Mahungu Ya Ku Tsakisa Ya Ku Tsaliwa Hi Matewu 10:1-42
10 Kutani a vitana 12 wa vadjondzisiwa va yena, a va nyika matimba ya ku hlongola madimoni+ ni ya ku hanyisa mavabyi ni ku limala ka mixaka hinkwayu.
2 Mavito ya 12 wa vapostolo hi lawa:+ Wa ku sungula i Simoni, lweyi a vitaniwaka Pedru+ ni makwavu Andre;+ na Yakobe n’wana wa Zebedewu ni makwavu Yohani;+
3 Filipi na Bartolomewu;+ Tomasi+ na Matewu+ muhakelisi wa rhesa;* Yakobe n’wana wa Alfewu na Tadewu;
4 Simoni wa Kanana,* na Yudasi Skariyota, lweyi a nga gama a xavisa Yesu.+
5 Yesu a rhuma lava 12 a ku:+ “Mi nga yi ka vamatiko naswona mi nga ngheni ka madoropa ya Vasamariya;+
6 kambe fambani mi ya lavetela ntsena tinyempfu leti nga lahleka ta yindlo ya Israyele.+
7 Loko mi famba, chumayelani mi ku: ‘Mfumu wa matilo wu le kusuhi.’+
8 Hanyisani lava vabyaka,+ pfuxani lava nga fa, basisani lava nga ni mavabyi ya nhlokonho* naswona hlongolani madimoni. Mi nyikiwe mahala, na n’wina nyikani mahala.
9 Mi nga longeni male ya woru, ya prata kumbe ya kobre ka swipachi swa n’wina,+
10 kumbe ku longa swakudla swa liyendzo, mpahla ya ku txintxa* hi yona, masandaliya kumbe nhonga;+ hikusa mutirhi a faneliwa hi swakudla swa yena.+
11 “Hinkwaku lomu mi nghenaka kona, ka doropa kumbe ka xidoropani, lavetelani lweyi a faneliwaka hi ku mi yamukela ni ku twa mahungu ya n’wina, kutani mi tshama na yena anze mi suka.+
12 Loko mi nghena muntini, xowetani* lava mi nga ta va kuma;
13 loko va mi yamukela, va ta katekisiwa.*+ Kambe loko va nga mi yamukeli, minkateko ya n’wina a yi tlheleli ka n’wina.
14 Hinkwaku lomu va kalaka va nga mi yamukeli kumbe ku mi yingisa, loko mi huma ka munti wolowo kumbe ka doropa lolelo, phuhunani wuthulu ka minenge ya n’wina.+
15 Ni mi byela ntiyiso: Doropa lolelo li ta khatisiwa swinene hi Siku la Ku Yavanyisa ku tlula doropa la Sodoma na Gomora.+
16 “Phela ni mi rhuma ku fana ni tinyempfu axikarhi ka mahlolwa.* Kutani tlharihani ku fana ni tinyoka mi tlhela mi va va ku rhula ku fana ni matuva.+
17 Tivoneleni ka vanhu, hikusa va ta mi yisa matribunali+ va tlhela va mi bukutela+ ka masinagoga* ya vona,+
18 naswona mi ta yisiwa ka vagovhernadori ni ka tihosi+ hi mhaka ya mina, swaku mi nyikela wumboni ka vona ni ka vamatiko.+
19 Kambe loko va mi khoma, mi nga karhatekeni hi leswi mi nga ta swi vula ni leswi mi nga ta vulavulisa xiswona hikusa leswi mi nga ta swi vulavula, mi ta nyikiwa swona hi nkama wolowo;+
20 hikusa a hi n’wina mi nga ta vulavula, kambe mi ta pfuniwa hi matimba* ya Papayi wa n’wina.+
21 Funtshi makwavu a ta nyikela makwavu leswaku a dlayiwa, papayi a ta nyikela n’wana wa yena, kasi vana va ta terekela vapsali kuva va yendla swaku va dlayiwa.+
22 Naswona mi ta nyenyiwa hi vanhu hinkwavu hi mhaka ya vito la mina;+ kambe lweyi a nga ta tiyisela* anze ku fika magamu, hi yena lweyi a nga ta ponisiwa.+
23 Loko va mi xanisa ka doropa lin’wani, balekani mi ya ka lin’wanyani,+ hikusa ni mi byela ntiyiso: N’wana wa munhu a ta fika na mi nge se heta ntirho wa ku chumayela ka madoropa ni swidoropani swa Israyele.
24 “Mudjondzisiwa a nga mu tluli mudjondzisi wa yena, ni xikarawa a xi mu tluli n’winyi wa xona.+
25 Mudjondzisiwa a ta yendliwa leswi mudjondzisi wa yena a yendliwaka swona, na xona xikarawa xi ta yendliwa leswi n’winyi wa xona a yendliwaka swona.+ Loko vanhu va chule n’winyi wa munti leswaku i Belzebule,*+ tiyisekani swaku hinkwavu va ndjangu wa yena va ta vitanisiwa swoleswo!
