Tinhlayo 16:1-50
16 Kutani Kora+ n’wana wa Izari,+ n’wana wa Kohata,+ n’wana wa Levhi+ a tipatsa ni vana va Eliyabi+ ku nga Datani na Abirami na Oni n’wana wa Pelethi wa vana va Rubeni.+
2 Se vona, ku patsa ni 250 wa vavanuna van’wani va Vayisrayele, varhangeli lava nga langiwa, lava a va li vavanuna lava nga ni ndhuma, va djikela Moxe.
3 Kutani va hlengeletana va djikela+ Moxe na Aroni, va ku: “Hi karhalile hi n’wina! Vanhu* hinkwavu va kwetsima+ naswona Yehovha a le xikarhi ka vona.+ Se hi mhaka muni n’wina mi titlakusa henhla ka vanhu va Yehovha ke?”
4 Nkama Moxe a nga twa leswo, a khizama a txuvuka hansi.
5 Moxe a byela Kora ni hinkwavu lava a va nyima na yena a ku: “Nimixo Yehovha a ta hi byela lweyi a nga wa yena,+ a ta hi byela swaku i mani lweyi a kwetsimaka ni lweyi a faneleke a tshinela ka yena,+ lweyi a nga ta mu langa,+ hi yena a nga ta tshinela ka yena.
6 Yendlani leswi: Wena Kora ni lava nyimaka na wena+ tekani swa ku chela ndzilu,+
7 mi chela ndzilu ni swinun’hwelisu* ka swona, mi ya nyima phambheni ka Yehovha mundzuku, lweyi Yehovha a nga ta mu langa,+ hi yena lweyi a kwetsimaka. Se mi delele ku tlula mpimu n’wina vana va Levhi!”+
8 Kutani Moxe a byela Kora a ku: “Ni kombela mi ni yingisa n’wina vana va Levhi.
9 A swi mi xegi, leswi Xikwembu xa Israyele xi nga mi langa ka Vayisrayele,+ xi mi pfumelela ku xi tirhela ka tabernakela la Yehovha ni ku nyima phambheni ka vanhu mi va tirhela?+
10 A swi mi xegi leswi xi nga yendla swaku mi va kusuhi na xona ku patsa ni vamakwenu hinkwavu, ku nga vana va Levhi? Mi lava ku teka ni wuprista?+
11 Hi mhaka ya leswo, wena ni hinkwavu lava nyimaka na wena mi lwa na Yehovha. Se Aroni ke, o va yini swaku mi mu ngurangurela?”+
12 Se Moxe a gama a rhuma vanhu swaku va ya vitana Datani na Abirami+ vana va Eliyabi, kambe va ku: “A hi nge ti!
13 Kasi a swi ku xegi leswi u nga hi humesa ka tiko leli nga tala hi leiti ni wulombe swaku u ta hi dlaya lani mananga?+ Swoswi u lava ku tiyendla hosi ya hina ke?
14 A wu se hi fikisa ka tiko leli nga tala hi leiti ni wulombe+ kumbe u hi nyika tshomba la tiko ni nsimu ya mawuvha. Se u pimisa swaku u nga va pfala matihlo vanhu lavo? A hi nge ti!”
15 Se Moxe a kwata swinene a za a byela Yehovha a ku: “U nga li txuvuki gandzelo la vona la swakudla. Phela a ni se tshama ni va tekela hambi mbongolo ya vona, kumbe ku vavisa mun’we wa vona.”+
16 Kutani Moxe a byela Kora a ku: “Tanani phambheni ka Yehovha mundzuku, wena ni lava nyimaka na wena na Aroni.
17 Mun’wani ni mun’wani wa n’wina a a teki xa ku chela ndzilu a chela swinun’hwelisu ka xona, mi nyima phambheni ka Yehovha, lava nyimaka na wena va ta tamela 250 wa swa ku chela ndzilu, ku patsa na wena na Aroni.”
18 Se hinkwavu va teka swa ku chela ndzilu, va swi chela ndzilu ni swinun’hwelisu, va ya nyima ka nyanghwa wa tende la ntlhanganu na va na Moxe na Aroni.
19 Nkama Kora a nga hlengeleta lava nyimaka na yena,+ lava terekelaka Moxe na Aroni ka nyanghwa wa tende la ntlhanganu, ku phatima ka Yehovha ku humelele ka vanhu hinkwavu.+
20 Kutani Yehovha a byela Moxe na Aroni a ku:
21 “Sukani xikarhi ka vanhu lava, swaku ni ta va helisa hi nkamanyana.”+
22 Se va khizama va txuvuka hansi, va ku: “Xikwembu xa hina, Xikwembu lexi nga tumbuluxa vanhu hinkwavu,+ impela xidjoho xa munhu mun’we xi nga yendla swaku u kwatela vanhu hinkwavu ke?”+
23 Yehovha a byela Moxe a ku:
24 “Byela vanhu u ku: ‘Sukani kusuhi ni matende ya Kora na Datani na Abirami!’”+
25 Kutani Moxe a ya ka Datani na Abirami na a ni madoda+ ya Israyele.
26 A byela vanhu a ku: “Ni kombela mi ya nyima kule ni matende ya vavanuna lava va ku biha, mi nga tshuki mi khumba nchumu xa vona, swaku mi nga dlayiwi hi mhaka ya xidjoho xa vona.”
