Tinhlayo 14:1-45
14 Kutani vanhu hinkwavu va sungula ku ba nkosi, va rila wusiku lolelo hinkwalu.+
2 Vayisrayele hinkwavu va sungula ku ngurangurela Moxe na Aroni,+ se vanhu hinkwavu va sungula ku va djikela va ku: “Loko a hi yo fa ka tiko la Gibita kumbe loko a hi yo fa kola mananga!
3 Hi mhaka muni Yehovha a hi tisa ka tiko leli swaku hi ta dlayiwa hi xipada?+ Valala va ta teka vasati va hina ni vana va hina.+ A swi yampsi hi tlhelela Gibita?”+
4 Va ze va byelana va ku: “A hi langeni murhangeli hi tlhelela Gibita!”+
5 Se Moxe na Aroni va khizama va txuvuka hansi na va li phambheni ka Vayisrayele hinkwavu.
6 Yoxuwa+ n’wana wa Nuni na Kalebe+ n’wana wa Yefune, lava a va li van’wani ka lava nga ya kambela tiko va handzula mpahla ya vona,
7 va byela Vayisrayele hinkwavu va ku: “Phela tiko leli hi nga ya li kambela i tiko lalinene ngopfu.+
8 Loko ho tsakisa Yehovha, a ta hi yisa ka tiko leli, a hi nyika lona, tiko leli nga tala hi leiti ni wulombe.+
9 Kambe a mi fanelanga mi terekela Yehovha naswona mi nga va chavi vanhu va tiko leliyani,+ hikusa hi ta va hlula.* Lexi a xi va vhikela xi sukile ka vona naswona Yehovha a na hina.+ Mi nga va chavi.”
10 Kambe vanhu hinkwavu a va vulavula hi ku va ba hi maribye.+ Se ku phatima ka Yehovha ku humelela ka tende la ntlhanganu ku voniwa hi Vayisrayele hinkwavu.+
11 Kutani Yehovha a byela Moxe a ku: “Kasi vanhu lava va ta tama va ni delela+ anze siku muni naswona a va nga ta va ni lipfumelo anze siku muni hambileswi ni nga va yendlela masingita hinkwawu lawa?+
12 Ni tshiki ni va ba hi ntungu ni va helisa, se ni yendla swaku wena u va tiko lalikulu ni leli nga ni matimba ku va tlula.”+
13 Kambe Moxe a byela Yehovha a ku: “Vagibita lava u nga humesa vanhu lava ka tiko la vona hi matimba ya wena va ta yi twa mhaka leyi,+
14 se va ta gama va byela vanhu lava tshamaka ka tiko leli. Phela vanhu lava, na vona va swi twile swaku wena Yehovha u le xikarhi ka vanhu lava,+ naswona u humelelile phambheni ka vona.+ Hi wena Yehovha, naswona rhefu la wena li nyime henhla ka vona, kutani u famba phambheni ka vona na u li ka rhefu lalikulu ninhlikanhi ni le ka ndzilu wawukulu niwusiku.+
15 Loko wo dlaya vanhu lava hi nkama wun’we, matiko lawa ma nga twa ndhuma ya wena ma ta ku:
16 ‘Yehovha a tsandzeke ku nghenisa vanhu lava ka tiko leli a nga funga swaku a ta va nyika, a gama a va dlaya amananga.’+
17 Yehovha, no kombela, va kombi matimba ya wena hilani u nga tshembisa hi kona u ku:
18 ‘Yehovha a hlwela ku kwata, a ni lirhandzu,+ a rivalela xidjoho ni ku kala ku yingisa nawu, kambe a nge tshuki a tshika ku khatisa lweyi a nga djoha, a ta khatisa vana hi mhaka ya swidjoho swa vapapayi va vona, a ta tlhela a yendla leswo ka lixaka la wunharhu ni ka lixaka la wu 4.’+
19 Leswi u nga ni lirhandzu ni kombela u rivalela xidjoho xa vanhu lava, ku fana ni leswi u nga va rivalela ku sukela Gibita ku ta fikela swoswi.”+
20 Kutani Yehovha a ku: “Na va rivalela hi mhaka ya leswi u nga kombela.+
21 Kambe ni funga hi mina swaku misava hinkwayu, yi ta tala hi ku phatima ka Yehovha.+
22 Phela hinkwavu lava nga vona ku phatima ka mina ni masingita ya mina,+ leswi ni nga swi yendla Gibita ni le mananga kambe va nga tama va ni ringa+ ka 10, va tlhela va nga ni yingisi,+