26 Kutani mi nga va chavi, hikusa a ku na nchumu lexi nga mbhonyiwa lexi nga ta kala xi nga fununguliwi, naswona a ku na nchumu lexi nga tumbhetiwa lexi nga ta kala xi nga tiviwi.+
27 Leswi ni mi byelaka swona ka munyama, swi vuleni ku vonakaleni; naswona leswi mi hleveteliwaka swona, swi chumayeleni hinkwaku lomu ku nga ni vanhu.*+
28 Mi nga chavi lava va ngo kota ku dlaya muzimbha ntsena kambe va kalaka va nga swi koti ku dlaya wutomi;*+ kambe chavani lweyi a nga kotaka ku helisa muzimbha ni wutomi aGehena.*+
29 Swinyanyani* swimbirhi swaswitsongo a swi xavisiwi hi sentavhu* lin’we ke? Kambe a xi kona ni xin’we xa swona lexi nga ta wa hansi kambe Papayi wa n’wina a nga xi voni.+
30 Phela hambi misisi ya tinhloko ta n’wina yi kontiwile hinkwayu.
31 Hi mhaka leyo, mi nga chaveni; n’wina mi va lisima ku tlula swinyanyani swa swinyingi swaswitsongo.+
32 “Kutani lweyi a vulaka ka vanhu swaku wa ni tiva,+ na mina ni ta vula ka Papayi wa mina lweyi a nga matilweni swaku na mu tiva;+
33 kambe lweyi a ni yalaka ka vanhu, na mina ni ta mu yala ka Papayi wa mina lweyi a nga matilweni.+
34 Mi nga pimisi swaku ni tise ku rhula amisaveni; a ni tisanga ku rhula kambe ni tise xipada.+
35 Hikusa ni tele ku ta pfuxa ku yavana xikarhi ka djaha ni papayi wa lona, n’wana wa ntombhi ni mamani wa yena, ni le xikarhi ka mamanyani* ni n’wingi wa yena.+
36 Phela munhu a ta nyenyiwa hi vandjangu wa yena.
37 Lweyi a rhandzaka papayi wa yena kumbe mamani wa yena ku tlula mina, a nga faneleki ku va mudjondzisiwa wa mina; naswona lweyi a rhandzaka n’wana wa yena wa djaha kumbe wa ntombhi ku tlula mina, a nga faneleki ku va mudjondzisiwa wa mina.+
38 Naswona lweyi a kalaka a nga rhwali mhandzi ya yena ya nxaniso* a ni landzela, a nga faneleki ku va mudjondzisiwa wa mina.+
39 Lweyi a lavaka ku ponisa wutomi la yena a ta luzekeliwa hi lona, kambe lweyi a luzekeliwaka hi wutomi la yena hi mhaka ya mina, a ta tlhela a li kuma.+
40 “Lweyi a mi yamukelaka, na mina wa ni yamukela naswona lweyi a ni yamukelaka, a yamukela ni Lweyi a nga ni rhuma.+
41 Lweyi a yamukelaka muprofeta hi mhaka ya leswi a nga muprofeta, a ta kuma hakelo ya muprofeta,+ ni lweyi a yamukelaka munhu lweyi a nga lulama hi mhaka ya leswi a nga munhu wa ku lulama a ta kuma hakelo ya lweyi wa ku lulama.
42 Naswona lweyi a nyikaka mun’we wa lavatsongo, hambi ko va kopo ya mati ya ku titimela ntsena leswaku a phuza hileswi a nga mudjondzisiwa, ni mi byela ntiyiso: A ta yi kuma hakelo ya yena.”+
Tinhlamunselu ta le hansi
^ Kumbe: “impoxtu; tinemba.”
^ Kumbe: “wa ku gingiriteka”.
^ Kumbe: “lepra”. Ku nga muxaka wa mavabyi ya ku bola xikhumba.
^ Hi Xigriki: “tinguvu timbirhi”.
^ Loko Vayuda va xowetana, a va tolovela ku byelana leswi: ‘Ku rhula a ku ve na n’wina’.
^ Kumbe: “va ta va ni ku rhula.”
^ Ku nga muxaka wa timbyana ta nhova.
^ I tindhawu leti Vayuda a va kumana ka tona swaku va khongela va tlhela va lerha matsalwa.
^ Kumbe: “moya wa ku kwetsima”.
^ Kumbe: “lweyi a tiyiselaka”.
^ Vito leli nga nyikiwa Sathana, hosi ya madimoni.
^ Hi Xigriki: “henhla ka tiyindlo.”
^ Vona Ntlhamuselo.
^ Ku nga ntshembo wa ku tlhela a hanya.
^ Kumbe: “Swindzingiri”.
^ Hi Xigriki: “asariyu”. Vona Xiyengetelo B14.
^ Kumbe: “mawokazani”.
^ Vona Ntlhamuselo.
