Mahungu Ya Ku Tsakisa Ya Ku Tsaliwa Hi Marka 4:1-41
4 A tlhela a sungula ku djondzisa tlhelweni ka lwandle lani a nga gama a teliwa hi xitshungu xaxikulu. Se a khwela ka boti a tshama kona, kambe xitshungu hinkwaxu a xi li tlhelweni ka lwandle.+
2 Kutani a sungula ku xi djondzisa swilo swa swinyingi hi ku tirhisa swifaniso+ a ku:+
3 “Yingisani! Mubyali a humile a ya byala timbewu+
4 naswona loko a li ku byaleni, timbewu tin’wani ti wela tlhelweni ka ndlela, se ti dliwa hi swinyanyani.
5 Tin’wani ti wela ka maribye, lomu a ku nga na misava ya yinyingi, se ti mila hi ku hantlisa hi mhaka ya leswi misava ya kona a yi nga yentanga.+
6 Kambe loko dlambu li tlhava, ti psha ti tlhela ti woma hi mhaka ya ku pfumala timintsu.
7 Timbewu tin’wani ti wela xikarhi ka mimintwa, kutani mimintwa yi kula yi yendla swaku ti nga kuli kahle, kutani ti nga psali nchumu.+
8 Kambe tin’wanyani ti wela ka misava yayinene, ti mila ti tlhela ti kula, kutani ti sungula ku psala mihandzu: Mbewu yin’we yi psala ka 100 ku tlula leswi a swi byaliwile, leyin’wani ka 60, leyin’wanyani ka 30.”+
9 Yesu a tlhela a ku: “Lweyi a nga ni tindleve ta ku yingisa a a yingisi.”+
10 Nkama vanhu lavan’wani va nga famba, a 12 wa vadjondzisiwa va yena ni lava a va li na vona va sungula ku mu vutisa hi ntlhamuselo wa swifaniso.+
11 Kutani a ku: “N’wina mi nyikiwe ku twisisa swihundla swa ku kwetsima+ swa Mfumu wa Xikwembu kambe vona ni va djondzisa hi ku tirhisa swifaniso,+
12 leswaku hambi va txuvuka va nga voni nchumu naswona hambi va twa va nga yingisi, hambi ntsutsu wa mhaka va nga wu kumi, ni ku tisola va nga tisoli leswaku va rivaleliwa.”+
13 Yesu a tlhela a ku: “Loko mi nga xi twisisi xifaniso lexi, swi nga kotekisa ku yini kuva mi twisisa swifaniso leswin’wani hinkwaswu?
14 “Mubyali hi lweyi a byalaka rito la Xikwembu.+
15 Se mbewu leyi nga wela tlhelweni ka ndlela lomu ku nga byaliwa kona rito, hi lava loko va ha ku gama ku twa rito, Sathana a taka+ kutani a teka rito leli nga byaliwa ka timbilu ta vona.+
16 Hi ku fana, a mbewu leyi nga wa ka maribye hi lava loko va twa rito va hantlaka va li yamukela hi ku tsaka.+
17 Kambe a va dzimi timintsu, va tshama swa nkamanyana kutani loko va hluphiwa hi mhaka ya rito, va lahlekeliwa hi lipfumelo la vona.
18 A mbewu yin’wani leyi nga wa xikarhi ka mimintwa, hi lava nga twa rito,+
19 kambe ku vilela+ ka wutomi la masiku lawa ni ku navela ku ganya,*+ leswi kanganyisaka+ va ku tala ni ku navela swilo swa ku hambanahambana, swi kavanyeta rito li gama li nga psali mihandzu.
