Ruti 3:1-18
3 Nawomi a vutisa Ruti a ku: “N’wananga, a ni fanelanga ni ku lavela munhu wa ku chada* na yena+ swaku u ta tshamiseka ke?
2 Bowazi i xaka la nuna wa mina.+ Phela tintombhi leti a wu tirha na tona i vatirhi va yena. Namuntlha niwusiku a ta va na a phephera maxalani* ka ndhawu ya ku phepherela ka yona.
3 Kutani hlamba u tlhela u tola mafurha ya ku nun’hwela, u yambala mpahla u saseka u gama u famba ka ndhawu ya ku phepherela ka yona. U nga humeleli ka Bowazi anze a gama ku dla ni ku phuza.
4 Nkama a nga ta ya ku yetleleni, vona lomu a nga ta ya yetlela kona; se u fika u gwavula mubalu* ka minenge ya yena, u yetlela kolanu. A ta ku byela leswi u faneleke u swi yendla.”
5 Se Ruti a ku: “Ni ta yendla hinkwaswu leswi u ni byelaka swona.”
6 Kutani a famba a ya ka ndhawu leyi ku phepheriwaka kona, a fika a yendla hinkwaswu leswi Nawomi a nga mu byela swona.
7 Hi nkama wolowo Bowazi a a dla a tlhela a nwa, funtshi mbilu ya yena a yi tsakile. Se a famba a ya yetlela atlhelweni ka nyandza ya maxalani. Kutani Ruti a nyanimela, a fika a gwavula mubalu ka minenge ya Bowazi, a yetlela.
8 A xikarhi ka wusiku, Bowazi a biwa hi xirhami, se a pfuka, a kuma swaku ku ni wansati lweyi a nga yetlela ka minenge ya yena.
9 Kutani a ku: “Hi wena mani?” Yena a hlamula a ku: “Hi mina Ruti mutirhi wa wena. Ni funengeti hi mubalu wa wena, hikusa u xaka la Elimeleki funtshi hi wena u nga ni mfanelo ya ku hi ponisa ka swikarhatu swa hina.”*+
10 Bowazi a ku: “Yehovha a a ku katekisi n’wananga. Swoswi u kombise lirhandzu lalikulu ku tlula ku sunguleni,+ hikusa a wu lavanga madjaha lawa ma nga swisiwana kumbe lawa ma nga ganya.
11 Swoswi u nga chavi n’wananga. Hinkwaswu leswi u nga swi hlaya ni ta ku yendlela swona,+ hikusa hinkwavu ka doropa leli va swi tiva swaku u wansati wamunene.
12 I ntiyiso swaku ni xaka la Elimeleki,+ kambe ku ni xaka la kusuhi ku tlula mina leli nga ni mfanelo ya ku mi ponisa ka swikarhatu swa n’wina.+
13 Yetlela lani wusiku la namuntlha, se mundzuku nimixo, loko xaka leli lo pfumela ku mi ponisa ka swikarhatu swa n’wina,+ a swi na mhaka! A li yendli swoleswo. Kambe loko li nga pfumeli, ni funga hi vito la Yehovha Xikwembu lexi hanyaka swaku ni ta mi ponisa. Yetlela kola anze li xa.”
14 Se a yetlela ka minenge ya yena a gama a pfuka nimixo na ka ha mphumile. Bowazi a ku: “Swi nga tiviwi hi munhu swaku ku te wansati ka ndhawu leyi ku phepheriwaka ka yona.”
15 A tlhela a ku: “Tisa nguvu leyi u nga yi yambala, u kangatela hi yona.” Loko se a kangatelile, a mu chelela 25 wa makilu* ya maxalani, a gama a mu rhwexa, se Bowazi a gama a tlhela a ya ka doropa.
16 Ruti a muka a ya ka Nawomi, se Nawomi a mu vutisa a ku: “Swi fambise ku yini n’wananga?” Kutani a mu byela hinkwaswu leswi Bowazi a nga mu yendlela swona.
17 A tlhela a ku: “A ni nyike 25 wa makilu* ya maxalani, a gama a ku: ‘U nga muki ka n’wingi wa wena na u nga na nchumu.’”
18 Nawomi a ku: “Tshama lani n’wananga anze u vona swaku mhaka leyi yi ta gamela kwini, hikusa Bowazi a nge humuli na a nga se yi lunghisa mhaka leyi namuntlha.”
Tinhlamunselu ta le hansi
^ Hi Xiheberu: “munti kumbe ndhawu ya ku tshama ka yona”.
^ Kumbe: “sevhada”.
^ Kumbe: “gumana”.
^ Ku nga ku teka nsati wa makwavu wa yena kumbe wa xaka leli nga fa.
^ Hi Xiheberu: “6 wa mimpimu ya tiseya”. Vona Xiyengetelo B14.
^ Hi Xiheberu: “6 wa mimpimu”. Vona Xiyengetelo B14.
