Mintirho Ya Vapostolo 20:1-38
20 Nkama ku nga hela mpfilumpfilu, Pawulo a vitane vadjondzisiwa a fika a va tiyisa ni ku va salisa a gama a ya Makedoniya.
2 Na se a hundze hi ka xidoropani xin’wani ni xin’wani xa kolanu, ni ku tiyisa vapfumeli, a game a ya Gresiya.
3 A hete tihweti tinharhu kolanu, kambe nkama a a lava ku ya khwela boti a ya Siriya a tsumbule swaku Vayuda+ a va yendle maplanu* ya ku mu dlaya, se a yendla xiboho xa ku tlhela hi Makedoniya.
4 A fambe na Sopatera n’wana wa Piro wa le Bereya, Arixtaku+ na Sekundu va le Tesalonika, Gayo wa le Derbi, na Timotiya,+ na Tikiko+ na Trofimu+ lava taka hi ka provhinsiya la Aziya.
5 Vavanuna lava va rhange va famba va ya hi nyimela Trowasi;
6 kambe hi suke Filipiya hi boti nkama fexta la Mapawu ya Ku Kala Fermentu+ li nga hundza, hi hete 5 wa masiku swaku hi fika ka vona aTrowasi naswona hi fike hi tshama kolanu 7 wa masiku.
7 Hi siku la ku sungula* ka vhiki, nkama hi nga tlhangana swaku hi dla swakudla, Pawulo a sungule ku vulavula na vona hikusa a a ta famba hi mundzuku ka kona; naswona a vulavule na vona nkama wa wunyingi ku za ku va xikarhi ka wusiku.
8 A ku ni mimotso* ya yinyingi ka sala la le henhla lomu a hi tlhangane kona.
9 Se djaha lin’wani leli vitaniwaka Yutiku a li tshame ka janela, se a nkama Pawulo a a vulavula li yetlela swa wugamu li gama li wa ku sukela ka andari la wunharhu; se va ya li tlakula na li file.
10 Kambe Pawulo a ya ka andari la le hansi a fika a tilata henhla ka lona a gama a li barasara+ a ku: “Mi nga karhatekeni hikusa wa hanya.”+
11 A gama a ya ka andari la le henhla a fika a phamela swakudla* a dla. A tame a bula na vona nkama wa wunyingi anze ku va mpundzu, se a gama a famba.
12 Se va teka djaha leli va famba na lona na va tsake ngopfu hileswi a li pfuxiwile.
13 Se hi game hi khwela boti hi ya ka doropa la Aso, kambe Pawulo a fambe hi minenge. Hi fike hi mu teka kolanu hi boti hikusa a hi kombele ku yendla swoleswo.
14 Hi fike hi mu kuma le Aso, se hi famba na yena hi boti hi ya Mitileni.
15 Hi mundzuku ka kona hi suke Mitileni hi boti hi ya fika kusuhi ni le Kiyo. Se hi siku la wumbirhi hi fike Samosi naswona hi siku la wunharhu hi ye hi ya fika Mileto.
16 Pawulo a a bohe ku nga yi Efeza,+ a a nga lavi ku dla nkama ka provhinsiya la Aziya hikusa a a djahele ku ya fika Yerusalema+ hi siku la Fexta la Pentekoxta loko swi koteka.
