Nehemiya 13:1-31
13 Hi siku lolelo vanhu va lerheliwe buku ya Moxe+ naswona a ku tsaliwe swaku Vaamoni kumbe Vamowabu+ a va nga fanelanga va nghena lomu vanhu va Xikwembu xa ntiyiso va nga tlhangana kona,+
2 hikusa a va zanga va nyika Vayisrayele pawu ni mati, kambe va thole Balamu swaku a va rhuka.+ Kambe Xikwembu xa hina xi txintxe xirhuku swaku xi va nkateko.+
3 Nkama va nga twa Nawu lowu, hinkwavu lava taka hi ka matiko man’wani va suka xikarhi ka Vayisrayele.+
4 Na ku nga se yendleka mhaka leyi, muprista lweyi a a vonelela tindhawu ta ku veka swakudla ka yindlo* ya Xikwembu xa hina+ a ku li Eliyaxibi,+ xaka la Tobiya.+
5 A a nyike Tobiya ndhawu yayikulu ya ku veka swakudla leyi khale a ku vekiwa gandzelo la swakudla, olibanu,* swibya, swa wukhume* swa trigu, vhinyu la nyuwani ni mafurha+ leswi Valevhi,+ vayimbeleli ni vagwardu va tinyanghwa a va ni mfanelo ya ku swi tirhisa ku patsa ni minyikelo ya vaprista.+
6 Nkama hinkwawu lowu, a ni nga li kona aYerusalema, hikusa a ni ye ka hosi hi lembe la wu 32+ la ku fuma ka Hosi Artaxexe+ wa le Babilona; kutani ni gama ni kombela hosi swaku ni famba.
7 Se ni fika Yerusalema ni vona swilo swa ku biha hintamu leswi Eliyaxibi+ a nga swi yendla, hi ku nyika Tobiya+ ndhawu ya ku vekisa swilo ka kintari* wa yindlo ya Xikwembu xa ntiyiso.
8 Mhaka leyi yi ni nyenyentse hintamu, se ni humesa swilo hinkwaswu swa Tobiya ni swi txukumeta handle.
9 Ni game ni rhumisa swaku ku basisiwa ndhawu ya ku veka swakudla; kutani ni tlhelisela swibya swa yindlo ya Xikwembu xa ntiyiso+ ka yona, ku patsa ni gandzelo la swakudla ni olibanu.+
10 Ni tlhele ni tsumbula swaku Valevhi+ a va nga ha nyikiwi leswi a va fanele va swi kuma,+ leswi nga yendla swaku Valevhi ni vayimbeleli va tlhelela ka masimu ya vona.+
11 Ni laye vapfunisi va tihosi+ ni ku: “Hi mhaka muni mi tshike ku hlayisa yindlo ya Xikwembu xa ntiyiso ke?”+ Ni gama ni tlhelisela Valevhi ka ntirho wa vona.
12 Se hinkwavu lava tshamaka Yuda, va tisa swa wukhume+ swa trigu, swa vhinyu la nyuwani ni swa mafurha ka tindhawu ta ku veka minchumu.+
13 Ni tlhela ni langa muprista Xelemiya, Zadoki lweyi a a li mutsali na Pedaya wa Mulevhi swaku va hlayisa leswi a swi vekiwa ka tindhawu ta ku veka minchumu naswona a va pfuniwa hi Hanani n’wana wa Zakuri, ntukulu wa Mataniya, hikusa a va li vavanuna va ku tshembeka. Ntirho wa vona a wu li wa ku phakela vamakwavu.
14 Ni khumbuki+ Xikwembu xa mina, naswona u nga yi khohlwi mintirho ya mina ya lirhandzu leyi ni nga yi yendlela yindlo ya wena ni lava tirhaka ka yona.+
15 Ka masiku wolawo, ni vone vanhu aYuda na va hamba vhinyu hi Savata,+ va tisa trigu la linyingi hi timbongolo, vhinyu,* mawuvha, makuwa ni minchumu ya ku hambanahambana aYerusalema hi siku la Savata.+ Se ni va ba ndleve swaku swi ni khombo ku xavisa hi siku lolelo.*
16 Vanhu va le Tiru lava a va tshama doropeni, a va ta ni tihlampfi ni minchumu yin’wani, va yi xavisela vanhu va Yuda ni le Yerusalema hi Savata.+
17 Se ni laya varhangeli va Yuda ni ku: “Hi mhaka muni mi yendla swilo swa ku biha swa ku fana ni leswi, mo kala mi nga swi voni swaku mi chakisa siku la Savata ke?
