Tinhlayo 21:1-35
21 Nkama hosi ya Mukanana ya le Aradi+ leyi a yi tshama Negebi yi nga twa swaku Vayisrayele va ta hi ndlela ya le Atarimi, yi va hlaselile yi tlhela yi khoma van’wani yi va yendla swib’ochwa.
2 Se Vayisrayele va funga ka Yehovha va ku: “Loko wo hi pfuna swaku hi hlula vanhu lava, hi ta tlhela hi helisa ni madoropa ya vona.”
3 Yehovha a yingisa Vayisrayele, a va pfuna swaku va hlula Vakanana kutani va helisa ni madoropa ya vona. Se va chula ndhawu yoleyo swaku i Orma.*+
4 Nkama na va ha yendza na va suka hi ka Ntshava ya Ori+ va famba hi ndlela leyi yaka ka Lwandle la Ku Pshuka swaku va nga hundzi hi ka tiko la Edomu,+ vanhu va sungule ku karhala.
5 Vanhu a va tshamela ku ngurangurela Xikwembu na Moxe,+ va ku: “Hi mhaka muni mi hi humese Gibita swaku hi ta fela lani mananga? Phela a ku na swakudla ni mati+ naswona se hi karhalile hi pawu leli la ku nyenyentsa.”+
6 Kutani Yehovha a rhumela tinyoka leti nga ni vhenenu xikarhi ka vanhu, swaku ti va lumetela naswona ku fa Vayisrayele va vanyingi hi mhaka ya tona.+
7 Se vanhu va ya ka Moxe va fika va ku: “Hi djohile hi ku ngurangurela Yehovha na wena.+ Hi kombelele ka Yehovha swaku a hi susela tinyoka leti.” Kutani Moxe a kombelela vanhu.+
8 Se Yehovha a byela Moxe a ku: “Yendla xifaniso xa nyoka leyi nga ni vhenenu u xi hayeka ka mhandzi. Loko munhu a tshuka a lumiwa, a ta xi txuvuka swaku a nga fi.”
9 Moxe a yo vhela a yendla nyoka hi kobre,+ a yi hayeka ka mhandzi,+ se loko munhu a tshuka a lumiwa hi nyoka a a txuvuka nyoka ya kobre se a hanya.+
10 Kutani Vayisrayele va gama va suka va ya gwimba matende aOboti.+
11 Se va suka aOboti va ya gwimba matende aIye-Abarimi,+ ku nga mananga lawa ma nga kusuhi ni Mowabu awuxeni.
12 Nkama va nga suka lanu va ye va ya gwimba matende ka nkova wa Zeredi.+
13 Nkama va nga suka Zeredi, va ye va ya gwimba matende ya vona aArinoni,+ amananga lawa ma sukelaka lomu ndhawu ya Vaamori yi tsemaka hi kona, hikusa Arinoni i ndhawu* leyi hambanisaka Vamowabu ni Vaamori.
14 Hi leswo swi yendlaka swaku buku ya Tinyimpi ta Yehovha yi vulavula hi doropa la “Vahebi leli nga Sufa ni minkova ya Arinoni,
15 ni swinkovani leswi fambaka anze ka swidoropani swa Ara, swi gama swi ya fika ni lomu tiko la Mowabu li tsemaka hi kona.”
16 Nkama va nga suka lanu, va ye Beyere. Lexi i xihlovo lexi Yehovha a nga byela Moxe ka xona a ku: “Hlengeleta vanhu leswaku ni ta va nyika mati.”
17 Hi nkama wolowo, Vayisrayele va yimbelele lisimu leli:
“Hi humeseli mati, wena xihlovo! Yimbelelani!
18 Xihlovo lexi nga txeliwa hi varhangeli,* lexi nga handziwa hi vanhu va ku hlonipheka,Va xi txele hi nhonga ya murhangeli ni hi tinhonga ta vona.”