17 Kambe na a li Mileto, a rhumele rito swaku ku vitaniwa madoda ya bandla la Efeza.
18 Nkama ma nga fika a te: “Mi swi tiva kahle leswi ni nga hanyisana xiswona na n’wina ku sukela siku la ku sungula leli ni nga nghena ka provhinsiya la Aziya.+
19 Ni tirhele Hosi ku fana ni xikarawa hi ku tiveka hansi swinene,+ a ni rila ni tlhela ni hlupheka nkama Vayuda a va lava ku ni dlaya,
20 kambe a ni tshikanga ku mi byela minchumu leyi nga ta mi pfuna, ni ku mi djondzisa lomu ka vanhu+ ni tlhela ni chumayela hi munti ni munti.+
21 Kambe ni chumayele hi ku helela ka Vayuda ni ka Vagriki swaku va tilaya+ va gandzela Xikwembu, va tlhela va va ni lipfumelo ka Hosi ya hina Yesu.+
22 Se swoswi moya wa ku kwetsima wu ni byela* ku ya Yerusalema, hambileswi ni kalaka ni nga swi tivi swaku ku ta yendleka yini hi mina koseniyani,
23 funtshi loko ni famba ka doropa lin’wani ni lin’wani moya wa ku kwetsima wu tshamela ku ni byela swaku ni ta khomiwa ni tlhela ni hluphiwa.+
24 Kambe a ni teki wutomi la mina li li la lisima ka mina; lexi ni xi lavaka i ku heta hinkwaswu leswi ni faneleke ni swi yendla+ ni ntirho lowu Hosi Yesu a nga ni rhuma wa ku chumayela mahungu ya ku tsakisa ya timpsalu tatikulu ta Xikwembu.
25 “Se na swi tiva swaku hinkwenu ka n’wina ni nga mi chumayela hi Mfumu a mi nge he tlheli mi ni vona.
26 Hi mhaka leyo, ni mi vitanile swaku mi ta va timboni namuntlha swaku ni basile ka nandzu wa ngati ya vanhu hinkwavu+
27 hikusa a ni tshikanga ku mi byela minchumu hinkwayu leyi taka hi ka Xikwembu.+
28 Tihlayiseni+ mi tlhela mi hlayisa ni ntlhambi hinkwawu, lowu moya wa ku kwetsima wu nga mi veka ku va vavoneleli va wona,+ leswaku mi risa bandla la Xikwembu+ leli xi nga li xava hi ngati ya N’wana wa xona.+
29 Na swi tiva swaku loko se ni fambile ku ta sala ku nghena mahlolwa* ya ku leva xikarhi ka n’wina+ naswona ma ta xanisa ntlhambi,
30 naswona xikarhi ka n’wina ku ta va ni vavanuna lava nga ta djondzisa mavunhwa kuva va tikokela vadjondzisiwa.+
31 “Kutani tshamani mi rindzile, mi nga khohlwi swaku ni hete malembe manharhu+ na ni nga tshiki ku mi khumbukisa wusiku ni nhlikanhi na ni rila.
32 Se swoswi ni mi nyikela ka Xikwembu ni le ka rito la xona la timpsalu tatikulu, ku nga rito leli nga ta mi yaka ni ku mi nyika tshomba xikarhi ka hinkwavu lava Xikwembu xi nga va langa swaku va va vakwetsimi.+
33 A ni navelanga prata, woru kumbe mpahla ya munhu mun’wani.+
34 Mi swi tiva kahle na n’wina swaku a ni titirhela hi mavoko ya mina+ ni ku pfuna lava a ni li na vona.
35 Ka hinkwaswu, ni mi kombe hi mintirho ya mina+ swaku mi fanele mi pfuna lava kalaka va nga tiyanga. Naswona mi fanele mi khumbuka marito ya Hosi Yesu nkama a nga te: ‘Swi tsakisa hintamu ku nyika+ ku tlula ku yamukela.’”
36 Nkama a nga gama ku hlaya leswo, a khizame na vona hinkwavu a khongela.
37 Kutani hinkwavu va sungula ku rila, va gama va barasara Pawulo va tlhela va mu bejara,*
38 hikusa a va vavisekile hintamu hileswi a nga va byela swaku a va nge he tlheli va mu vona.+ Se va gama va mu heleketa ka boti.
Tinhlamunselu ta le hansi
^ Kumbe: “makungu”.
^ Ku nga siku leli hi li vitanaka Domingo. Ka Vayuda a vhiki a li sungula hi siku leli.
^ Kumbe: “malambhu”.
^ Hi Xigriki: “a khema pawu”.
^ Kumbe: “sindzisa”.
^ Ku nga muxaka wa mbyana ya nhova.
^ Kumbe: “n’quta; nyunta”.
