Tinhlayo 19:1-22
-
Homu ya ku pshuka ni mati ya ku basisa (1-22)
19 Yehovha a tlhela a khuluma na Moxe na Aroni a ku:
2 “Nawu lowu Yehovha a nga wu vula hi lowu: ‘Byela Vayisrayele swaku va ku tisela homu ya ku pshuka ya xisati leyi nga hanya kahle, yi kalaka yi nga na xivati+ naswona yi kalaka yi nge se tshama yi rhwexiwa kange.*
3 Mi fanele mi yi nyika muprista Eliyazari, se yena a ta famba na yona handle ka matende yi ya dlayiwa na a yi vona.
4 Muprista Eliyazari a ta tsakamisa litiho la yena hi ngati yin’wani ya yona, a gama a n’wan’wasela ka 7 phambheni ka tende la ntlhanganu.+
5 Homu yi ta hisiwa na a yi vona. Xikhumba xa yona ni nyama ya yona ni ngati ya yona ni chaka la yona swi ta hisiwa.+
6 Kutani muprista a ta teka pulangu la mukedari, xinsinyani xa hisopa*+ ni nguvu ya ku pshuka a swi hoxa ka ndzilu lowu hisaka homu.
7 Muprista a ta gama a hlampsa mpahla ya yena a tlhela a hlamba hi mati, se hi kona a nga nghenaka ka matende; kambe muprista a ta tshama na a nga tenganga anze nimadlambu.
8 “‘Lweyi a nga hisa homu a ta hlampsa mpahla ya yena hi mati a tlhela a hlamba hi mati, a ta tshama na a nga tenganga anze nimadlambu.
9 “‘Se munhu lweyi a nga tenga a ta hlengeleta nkuma wa homu+ a wu veka ka ndhawu leyi nga basa handle ka matende, wu fanele wu hlayisiwa swaku Vayisrayele va ta wu tirhisa ka mati ya ku basisa leswi kalaka swi nga basanga.+ I gandzelo la xidjoho.
10 Lweyi a hlengeletaka nkuma wa homu a ta hlampsa mpahla ya yena naswona a ta tshama na a nga tenganga anze nimadlambu.
“‘Lowu i nawu wa ku kala wu nga heli lowu nga ta tirha ka Vayisrayele ni ka vanhu va tiko lin’wani lava tshamaka na vona.+
11 Mun’wani ni mun’wani lweyi a nga ta khumba ntsumbu, a ta va a nga tenganga ku ringana 7 wa masiku.+
12 Munhu yelweyo a fanele a tibasisa hi mati hi siku la wunharhu kutani hi siku la wu 7 a ta va a tengile. Kambe loko o tshuka a nga tibasisi hi siku la wunharhu, a ta va a nga tenganga hi siku la wu 7.
13 Mun’wani ni mun’wani lweyi a khumbaka ntsumbu kutani a nga tibasisi, a chakisa tabernakela+ ya Yehovha, munhu yelweyo a fanele a dlayiwa aIsrayele.+ A ta tshama na a nga tenganga hi mhaka ya leswi a kalaka a nga n’wan’waseliwanga mati ya ku mu basisa.+ A ta tshama na a nga tenganga.
14 “‘Loko ko tshuka ku fa munhu ka tende, ku ta tirha nawu lowu: Lweyi a nga ta nghena ka tende ni lweyi se a a li kolanu, a ta tshama na a nga tenganga ku ringana 7 wa masiku.
15 Swibya leswi nga pfuleka leswi kalaka swi nga na titampa na swona swi ta va swi nga basanga.+
16 Lweyi a nga ta tshuka a khumba munhu akhwatini lweyi a nga dlayiwa hi xipada, kumbe ntsumbu kumbe rhambu la munhu kumbe sirha, a ta tshama na a nga tenganga ku ringana 7 wa masiku.+
17 Va fanele va nusa nkuma wa gandzelo la xidjoho leli nga hisiwa va wu chela ka xibya, va gama va wu patsa ni mati lama nga basa, swaku va ta basisa lweyi a kalaka a nga tenganga.
18 Kutani munhu lweyi a nga tenga+ a ta teka xinsinyani xa hisopa+ a xi peta ka mati, a gama a n’wan’wasela ka tende, ka swibya hinkwaswu, ka vanhu lava a va li kolanu ni ka munhu lweyi a nga khumba rhambu kumbe lweyi a nga dlayiwa kumbe ntsumbu kumbe sirha.
19 Munhu lweyi a nga tenga a ta n’wan’wasela lweyi a kalaka a nga tenganga hi siku la wunharhu ni hi siku la wu 7, a ta mu basisa ka xidjoho xa yena hi siku la wu 7;+ se a fanele a gama a hlampsa mpahla ya yena a tlhela a hlamba hi mati kutani a ta va a tengile nimadlambu.
20 “‘Kambe munhu lweyi a kalaka a nga tenganga a tlhela a nga tibasisi, a fanele a dlayiwa,+ hikusa a chakise ndhawu ya Yehovha leyi kwetsimaka. A nga tenganga hi mhaka ya leswi a kalaka a nga n’wan’waseliwanga mati ya ku mu basisa.
21 “‘Hi lowu nawu lowu nga ta tirha ka vona hi masiku ni masiku: Lweyi a n’wan’waselaka mun’wani mati ya ku basisa+ a fanele a hlampsa mpahla ya yena ni lweyi a nga khumba mati ya ku basisa a ta tshama na a nga tenganga anze nimadlambu.
22 Hinkwaswu leswi munhu lweyi a kalaka a nga tenganga a nga ta swi khumba, swi ta va swi nga basanga, funtshi lweyi a nga ta swi khumba a ta va a nga tenganga anze nimadlambu.’”+
