Mahungu Ya Ku Tsakisa Ya Ku Tsaliwa Hi Matewu 17:1-27
17 Nkama ku nga hundza 6 wa masiku, Yesu a teke Pedru, Yakobe na Yohani lava a va li vamakwavu, a famba na vona ka ntshava ya ku leha na va li voxe.+
2 Se a txintxiwa na va swi vona, kutani nghohe* ya yena yi phatima ku fana ni dlambu, ni mpahla ya yena yi basa yi ku baa.+
3 Kutani ku humelela Moxe na Eliya na va bula na Yesu.
4 Se Pedru a byela Yesu a ku: “Hosi, swa tsakisa ku va lani. Loko u swi lava, ni nga hamba minchacha yinharhu, wun’we wu va wa wena, wun’wani wu va wa Moxe se wun’wanyani wu va wa Eliya.”
5 Na a ha vulavula, rhefu leli phatimaka li va funengeta, kutani ku twala rito na li huma hi ka rhefu li ku: “Lweyi i N’wananga, lweyi ni mu rhandzaka, lweyi ni mu yamukelaka;+ mu yingiseni.”+
6 Nkama vadjondzisiwa va nga twa leswo, va chava hintamu kutani va khizama, swimombo swa vona swi khumba hansi.
7 Se Yesu a tshinela a va khumba a ku: “Sekelekani! Mi nga chavi.”
8 Nkama va nga txuvuka henhla, a va ha vonanga munhu handle ka Yesu ntsena.
9 Na va ha xika hi ka ntshava Yesu a va byela a ku: “Mi nga byeli munhu leswi mi nga swi vona anze N’wana wa munhu a pfuxiwa ka lava nga fa.”+
10 Kambe vadjondzisiwa va mu vutisa va ku: “Se hi mhaka muni vatsali va vula swaku ku fanele ku ta Eliya ku sungula?”+
11 A va hlamula a ku: “Vhela, Eliya a ta ta naswona a ta lunghisa swilo hinkwaswu.+
12 Kambe na mi byela: Eliya se a tile kambe a va mu tivanga naswona va yendle ku rhandza hi yena.+ Na yena N’wana wa munhu a ta hluphisiwa swoleswo amandleni ya vona.”+
13 Se hi kona vadjondzisiwa va nga swi twisisa swaku a a vulavula hi Yohani Mutsakamisi.
14 Naswona nkama va nga fika ka xitshungu,+ wanuna mun’wani a mu tshinelela a fika a khizama a ku:
15 “Hosi, mu tweli wusiwana n’wana wa mina hikusa a ni mavabyi ya ku wa* naswona a karhateka swinene; minkama ya yinyingi a tshamela ku wa ka ndzilu ni le ka mati;+
16 ni mu yise ka vadjondzisiwa va wena kambe a va swi kotanga ku mu hanyisa.”
17 Yesu a hlamula a ku: “N’wina vanhu* va ku biha ni va ku pfumala lipfumelo,+ kasi ni ta tama ni va na n’wina anze siku muni? Ni ta mi lehisela mbilu anze siku muni ke? Mu tiseni halenu.”
18 Kutani Yesu a hlongola dimoni, li gama li huma ka djaha; se djaha li hanya hi nkama wolowo.+
19 Se vadjondzisiwa va ya ka Yesu hi tlhelo va ku: “Hi mhaka muni hi nga swi kotanga ku li hlongola?”
20 A va hlamula a ku: “Hi mhaka ya leswi mi nga ni lipfumelo lalitsongo. Hikusa ni mi byela ntiyiso: Loko mi ni lipfumelo la ku ringana ni mbewu ya sinapi,* mi ta byela ntshava leyi mi ku: ‘Suka lani u ya lee!’ Kutani yi ta suka, naswona a xi kona lexi nga ta mi tsandza.”+
21 *——
22 Na va ha hlengeletanile aGalileya, Yesu a va byela leswi: “N’wana wa munhu a ta xavisiwa ka valala+
23 naswona va ta mu dlaya, kutani a ta pfuxiwa hi siku la wunharhu.”+ Se vadjondzisiwa va vaviseka hintamu.
24 Nkama va nga fika Kapernawume, vahakelisi va rhesa* la tempele va tshinelela Pedru va mu vutisa va ku: “Indjhe mudjondzisi wa n’wina wa hakela rhesa la tempele?”+
25 A va hlamula a ku: “Ina.” Kambe nkama va nga nghena ndlwini, Yesu a tekele ku mu vutisa a ku: “U swi vonisa ku yini Simoni? Tihosi ta misava ti nyikiwa hi vamani male ya rhesa?* Ti nyikiwa hi vana va tona kumbe hi vanhu va le handle?”
26 A hlamula a ku: “Hi vanhu va le handle”; se Yesu a ku: “Kutani vana va tona a va hakeli rhesa.
27 Kambe leswaku hi nga va kwatisi,+ yana lwandle u ya hoxa ndzovo;* se hlampfi ya ku sungula leyi u nga ta yi phasa, yi pfuli nomo; kutani u ta kuma male ya nsimbi ya prata.* Yi teki u ya hakelela mina na wena.”
Tinhlamunselu ta le hansi
^ Kumbe: “kara la”.
^ Kumbe: “ya wheti”.
^ Kumbe: “geração”.
^ Vona Ntlhamuselo ya le hansi ya Matewu 13:31.
^ Vona Xiyengetelo A3.
^ Hi Xigriki: “tidrakma timbirhi ta nsimbi” leti a ti ringana muholo wa masiku mambirhi. Vona Xiyengentelo B14.
^ Leyi i rhesa leyi a yi hakeliwa hi vanhu hinkwavu.
^ Kumbe: “anzoli.”
^ Hi Xigriki: “male ya nsimbi ya statera,” leyi a yi vitaniwa tetradrakma. Vona Xiyengetelo B14.