23 a va nga ta ku nghena ka tiko leli ni nga funga ku li nyika vapapayi va vona. Hinkwavu lava ni delelaka a va nga ta li vona.+
24 Kambe leswi mutirheli wa mina Kalebe,+ a nga kombisa swaku a hambanile ni lavan’wani ni leswi a nga ni yingisa hi mbilu hinkwayu, impela ni ta mu yisa ka tiko leli a nga ya ka lona naswona li ta va tshomba la vana va yena.+
25 Leswi Vaamaleki ni Vakanana+ va tshamaka ka nkova, mundzuku mi fanele mi tlhela mi ya mananga hi ndlela leyi yaka ka Lwandle la Ku Pshuka.”+
26 Se Yehovha a byela Moxe na Aroni a ku:
27 “Kasi vanhu lava va ku biha va ta ni ngurangurela anze siku muni ke?+ Ni swi twile swikhalu leswi Vayisrayele va ni ngurangurelaka hi swona.+
28 Va byeli u ku: ‘“Na funga hi mina”, ku vula Yehovha, “ni ta swi yendla leswi ni nga mi twa na mi swi vula!+
29 Mi ta fela kola mananga,+ n’wina hinkwenu lava nga ni ngurangurela, hinkwenu mi nga tsalisiwa na mi ni 20 wa malembe ku ya henhla.+
30 Hinkwenu a mi nga ta nghena ka tiko leli ni nga funga swaku mi ta tshama ka lona,+ ku to nghena ntsena Kalebe n’wana wa Yefune na Yoxuwa n’wana wa Nuni.+
31 “‘“Ni ta nghenisa vana va n’wina lava mi nga hlaya swaku va ta tekiwa hi valala,+ va ta li tiva tiko leli mi nga li nyenya.+
32 Kambe mintsumbu ya n’wina yi ta wetetela kola mananga.
33 Vana va n’wina va ta va valusi amananga ku ringana 40 wa malembe,+ va ta hlupheka hi mhaka ya leswi mi kalaka mi nga tshembekanga,* anze hinkwenu mi fa mi hela mi ku jii amananga.+
34 Hi ku landza numeru ya masiku lawa mi nga ya kambela tiko, ku nga 40 wa masiku,+ siku lin’we li ta nyimela lembe lin’we, mi ta hlupheka hi mhaka ya swidjoho swa n’wina anze ku hela 40 wa malembe,+ mi ta vona mihandzu ya leswi mi nga ni terekela.*
35 “‘“Mina Yehovha ni swi vulile. Ni ta yendla leswi ka vanhu lava hinkwavu va ku biha lava nga hlengeletana swaku va lwa na mina: Va ta hela kola mananga, naswona va ta fela kona.+
36 Vavanuna lava Moxe a nga va rhuma swaku va ya kambela tiko, naswona va nga hlohlotela vanhu swaku va mu ngurangurela nkama va nga vuya ni mahungu ya ku biha hi tiko lolelo;+
37 phela vavanuna volavo va nga vuya ni mahungu ya ku biha hi tiko lolelo, va ta khatisiwa va dlayiwa phambheni ka Yehovha.+
38 Kambe Yoxuwa n’wana wa Nuni na Kalebe n’wana wa Yefune, lava a va li kona ka lava nga ya kambela tiko, a va nga ta fa.”’”+
39 Nkama Moxe a nga byela Vayisrayele hinkwavu marito wolawo, va sungula ku rila swinene.
40 Kutani va pfuka nimpundzu, va zama ku ya henhla ka ntshava, na va ku: “Hi lunghekile ku ya ka ndhawu leyi Yehovha a nga yi hlaya, hikusa hi djohile.”+
41 Kambe Moxe a ku: “Hi mhaka muni mi tlula nawu wa Yehovha? Leswo a swi nga ta mi pfuna hi nchumu.
42 Mi nga yi hikusa Yehovha a nga na n’wina; valala va n’wina va ta mi hlula.+
43 Hikusa Vaamaleki ni Vakanana va ta mi hlasela+ naswona mi ta dlayiwa hi xipada. Leswi mi nga tshika Yehovha, Yehovha a nge vi na n’wina.”+
44 Kambe va tiwomise tinhloko ti ku roo, va khwela ka tintshava;+ kambe areka ya ntwananu wa Yehovha ku patsa na Moxe a swi sukanga ka matende.+
45 Se Vaamaleki ni Vakanana lava a va tshama ka ntshava yoleyo va xika va va hlasela va tlhela va va txatxa anze va ya fika Orma.+
Tinhlamunselu ta le hansi
^ Hi Xiheberu: “hikusa i pawu la hina.”
^ Hi Xiheberu: “yendleke wunghwavani”.
^ Kumbe: “mi nga ni yendla nala wa n’wina.”
