Nehemiya 8:1-18
8 Se vanhu hinkwavu va hlengeletana hi xikongomelo xin’we ka ndhawu ya ku pfuleka ya doropa phambheni ka Nyanghwa wa Mati,+ kutani va byela Ezra+ lweyi a a li mutsali swaku a tisa buku ya Nawu wa Moxe,+ lowu Yehovha a nga wu nyika Vayisrayele.+
2 Se hi siku la ku sungula la wheti ya wu 7,+ muprista Ezra a tisa buku ya Nawu phambheni ka vavanuna, vavasati ni hinkwavu+ lava nga ta yingisela va tlhela va twisisa.
3 Kutani a yi lerha hi rito la ku twala+ ka ndhawu ya ku pfuleka leyi nga xikarhi ka doropa phambheni ka Nyanghwa wa Mati, ku sukela nimixo anze ninhlikanhi, a yi lerhela vavanuna, vavasati ni hinkwavu lava kotaka ku twisisa; naswona vanhu a va yingisela kahle+ nkama buku ya Nawu a yi lerhiwa.
4 Ezra lweyi a a li mutsali a a nyime henhla ka palku la mapulangu, leli a li yendleliwe ntlhanganu wolowo; ka tlhelo la yena la xinene a ku nyime Matitiya, Xema, Anaya, Uriya, Hilikiya na Mazeya; ka tlhelo la yena la ximatsi a ku na Pedaya, Mixayele, Malikiya,+ Axumi, Haxibadani, Zakariya na Mexulami.
5 Ezra a pfula buku phambheni ka vanhu hinkwavu naswona a va mu vona hikusa a a li ka palku. Nkama a nga yi pfula, hinkwavu va sekeleka.
6 Kutani Ezra a dzunisa Yehovha Xikwembu xa ntiyiso, Hosi leyi nga ni matimba, se vanhu hinkwavu va hlamula va ku: “Amen!* Amen!”+ va tlakusa mavoko. Kutani va khizama phambheni ka Yehovha va txuvuka hansi.
7 Yexuwa, Bani, Xerebiya,+ Yamini, Akubi, Xabetayi, Odiya, Mazeya, Kelita, Azariya, Yozabadi,+ Hanani na Pelaya lava a va li Valevhi, a va tlhamusela Nawu na vanhu+ va nyimile.
8 Kutani va tama va lerha Nawu wa Xikwembu xa ntiyiso, va wu tlhamusela kahle, va wu yendla wu twisiseka. Hi ku yendla leswo, va pfune vanhu swaku va twisisa leswi a swi lerhiwa.+
9 Se Nehemiya lweyi a a li govhernadori,* muprista Ezra+ lweyi a a li mutsali ni Valevhi lava a va djondzisa vanhu, va byela vanhu hinkwavu va ku: “Siku leli la kwetsima ka Yehovha Xikwembu xa n’wina.+ Mi nga tshuki mi xukuvala kumbe mi rila.” Hikusa vanhu hinkwavu a vo rila nkama a va twa leswi a swi lerhiwa ka buku ya Nawu.
10 Nehemiya a ku: “Fambani mi ya dla swakudla swa ku nona mi phuza swa ku lombela, mi tlhela mi nyika+ lava va kalaka va nga li na swona hikusa siku leli la kwetsima ka Hosi ya hina, mi nga karhateki hikusa ku tsaka loku taka hi ka Yehovha i xivhikelo* xa n’wina.”
11 Valevhi a va miyetela vanhu hinkwavu va ku: “Mi nga rili, hikusa siku leli la kwetsima, mi nga xukuvaleni.”
12 Kutani vanhu hinkwavu va famba va ya dla, va phuza va tlhela va nyika van’wani swakudla, funtshi a va tsakile hintamu+ hikusa va ma twisisile marito lawa va nga byeliwa wona.+
13 Hi siku la wumbirhi, varhangeli hinkwavu va mindjangu, vaprista ni Valevhi, va hlengeletana ka Ezra lweyi a a li mutsali swaku a ta va pfuna ku wu twisisa kahle Nawu.
14 Se ka buku ya Nawu va kume swaku Yehovha hi ku tirhisa Moxe a rhume Vayisrayele swaku va tshama ka minchacha* hi nkama wa fexta hi wheti ya wu 7,+
15 ni swaku va fanele va byela vanhu+ hinkwavu ka madoropa ni le Yerusalema, va ku: “Fambani tintshaveni, mi ya lava tigadja ta minsinya ya mawolivhera, ta minsinya ya nzululwani,* ta minsinya ya murta, ta minsinya ya mintxindzu ni ta minsinya leyi nga ni matluka ya manyingi leswaku hi ta yaka minchacha, hi ku ya hi leswi nga tsaliwa.”
16 Se vanhu va famba va ya vuya na tona swaku va tiyakela minchacha, mun’wani ni mun’wani a yaka henhla ka yindlo* ya yena kasi van’wani ka mikintari ya vona, ka kintari* wa yindlo ya Xikwembu xa ntiyiso,+ phambheni ka Nyanghwa wa Mati+ ni le phambheni ka Nyanghwa wa Efrayimi.+
17 Kutani hinkwavu lava va nga vuya hi le wukaraweni va yaka minchacha va tshama ka yona. Phela Vayisrayele a va nge se tshama va swi yendla leswo ku sukela ka nkama wa Yoxuwa+ n’wana wa Nuni, se va tsaka hintamu.+
18 Naswona siku ni siku a ku lerhiwa buku ya Nawu wa Xikwembu xa ntiyiso,+ ku sukela ka siku la ku sungula anze ka siku la wugamu. Va hete 7 wa masiku na va hamba fexta lolelo, kutani hi siku la wu 8 ku ve ni ntlhanganu* wa ku hlawuleka, hi ku ya hi leswi nga tsaliwa.+
Tinhlamunselu ta le hansi
^ Kumbe: “A ku yendleke swoleswo.”
^ Kumbe: “Tirixata”. Ku nga leswi a a vitanisiwa swona govhernadori wa provhinsiya la Persiya.
^ Kumbe: “matimba ya”.
^ Kumbe: “ndhawu ya ku tshama swa nkamanyana; matabernakela”.
^ Kumbe: “pinyeru”.
^ Vona Ntlhamuselo.
^ Ku nga mavharanda ya le henhla ka tiyindlo.
^ Kumbe: “asembleya”.
