Malakiya 1:1-14
1 Marito ya ku yavanyisa:
Rito la Yehovha leli yaka ka Vayisrayele hi ku tirhisa Malakiya:*
2 “Ni mi rhandzile,”+ ku vula Yehovha.
Kambe n’wina mi li: “U hi rhandzise ku yini ke?”
“Kasi Esawu a a nga li makwavu wa Yakobe ke?”+ ku vula Yehovha. “Kambe ni rhandze Yakobe,
3 naswona ni nyenye Esawu;+ ni yendle tintshava ta yena ti hohlokela*+ se tshomba la yena ni li siyela timbyana ta khwati* ta mananga.”+
4 “Hambileswi Edomu a nge: ‘Madoropa ya hina ma wonhekile kambe hi ta tlhela hi ya ma pfuxa,’ Yehovha murhangeli wa tintsumi a li: ‘Va ta yaka kambe ni ta ma diliza funtshi ma ta vitaniwa “ndhawu ya wubihi” kasi vanhu va kona va ta vitaniwa “vanhu lava Yehovha a nga va kwatela hi masiku ni masiku.”+
5 Matihlo ya n’wina ma ta swi vona funtshi mi ta gama mi ku: “Yehovha a a hloniphiwe aIsrayele.”’”
6 “‘Phela n’wana wa mu hlonipha papayi wa yena+ ni xitirhi xa mu hlonipha n’winyi wa xona. Se mina loko ni li papayi,+ hi mhaka muni mi nga ni hloniphi ke?+ Loko mina ni li n’winyi wa n’wina, hi mhaka muni mi nga ni chavi ke?’ Yehovha murhangeli wa tintsumi a byela n’wina vaprista lava delelaka vito la yena.+
“‘Kambe n’wina mi li: “Kasi hi li delelise ku yini vito la wena ke?”’
7 “‘Hi ku nyikela swakudla* leswi kalaka swi nga basanga ka altari ya mina.’
“‘N’wina mi li: “Hi ku chakisise ku yini ke?”’
“‘Hi ku hlaya mi ku: “Phela meza wa Yehovha+ a hi wa nchumu.”
8 Ni loko mi nyikela xifuyu lexi xi nga fa matihlo swaku xi va gandzelo, mi li: “A swi bihanga.” Ni loko mi nyikela xifuyu lexi khwitaka kumbe lexi vabyaka, mi li: “A swi bihanga.”’”+
“Hi nga zamani ku swi nyikela ka govhernadori wa n’wina. Indjhe a ta mi tsakela, kumbe a mi yamukela hi timpsalu ke?” ku vula Yehovha murhangeli wa tintsumi.
9 “Kombelani ka Xikwembu swaku xi hi tsetselela. Indjhe leswi mi swi nyikelaka swi ta yendla swaku xi mi yamukela ke?” ku vula Yehovha murhangeli wa tintsumi.
10 “I mani ka n’wina lweyi a nga tinyimisela ku pfala swipfalu* ke?+ Hikusa a mi tshiveli ndzilu ka altari ya mina na mi nga hakeliwanga nchumu.+ A ni mi tsakeli funtshi a ni ma tsakeli magandzelo hinkwawu lawa mi ma nyikelaka,”+ ku hlaya Yehovha murhangeli wa tintsumi.
11 “Hikusa ku sukela awuxeni ku ya awupeladlambu, vito la mina li ta hloniphiwa hi matiko.+ Ka ndhawu yin’wani ni yin’wani ku ta hisiwa magandzelo, vito la mina li ta yendleliwa magandzelo, ku fana ni nyiko yayinene; hikusa vito la mina li ta hloniphiwa hi matiko,”+ ku hlaya Yehovha murhangeli wa tintsumi.
12 “Kambe n’wina ma li chakisa*+ hi ku hlaya mi ku: ‘A meza wa Yehovha a wu basanga ni magandzelo lawa ma vekiwaka ka wona a hi ya nchumu.’+
13 N’wina mi tlhela mi ku: ‘Li hi kolwile’ funtshi mi li tekele hansi”, ku vula Yehovha murhangeli wa tintsumi. “Mi tisa swifuyu leswi nga yiviwa, leswi khwitaka ni leswi vabyaka. Mi swi tisa swaku swi va magandzelo. Indjhe ni fanele ni swi yamukela ke?”+ ku vula Yehovha.
14 “Munhu lweyi a kanganyisaka hi ku nyikela hi xifuyu lexi nga limala ka Yehovha kuve a ni xifuyu xa xinuna lexi kalaka xi nga limalanga ka ntlhambi wa yena, a a rhukiwe. Hikusa ni Hosi Leyikulu,+ vito la mina li ta hlonipheka ka matiko,”+ ku vula Yehovha murhangeli wa tintsumi.
Tinhlamunselu ta le hansi
^ Leswi vulaka “Murhumiwa Wa Mina.”
^ Kumbe: “ti va marhumbi”.
^ Lani ku vulavuliwa hi timhungubye.
^ Hi Xiheberu: “pawu”.
^ Swi tikomba na ku vulavuliwa hi ntirho wa ku pfala swipfalu swa tempele.
^ Kumbexana: “ma ni chakisa”.