20 Hi wugamu, leyi nga wa ka misava yayinene, hi lava twaka rito kutani va li yamukela kahle, se va psala mihandzu: Mbewu yin’we yi psala mihandzu leyi fikaka 100, leyin’wani ka 60, leyin’wanyani ka 30.”+
21 A tlhela a ku: “Nchumu xa ku voninga hi xona a xi mbhonyiwi hi ndzhava* kumbe ku vekiwa hansi ka mubedu, a hi swona ke? Kambe xi vekiwa henhla ka meza.+
22 Hikusa a ku na nchumu lexi nga tumbhetiwa lexi nga ta kala xi nga tsumbuliwi; naswona a ku na nchumu lexi nga tumbhetiwa kahle lexi nga ta kala xi nga humesiwi handle.+
23 Lweyi a nga ni tindleve ta ku yingisa a a yingisi.”+
24 A tlhela a ku: “Yingisani kahle leswi mi swi twaka ka mina.+ Leswi mi va khomisaka xiswona van’wani na n’wina va ta mi khomisa swoleswo naswona mi ta yengeteliwa swa swinyingi.
25 Hikusa lweyi a nga ni xanchumu a ta nyikiwa swa swinyingi,+ kambe lweyi a kalaka a nga na nchumu, a ta tekeliwa ni swaswitsongo leswi a nga na swona.”+
26 A tlhela a ku: “Mfumu wa Xikwembu wu fana ni munhu lweyi a hlwanyaka mbewu amisaveni.
27 A yetlela niwusiku a pfuka nimixo, naswona mbewu yi mila yi tlhela yi kula kambe na a nga swi tivi swaku swi yendlekise ku yini.
28 Misava yi kulisa mbewu hi kutsongokutsongo, yi sungula hi ku mila, ku landzela xigadjani, se xona xi psala mihandzu.
29 Kutani loko mihandzu yi wupfile, wa yi tshovela, hikusa nkama wa ku tshovela se wu fikile.”
30 A tlhela a ku: “Hi nga wu fanisa ni yini Mfumu wa Xikwembu, kumbe hi nga wu tlhamuselisa ku yini?
31 Wu fana ni mbewu ya sinapi* leyi byaliwaka na yi li yitsongo hintamu ka timbewu hinkwatu amisaveni.+
32 Kambe loko yi byaliwile, yi gama yi kula yi tlula ni swinsinyani hinkwaswu hi ku kula kutani yi humesa tigadja tatikulu se swinyanyani swi za swi yaka swisaka ka ndzhuti wa kona.”
33 A a tshamela ku va djondzisa rito hi ku tirhisa swifaniso+ swa swinyingi swa ku fana ni leswi, hi ku ya hi leswi a va swi kota ku swi twisisa.
34 Phela a a nga vulavuli na vona na a nga tirhisi swifaniso, kambe a a tlhamusela vadjondzisiwa va yena swilo hinkwaswu loko se va li voxe.+
35 Hi siku lolelo nimadlambu a ku: “A hi tluleleni ka tlhelo lelin’wani la lwandle.”+
36 Nkama va nga mukisa xitshungu, va fambe na yena hi boti naswona a ku ni maboti man’wani lawa a ma longoloka na vona.+
37 Kutani ku sungula ku ba xidzedze xaxikulu hintamu alwandle, a boti li za li biwa hi magandlati, naswona a li li kusuhi ni ku mbombomela.+
38 Kambe Yesu a a li ka ntxila wa boti, na a yetlelile henhla ka ximasi.* Se va ya mu pfuxa va ku: “Mudjondzisi, a wu swi voni swaku ha fa ke?”
39 A gama a pfuka a kawuka moya, kutani a byela lwandle a ku: “Miyela u ku ntse!”+ Se moya wu nyima, kutani ku va ni ku rhula kakukulu.
40 Se a ku ka vona: “Hi mhaka muni mi chava? A mi se va ni lipfumelo?”
41 Kutani va sungula ku chava swinene, va byelana hi xivona va ku: “Kasi munhu lweyi i mani? Hambi moya ni lwandle swa mu yingisa.”+
Tinhlamunselu ta le hansi
^ Kumbe: “tshomba”.
^ Kumbe: “a xi mbhonyiwi hi ndzhava wa ku pima”.
^ I mbewu yayitsongo hintamu leyi kumekaka aPalestina. Nsinya wa kona wu nga kula wu tlula 4 wa mametru hi ku leha wu tlhela wu va ni tigadja.
^ Kumbe: “xidamu.”