18 A hi swona leswi nga yendliwa hi vavhovho va n’wina, lakakuva Xikwembu xi za xi tisa khombo ka hina ni ka doropa leli? Kambe swoswi mi yendla swaku Israyele a kwateliwa hintamu hi mhaka ya ku chakisa Savata.”+
19 Se ni rhumisa swaku ku pfaliwa swipfalu aYerusalema loko ku sungula ku mphuma na Savata yi nga se sungula. Ni tlhela ni rhumisa swaku swi nga pfuliwi anze ku hundza Savata; ni veka van’wani va vatirhi va mina swaku va rindza swipfalu va tiyiseka swaku vaxavisi va nga ngheni hi siku la Savata.
20 Kutani vaxavi ni vaxavisi va minchumu ya ku hambanahambana va yetlele handle ka doropa la Yerusalema kan’we kumbe kambirhi.
21 Se ni va holovisa ni ku: “Hi mhaka muni mi yetlela phambheni ka muru wa doropa? Loko mo tlhela mi yetlela lani ni ta mi susa hi nkanu.” Ku sukela ka siku lolelo, a va ha zanga va vuya hi Savata.
22 Se ni byela Valevhi swaku va fanele va tibasisa nkama ni nkama, va ta va ta rindza swipfalu leswaku siku la Savata li tshama na li kwetsima.+ Ni ka mhaka leyi, ni kombela u ni khumbuka Xikwembu xa mina, u ni twela wusiwana hi mhaka ya lirhandzu la wena.+
23 Ka masiku wolawo, ni tlhele ni vona Vayuda lava nga chada ni vavasati+ va le Axidodi,+ Amoni ni Mowabu.+
24 Hafu ya vana va vona a va khuluma Xiaxidodi naswona hafu leyin’wani a yi vulavula lirimi la vanhu van’wani, kambe a nga kona ni mun’we lweyi a a tiva lirimi la Vayuda.
25 Kutani ni va laya, ni tlhela ni va rhuka, kasi van’wani+ ni va ba ni va tsuvula ni misisi, ni va yendla va funga hi Xikwembu ni ku: “Mi nga tshuki mi pfumela leswaku vana va n’wina va tintombhi va tekiwa hi vana va vona, ni vana va vona va tintombhi mi nga tshuki mi va teka kumbe va tekiwa hi vana va n’wina.+
26 A hi swona leswi nga djohisa Hosi Solomoni wa Israyele ke? Phela xikarhi ka matiko ya manyingi a ku nga na hosi leyi fanaka na yena;+ naswona a a rhandziwa hi Xikwembu xa yena,+ lakakuva Xikwembu xi mu yendla hosi ya tiko hinkwalu la Israyele. Kambe vavasati va matiko va mu djohisile.+
27 A swi kholwise swaku hi n’wina mi yendlaka nchumu lowu wa ku biha hintamu hi ku kala mi nga tshembeki ka Xikwembu xa hina, hi ku teka vavasati va matiko.”+
28 Mun’wani wa vana va Yoyada+ n’wana wa Eliyaxibi+ muprista wamukulu a a li mukon’wani wa Sanibalati+ wa Muhoroni. Se ni mu hlongolile.
29 Xikwembu xa mina, va khumbuke u va khatisa hi mhaka ya leswi va nga chakisa wuprista ni ntwananu wa wuprista+ ni Valevhi.+
30 Se ni va basisa hi ku va tshikisa mintirho hinkwayu ya ku biha ya vamatiko, kutani ni nyika vaprista ni Valevhi mintirho ya vona,+
31 ni tlhela ni tiyiseka swaku tihunyi+ ni mihandzu leyi yi rhangaka yi wupfa swi tisiwa hi minkama leyi yi nga vekiwa.
Xikwembu xa mina, ni khumbuki, u ni katekisa.+
Tinhlamunselu ta le hansi
^ Kumbe: “tempele”.
^ Muxaka wa swinun’hwelisu wa ku loko wu hisiwa wu humesa ximusi xa ku nun’hwela.
^ Kumbe: “dizímos”.
^ Vona Ntlhamuselo.
^ Hi Xiheberu: “na va li ku kandziheteleni ka swikamelo swa mawuvha”.
^ Kumbexana: “ni va ba ndleve hi siku lolelo swaku va nga xavisi nchumu.”
