a swi yendla, a byela vadjondzisiwa va yena a ku:
44 “Ni yingiseleni mi tlhela mi khumbuka marito ya mina: N’wana wa munhu a ta xavisiwa ka valala va yena.”+
45 Kambe a va swi twisisanga leswi a a swi vula. Phela a va fihleliwe swona leswaku va nga swi twisisi naswona a va chava ku mu vutisa.
46 Se va sungula ku holovisana hi swaku i mani lweyi a nga mukulu xikarhi ka vona.+
47 Se hi ku tiva leswi a va swi pimisa, Yesu a teka xin’wanani a xi nyimisa tlhelweni ka yena
48 kutani a ku: “Lweyi a yamukelaka xin’wanani lexi hi vito la mina, na mina wa ni yamukela; naswona lweyi a ni yamukelaka a yamukela ni Lweyi a nga ni rhuma.+ Hikusa lweyi a hanyaka ku fana ni wamutsongo xikarhi ka n’wina hi yena wamukulu.”+
49 Yohani a mu hlamula a ku: “Mudjondzisi, hi vone munhu mun’wani na a hlongola madimoni hi vito la wena naswona hi zame ku mu tsimbisa hikusa a nga fambi na hina.”+
50 Kambe Yesu a ku: “Mi nga mu tsimbisi, hikusa lweyi a kalaka a nga lwisani na n’wina a nyima na n’wina.”
51 Leswi masiku ya leswaku a ya tilweni a ma li kusuhi,+ a a tinyimisela ku ya Yerusalema.
52 Na a ha li ndleleni, a rhume van’wani va vadjondzisiwa va yena leswaku va ya ka xidoropani xa Samariya swaku va ya mu lunghiselela leswi a a ta swi lava loko a fika.
53 Kambe a va mu yamukelanga+ hi ku tiva swaku a a tinyimisele ku ya Yerusalema.
54 Nkama Yakobe na Yohani+ va nga vona leswi va ku: “Hosi, wa swi lava swaku hi vitana ndzilu wu ta hi le tilweni wu va helisa?”+
55 Kutani a ndzuluka a va kawuka.
56 Se va ya ka xidoropani xin’wani.
57 Na va ha li ndleleni, munhu mun’wani a ku ka yena: “Ni ta ku landzela hinkwaku lomu u nga ta ya kona.”
58 Kambe Yesu a ku: “Timbyana ta khwati* ti ni mintxele ni swinyanyani swi ni swisaka, kambe N’wana wa munhu a nga na ndhawu ya ku veka nhloko.”+
59 Se Yesu a byela mun’wani a ku: “Ni landzeli.” Wanuna yelweyo a ku: “Hosi, ni pfumeleli ni rhanga hi ku ya lahla papayi.”+
60 Kambe Yesu a ku: “Tshika vafi+ va lahla vafi va vona, kambe wena famba u ya chumayela hi Mfumu wa Xikwembu ka tindhawu hinkwatu.”+
61 Mun’wani funtshi a ku: “Hosi, ni ta ku landzela kambe ku sungula ni tshiki ni ya salisa va le kaya.”
62 Yesu a ku: “Munhu lweyi a rimaka hi gedjo* a gama a txuvuka ndzhaku+ a nga faneliwi hi ku nghena ka Mfumu wa Xikwembu.”+
Tinhlamunselu ta le hansi
^ Hi Xigriki: “prata.”
^ Hi Xigriki: “tinguvu timbirhi”.
^ Ku nga Heroda Antipasi. Vona Ntlhamuselo.
^ Vona Ntlhamuselo.
^ Kumbe: “kara la”.
^ Hi Xigriki: “txuvuka”.
^ Hi Xigriki: “nguva”.
^ Lani ku vulavuliwa hi timhungubye.
^ Ku nga nchumu xa ku rima hi xona.
