Nehemiya 1:1-11
1 Lawa i marito ya Nehemiya*+ n’wana wa Akaliya: Hi wheti ya Kislevhi,* hi lembe la wu 20, a ni li ndlwini ya wuhosi aXuxani.*+
2 Hi nkama wolowo, Hanane+ mun’wani wa vamakwerhu a fika ni vavanuna van’wani lava taka hi Yuda, kutani ni va vutisa swaku swo yini hi Vayuda lava va nga vuya hi wukaraweni+ ni hi doropa la Yerusalema.
3 Se va ku: “Lava nga ka provhinsiya lava va nga vuya hi le wukaraweni, va kumane ni mahlomulu yamakulu funtshi va twelisa ni wusiwana.+ Mimuru ya Yerusalema yi diliziwile+ naswona swipfalu swa kona swi hisiwile.”+
4 Nkama ni nga twa marito lawa, ni tshame hansi ni sungula ku rila. Ni hete masiku ya manyingi na na ha rila, ni nga dli nchumu+ ni khongela ka Xikwembu xa le tilweni,
5 ni ku: “Yehovha Xikwembu xa le tilweni, Xikwembu lexikulu ni xa ku hlonipheka, lexi hlayisaka ntwananu wa xona naswona xi rhandzaka lava xi rhandzaka va tlhela va yingisa minawu ya xona,+
6 ni kombela u pfula tindleve ta wena naswona u pfula matihlo, u yingisa xikhongelo lexi mina mutirheli wa wena ni ku yendlelaka xona namuntlha. Ni khongela wusiku ni nhlikanhi,+ ni khongelela vanhu va wena ku nga Vayisrayele, ni vula swidjoho leswi Vayisrayele va nga swi yendla. Mina ni vanhu va mina* hi djohile.+
7 Phela hi ku djohelile+ hi ku tshika hinkwaswu leswi u nga hi rhuma swona, minawu ni swiboho swa ku yavanyisa leswi u nga swi nyika Moxe mutirheli wa wena.+
8 “Ni kombela u khumbuka rito leli u nga li byela Moxe mutirheli wa wena, u ku: ‘Phela loko mi nga tshembeki, ni ta mi hangalasa axikarhi ka matiko.+
9 Kambe loko mi vuya ka mina mi tlhela mi yingisa minawu ya mina, hambiloko vanhu va wena lava nga hangalaka va li magamu ka misava, ni ta va hlengeleta+ ni va veka ka ndhawu leyi ni nga yi langa swaku vito la mina li dzunisiwa kona.’+
10 Phela vona i vatirheli va wena ni vanhu va wena lava u nga va ponisa hi ntamu wa wena wawukulu ni hi voko la wena la matimba.+
11 Yehovha, ni kombela u yingisela kahle xikhongelo xa mutirheli wa wena ni swikhongelo swa vatirheli va wena lava hloniphaka vito la wena, ni kombela u yendla swaku swi ni fambela kahle namuntlha, u yendla leswaku wanuna lweyi a ni twela wusiwana.”+
Hi nkama wolowo a ni li mucheli wa vhinyu la hosi.+
Tinhlamunselu ta le hansi
^ Leswi vulaka “Yah Wa Tiyisa”.
^ Vona Xiyengetelo B15.
^ Kumbe: “aSuza.”
^ Hi Xiheberu: “yindlo ya papayi wa mina”.
