Tinhlayo 20:1-29
20 Hi wheti ya ku sungula, Vayisrayele va fike amananga ya Zini, va fika va tshama Kadexi.+ Hi kolanu Miriyamu+ a nga fela kona a gama a lahliwa.
2 Vanhu a va nga ha na mati kutani va sungula ku djikela Moxe na Aroni.+
3 Va holovisa Moxe+ va ku: “Ni loko a hi file xikan’we ni vamakwerhu nkama va nga fa phambheni ka Yehovha!
4 Hi mhaka muni mi tise vanhu va Yehovha ka mananga lawa swaku hina ni swifuyu swa hina hi ta fela lani ke?+
5 Naswona hi mhaka muni mi hi humesile Gibita mi hi tisa ka ndhawu leyi ya ku biha?+ Phela ka ndhawu leyi a hi nge byali mbewu, makuwa ni minsinya ya mawuvha ni ma romã naswona a ku na mati ya ku phuza.”+
6 Se Moxe na Aroni va suka phambheni ka vanhu va ya ka nyanghwa wa tende la ntlhanganu, va fika va khizama va txuvuka hansi, kutani ku phatima ka Yehovha ku sungula ku humelela ka vona.+
7 Se Yehovha a byela Moxe a ku:
8 “Teka nhonga, se wena ni makwenu wa wena Aroni mi vitana vanhu, kutani mi vulavula ni ribye na va mi txuvukile swaku li humesa mati, mi ta va humesela mati ka ribye mi va nyika va phuza, vona ni swifuyu swa vona.”+
9 Kutani Moxe a teka nhonga phambheni ka Yehovha+ hi ku landza leswi a nga mu byela swona.
10 Moxe na Aroni va gama va vitana vanhu va fika va nyima phambheni ka ribye, kutani Moxe a va byela a ku: “Yingisani, n’wina swipandza nhloko!* Mi lava swaku hi mi humesela mati ka ribye leli ke?”+
11 Se Moxe a tlakusa voko a ba ribye kambirhi hi nhonga ya yena, kutani ku huma mati ya manyingi, vanhu ni swifuyu swa vona va sungula ku phuza.+
12 Yehovha a gama a byela Moxe na Aroni a ku: “A mi nge va nghenisi vanhu lava ka tiko leli ni nga ta va nyika lona, hikusa a mi kombisanga lipfumelo ka mina naswona a mi ni kwetsimisanga phambheni ka Vayisrayele.”+
13 Lawa i mati ya Meriba,*+ lani Vayisrayele va nga holova na Yehovha, a za a va komba swaku wa kwetsima.
14 Moxe a gama a rhuma vanhu va suka Kadexi va ya ka hosi ya le Edomu,+ va fika va ku: “Makwenu Israyele+ a li: ‘U swi tiva kahle swikarhatu hinkwaswu leswi hi nga kumana na swona.
15 Vapapayi va hina va ye Gibita,+ kutani hi tshame Gibita malembe* ya manyingi,+ Vagibita va hi xanisile, hina ni vapapayi va hina.+
16 Hi game hi rilela Yehovha,+ se yena a hi twile a rhumela ntsumi+ yi hi humesa Gibita, swoswi hi lani Kadexi, doropa leli nga kusuhi* ni tiko la wena.
17 Hi kombela u hi pfumelela hi hundza ka tiko la wena. A hi nge psanyi masimu kumbe minsinya ya mawuvha naswona a hi nga ta phuza mati ya swihlovo swa wena. Hi ta famba hi ndlela leyi vitaniwaka Ndlela ya Hosi, a hi nge djiki hi ya ka tlhelo la xinene kumbe la ximatsi, anze hi hundza ka tiko la wena.’”+
18 Kambe Edomu a va byela a ku: “Mi nga tsemakanyi ka tiko la mina. Loko mo ta, ni ta mi tlhangaveta hi xipada.”
19 Vayisrayele va mu hlamula va ku: “Hi ta tifambela hi ndlela, loko hina ni swifuyu swa hina ho tshuka hi phuza mati ya wena, hi ta ku hakela.+ Ho lava ntsena ku tsemakanya ka tiko la wena.”+
20 Kambe Edomu a ku: “U nga tsemakanyi.”+ Se Edomu a huma swaku a ya tlhangana na vona na a ni vanhu va vanyingi ni masonchwa ya matimba.
21 Edomu a nga zanga a pfumela swaku Vayisrayele va tsemakanya ka tiko la yena; kutani Vayisrayele va famba hi ndlela yin’wani.+
22 Vayisrayele va suka Kadexi va ya fika ka Ntshava ya Ori.+
23 Kutani Yehovha a byela Moxe na Aroni ka Ntshava ya Ori kusuhi* ni tiko la Edomu a ku:
24 “Aroni a ta fa a lahliwa ka maxaka ya yena.+ A nge ngheni ka tiko leli ni nga ta li nyika Vayisrayele, hikusa wena na yena a mi ni hloniphanga ka mati ya Meriba.+
25 Teka Aroni ni n’wana wa yena Eliyazari mi ya khwela ka Ntshava ya Ori.
26 U fika u hlivila Aroni mpahla,+ u yi yambexa n’wana wa yena Eliyazari,+ kutani Aroni a ta fela kolanu.”
27 Kutani Moxe a yendla leswi Yehovha a nga mu byela swona, kutani va khwela ka Ntshava ya Ori na va voniwa hi vanhu hinkwavu.
28 Se Moxe a hlivila Aroni mpahla, a yi yambexa n’wana wa yena Eliyazari; Aroni a gama a fa kolanu henhla ka ntshava.+ Kutani Moxe na Eliyazari va xika hi ka ntshava.
29 Nkama vanhu hinkwavu va nga swi vona swaku Aroni a file, tiko* hinkwalu la Israyele li hete 30 wa masiku na li mu rila.+
Tinhlamunselu ta le hansi
^ Kumbe: “vaxandzuki.”
^ Leswi vulaka “Ku Holova”.
^ Hi Xiheberu: “masiku”.
^ Kumbe: “ndzilakanu”.
^ Kumbe: “ndzilakanu”.
^ Hi Xiheberu: “yindlo”.