Se va gama va suka mananga va ya Matana,
19 nkama va nga suka Matana va ye Nahaliyeli, nkama va nga suka aNahaliyeli va ye Bamoti.+
20 Nkama va nga suka Bamoti va ye ka nkova lowu nga ka tiko la Mowabu,+ ahenhla ka Pisiga,+ leyi nga kusuhi na Yeximoni.*+
21 Se Vayisrayele va rhuma vanhu swaku va ya ka Sihoni hosi ya Vaamori va fika va ku:+
22 “Hi pfumeleli hi tsemakanya hi ka tiko la wena. A hi nga ta nghena ka masimu kumbe ka masimu ya wena ya mawuvha. A hi nga ta phuza mati ka swihlovo swa wena. Hi ta famba hi ndlela leyi vitaniwaka Ndlela ya Hosi anze hi tsemakanya ka tiko la wena.”+
23 Kambe Sihoni a nga zanga a pfumela swaku Vayisrayele va tsemakanya hi ka tiko la yena. Lexi Sihoni a nga xi yendla, a yo hlengeleta vanhu va yena hinkwavu leswaku va ya hlasela Vayisrayele amananga kutani a fika aYahazi a sungula ku lwa ni Vayisrayele.+
24 Kambe Vayisrayele va mu hlula hi xipada+ kutani va teka tiko la yena,+ ku sukela aArinoni+ ku ya fika aYaboki,+ akusuhi ni Vaamoni hikusa doropa la Yazeri+ li kusuhi ni tiko la Vaamoni.+
25 Kutani Vayisrayele va teka madoropa lawo hinkwawu, va sungula ku tshama ka madoropa hinkwawu ya Vaamori,+ aExiboni ni le ka swidoropani hinkwaswu leswi a swi li kusuhi.
26 Hikusa Exiboni a ku li doropa la Sihoni, hosi ya Vaamori lweyi a nga lwa ni hosi ya Mowabu a gama a teka tiko la yena hinkwalu anze Arinoni.
27 Hi leswo swi yendlaka ku va ni xihlayahlaya xa ku poyila lexi nge:
“Tanani aExiboni.
Doropa la Sihoni a li yakiwe li tiya.
28 Hikusa ndzilu wu hume aExiboni, xindzilwani* xi hume ka doropa la Sihoni.
Wu helise doropa la Ara leli nga Mowabu, vinyi va tindhawu leti nga tlakuka ta Arinoni.
29 Khombo ka wena Mowabu! Mi ta helisiwa n’wina vanhu va Kemoxi!+
A tshike vana va yena va madjaha va baleka; vana va yena va tintombhi a va tshike va va swikarawa swa Sihoni hosi ya Vaamori.
30 A hi va txopeni;Exiboni a ta helisiwa anze Diboni;+A hi mu siyeni na a nga na nchumu anze Nofa;Ndzilu wu ta hangalaka wu ya fika Medeba.”+
31 Se Vayisrayele va sungulise swoleswo ku tshama ka tiko la Vaamori.
32 Kutani Moxe a rhuma vavanuna swaku va ya kambela doropa la Yazeri.+ Va fike va teka swidoropani leswi nga kusuhi na lona, va hlongola Vaamori lava a va tshama kolanu.
33 Se va gama va famba hi Ndlela ya Baxani. Kutani Ogi+ hosi ya Baxani a ta ni vanhu va yena hinkwavu leswaku a ta lwa na vona aEdreyi.+
34 Yehovha a byela Moxe a ku: “U nga mu chavi,+ hikusa ni ta ku pfuna swaku u mu hlula,+ yena ni vanhu va yena hinkwavu ni tiko la yena, u ta mu yendla swa ku fana ni leswi u nga swi yendla ka Sihoni hosi ya Vaamori, lweyi a a tshama aExiboni.”+
35 Se va mu dlaya, yena ni vana va yena ni vanhu va yena hinkwavu, a ku ponanga munhu ni mun’we,+ kutani va teka tiko la yena.+
Tinhlamunselu ta le hansi
^ Leswi vulaka “Ku Helisiwa.”
^ Kumbe: “ndzilakanu”.
^ Kumbe: “tihosana”.
^ Kumbexana: “Mananga.”
^ Kumbe: “langavi li”.
