Mintirho Ya Vapostolo 25:1-27
25 Nkama Fexto+ a nga fika ka provhinsiya la yena naswona a sungule ku fuma, a suke Khezariya a ya Yerusalema nkama ku nga hundza masiku manharhu.
2 Se vaprista vavakulu ni vavanuna va lisima va Vayuda va mu byela hi timhaka ta Pawulo.+ Kutani va sungula ku kombela Fexto
3 swaku a rhumela Pawulo aYerusalema. Kasi a va yendle maplanu* ya ku tumbelela Pawulo ndleleni swaku va ta mu dlaya.+
4 Kambe Fexto a va byele swaku Pawulo a nge susiwi Khezariya ni leswaku yena a a li kusuhi ni ku tlhelela kona.
5 A tlhela a ku: “Varhangeli va n’wina a va fambe na mina, va ta kota ku ya tlhamusela nandzu wa kona, loko ku ni lexi wanuna lweyi a nga wonha xona.”+
6 Nkama Fexto a nga tshama na vona 8 kumbe 10 wa masiku, a game a ya Khezariya; hi mundzuku ka kona, a fike a tshama ka xitshamu xa ku yavanyisa se a rhumisa swaku ku tisiwa Pawulo.
7 Nkama Pawulo a nga fika, Vayuda lava a va ta hi Yerusalema va mu rhendzela, va sungula ku mu lumbeta minandzu ya yinyingi ya ku chavisa leyi a va nga na wufakazi la yona.+
8 Kambe Pawulo a va hlamula a ku: “A ni tlulanga Nawu wa Vayuda, wa tempele kumbe wa Khezari.”+
9 Leswi Fexto a a lava ku tsakisa Vayuda,+ a hlamule Pawulo a ku: “Wa swi lava ku ya Yerusalema swaku ni ta ya ku thethisa kona ke?”
10 Pawulo a ku: “Ni nyime phambheni ka xitshamu ku yavanyisa xa Khezari, lani ni faneleke ni thethisiwa kona. A ni va wonhelanga nchumu Vayuda, na wena se wa swi vona leswo.
11 Kambe loko ni wonhile naswona ni yendle nchumu lexi faneliwaka hi ku yavanyiseliwa lifu,+ a ni chavi ku fa; kambe loko ku nga na wufakazi la leswi vavanuna lava va ni nyikaka nandzu hi swona, a ku na munhu lweyi a nga ni mfanelo ya ku ni yisa ka vona swaku a ta va tsakisa. Ni kombela ku ya thethisiwa hi Khezari!”+
12 Nkama Fexto a nga vulavula ni vatsundzuxi a game a hlamula Pawulo a ku: “U kombele ku ya thethisiwa hi Khezari, u ta ya ka Khezari.”
13 Na se ku hundze masikunyana, Hosi Agripa na Bernika va tile Khezariya va ta pfuxela Fexto.
14 Leswi a va ta tshama masikunyana kolanu, Fexto a byele hosi timhaka ta Pawulo a ku:
“Ku ni wanuna mun’we lweyi Felikisi a nga mu tshika djele,
15 se nkama na ni li Yerusalema, vaprista vavakulu ni madoda ya Vayuda va te va ta mu mangalela+ na va lava swaku ni mu khatisa.
16 Kambe ni va hlamulile swaku nawu wa Varoma wa tsimbisa ku khatisa munhu swaku ku tsakisiwa van’wani na a nga se vonana ni lava mu mangalelaka swaku a ta tihlamulela ka vona.+
17 Se nkama va nga fika, a na ha hlwelanga; hi mundzuku ka kona, ni tshame ka xitshamu xa ku yavanyisa ni va rhuma swaku va ni tisela wanuna lweyi.
18 Nkama lava mangalelaka Pawulo va nga sekeleka va vulavula, a ni kumanga nchumu ni xin’we xa ku biha ka leswi a va mu nyika nandzu hi swona.+
19 Lexi a va phikizana na yena hi xona i ta wukhongeli la vona+ ni hi mhaka ya wanuna lweyi a a vitaniwa Yesu, lweyi a nga fa kambe Pawulo a tshamelaka ku vula swaku wa hanya.+
20 Se leswi a ni nga swi tivi swaku ni ta yi tamelisa ku yini mhaka leyi, ni vutise Pawulo swaku a a swi lava ku ya Yerusalema a ya thethisiwa kona ke.+
21 Kambe Pawulo a kombele ku tshikiwa djele anze a thethisiwa hi Khezari,*+ se ni va rhume swaku va mu tshika djele anze ni mu rhumela ka Khezari.”
22 Kutani Agripa a byela Fexto a ku: “Ni lava ku mu twa hi noxe wanuna lweyi.”+ Fexto a ku: “Ni ta ku tisela yena mundzuku.”
23 Se hi mundzuku ka kona, Agripa na Bernika va te na va yambale mpahla ya ku phatima va tlhela va gwira, va fika va nghena ka sala la mintlhanganu na va ni vakomandanti ni vavanuna va lisima va doropa; se Fexto a rhumisa swaku ku tisiwa Pawulo.
24 Kutani Fexto a ku: “Hosi Agripa na n’wina hinkwenu mi nga lomu namuntlha, wanuna lweyi, hi lweyi Vayuda hinkwavu aYerusalema ni kola va nga ni kombela swaku a dlayiwa.+
25 Kambe ni kume swaku a nga yendlanga nchumu lexi nga yendlaka a faneliwa hi ku fa.+ Se nkama wanuna lweyi a nga yendla xikombelo xa leswaku mhaka ya yena yi ya thethiwa hi Khezari, ni yendle xiboho xa ku mu rhumela ka yena.
26 Kambe a ni swi tivi swaku Hosi ya mina ni ta yi tsalela ni ku wanuna lweyi a wonhe yini. Hi leswo swi nga yendla ni mu tisa ka n’wina, ngopfungopfu phambheni ka wena Hosi Agripa; devhi loko se mi mu thethisile, ni ta kuma xa ku xi tsala.
27 Hikusa swi tikomba na swi nga twali ka mina ku rhumela xib’ochwa na ni nga vuli nandzu wa xona.”
Tinhlamunselu ta le hansi
^ Kumbe: “makungu”.
^ Kumbe: “Auguxtu”. Vito leli a li nyikiwa mufumi wa Roma.