27 Se va suka hi ku hantlisa va ya kule ni matende ya Kora, Datani na Abirami; kutani Datani na Abirami va huma va ya nyima ka nyanghwa wa matende ya vona na va ni vasati vona, vana ku patsa ni swivanani.
28 Se Moxe a ku: “Leswi mi nga ta swi vona namuntlha swi ta mi komba swaku ni rhumiwe hi Yehovha, a no swi sukela:
29 Loko vanhu lava vo fisa leswi vanhu hinkwavu va fisaka swona, ni loko vo khatisiwa ku fana ni vanhu hinkwavu, swi ta vula swaku a ni rhumiwanga hi Yehovha.+
30 Kambe loko Yehovha o yendla nchumu xa ku kala xi nga tolovelekanga ka vona, se misava yi pfuleka yi va minta ni hinkwaswu leswi va nga na swona, va nghena Sirheni* na va ha hanya, mi ta swi tiva swaku vanhu lava va delele Yehovha.”
31 Nkama a nga gama ku vulavula, misava yi pandzeka.+
32 Kutani misava yi pfuleka yi va minta ni mindjangu ya vona, ku patsa ni ndjangu wa Kora+ ni hinkwaswu leswi a va li na swona.
33 Vona ni mindjangu ya vona va mintiwa hi misava, va nghena Sirheni* na va ha hanya, misava yi tlhela yi va mbhonya, va helisiwa va ku jii.+
34 Nkama Vayisrayele lava a va li kusuhi na vona va nga va twa na va ba tinyandha, va balekile na va ku: “Hi chava swaku misava yi nga hi minta na hina!”
35 Kutani ku ta ndzilu hi ka Yehovha+ wu fika wu helisa 250 wa vavanuna lava a va nyikela swinun’hwelisu.+
36 Se Yehovha a byela Moxe a ku:
37 “Byela Eliyazari n’wana wa muprista Aroni swaku a susa swa ku chela ndzilu+ leswi nga ka ndzilu, hikusa swa kwetsima. Tlhela u mu byela swaku a teka makhala ya kona a ya ma hangalasela le ka kule.
38 A swa ku chela ndzilu swa vavanuna lava nga fa hi mhaka ya swidjoho swa vona, swi fanele swi yendliwa swixapani swi gama swi namarhetiwa ka altari,+ hikusa va swi nyikele ka Yehovha kutani swi ve swa ku kwetsima. Swi ta va xikombiso ka Vayisrayele.”+
39 Se muprista Eliyazari a teka swa ku chela ndzilu swa kobre leswi nga nyikeliwa hi lava nga dlayiwa hi ndzilu, kutani a yendla swixapani a swi namarheta ka altari
40 hi ku landza leswi Yehovha a nga mu byela swona hi ku tirhisa Moxe. Swi ve xitsundzuxu ka Vayisrayele swaku a ku na munhu wa ku kala a nga li muprista* lweyi a pfumeleliwaka ku hisela Yehovha+ swinun’hwelisu loko a nga li n’wana wa Aroni, ni leswaku a nga kona lweyi a faneleke a tekelela Kora ni lava a va nyima na yena.+
41 Hi mundzuku ka kona, Vayisrayele va sungula ku ngurangurela Moxe na Aroni+ va ku: “N’wina va vambirhi mi dlaye vanhu va Yehovha.”
42 Loko vanhu va ha hlengeletanile na va ngurangurela Moxe na Aroni, nkama va nga txuvuka ka tende la ntlhanganu, va vone rhefu na li li mbhonyile ku gama ku humelela ku phatima ka Yehovha.+
43 Se Moxe na Aroni va ya ka tende la ntlhanganu,+
44 Yehovha a byela Moxe a ku:
45 “Sukani xikarhi ka vanhu lava, swaku ni ta va helisa.”+ Nkama Moxe na Aroni va nga twa leswo, va khizama va txuvuka hansi.+
46 Se Moxe a byela Aroni a ku: “Teka xa ku chela ndzilu u ya woka ndzilu ka altari,+ u chela ni swinun’hwelisu, u hantlisa u ya lomu vanhu va nga kona u ya va kombelela ku rivaleliwa,+ hikusa Yehovha a va kwatelile. Ntungu wu sungulile!”
47 Kutani Aroni a yendla leswi Moxe a nga mu byela swona, a teka xa ku chela ndzilu hi ku hantlisa, a tsutsuma a ya xikarhi ka vanhu, nkama a nga fika a kuma swaku ntungu se a wu sungulile. A gama a chela swinun’hwelisu ka xa ku chela ndzilu kutani a sungula ku kombelela vanhu ku rivaleliwa.
48 A nyima xikarhi ka vanhu va ku fa ni va ku hanya, a nga suki anze ntungu wu hela.
49 Lava nga dlayiwa hi ntungu a va li 14.700, na ku nga kontiwi lava nga fa hi mhaka ya Kora.
50 Nkama Aroni a nga tlhelela ka Moxe ka nyanghwa wa tende la ntlhanganu, ntungu se a wu nyimile.
Tinhlamunselu ta le hansi
^ Hi Xiheberu: “Nhlengeletanu”.
^ Vona Ntlhamuselo.
^ Kumbe: “Sheol”. Vona Ntlhamuselo.
^ Kumbe: “Sheol”. Vona Ntlhamuselo.
^ Hi Xiheberu: “xitranyu”.
