Tinhlayo 22:1-41
22 Kutani Vayisrayele va suka va ya gwimba matende amananga ya Mowabu, phambheni ka Yeriko+ ka tlhelo lelin’wani la Yordani.
2 Balaki+ n’wana wa Zipori a vona hinkwaswu leswi Vayisrayele va nga swi yendla ka Vaamori.
3 Se Vamowabu va sungula ku va chava hintamu Vayisrayele hikusa a va li vanyingi; phela Vamowabu a vo rhurhumela loko va pimisa hi Vayisrayele.+
4 Kutani Vamowabu va byela madoda ya le Midiyani+ va ku: “Vanhu lava va ta hi heta hinkwerhu, ku fana ni homu leyi dlaka byanyi akhwatini yi li heta.”
Hi nkama wolowo, Balaki n’wana wa Zipori a a li hosi ya Vamowabu.
5 Se a rhumela vanhu ka Balamu n’wana wa Beyori lweyi a a tshama ni maxaka ya yena ka doropa la Petori,+ leli nga tlhelweni ka Nambu.* A mu kombela a ku: “Yingisa! Ku ni vanhu lava taka hi Gibita. I vanyingi hintamu+ naswona va tshama kusuhi ni tiko la mina.
6 Ni kombela u ta ni pfuna hi ku rhuka vanhu lava,+ hikusa va ni matimba ku ni tlula. Devhi ni nga swi kota ku va hlula ni va hlongola tikweni, hikusa ni swi tiva kahle swaku lweyi u mu katekisaka wa kateka naswona lweyi u mu rhukaka wa rhukiwa.”
7 Kutani madoda ya Vamowabu ni ya Vamidiyani ma famba xikan’we, na ma khome male ya ku hlahluva, ma ya ka Balamu+ ku ya mu byela leswi Balaki a nga ma rhuma swona.
8 Balamu a va hlamula a ku: “Yetlelani lani namuntlha, ni ta mi byela leswi Yehovha a nga ta ni byela swona.” Se varhangeli* va Mowabu va tshama na Balamu.
9 Kutani Xikwembu xi humelela ka Balamu xi ku:+ “I vamani vavanuna lava u nga na vona ke?”
10 Se Balamu a byela Xikwembu xa ntiyiso a ku: “Balaki n’wana wa Zipori, hosi ya Vamowabu a rhumele rito ka mina a ku:
11 ‘Yingisa! Ku ni vanhu va vanyingi lava taka hi Gibita. Tani u ta ni rhukela vona.+ Devhi ni nga swi kota ku lwa na vona ni va hlongola.’”
12 Kambe Xikwembu xi byela Balamu xi ku: “U nga fambi na vona. U nga tshuki u rhuka vanhu volavo, hikusa va katekisiwile.”+
13 Balamu a pfuka nimixo a byela varhangeli va Balaki a ku: “Mukani hikusa Yehovha a yalile swaku ni famba na n’wina.”
14 Se varhangeli va Mowabu va suka, kutani va fika ka Balaki va ku: “Balamu a yalile ku ta na hina.”
15 Kambe Balaki a tlhele a rhumela varhangeli van’wani va vanyingi, lava a va hlonipheka ku tlula va ku sungula.
16 Va fika ka Balamu va ku: “Balaki n’wana wa Zipori a li: ‘Ni kombela u ta, u nga pfumeleli nchumu xi ku sivela,
17 ni ta ku hakela swinene naswona ni ta yendla xin’wani ni xin’wani lexi u nga ta ni byela xona. Ni kombela u ta, u ta ni rhukela vanhu lava.’”
18 Kambe Balamu a hlamula vatirhi va Balaki a ku: “Hambiloko Balaki o ni nyika yindlo ya yena na yi tale hi prata ni woru, a ni nge swi koti ku tlula nawu wa Yehovha Xikwembu xa mina, a swi na mhaka swaku i wukulu kumbe i wutsongo.+
19 Kambe ni kombela swaku na n’wina mi yetlela kola namuntlha, ni ta twa swaku Yehovha a li yini hi mhaka leyi.”+
20 Kutani Xikwembu xi humelela ka Balamu niwusiku xi ku: “Loko vavanuna lava va tele ku ta ku vitana, famba na vona. Kambe u ta vulavula ntsena leswi ni ku byelaka swona.”+
21 Se Balamu a pfuka nimixo a famba hi mbongolo* ya yena, a famba ni varhangeli va Mowabu.+
22 Kutani Xikwembu xi kwata hintamu hileswi Balamu a a famba na vona, se ntsumi ya Yehovha yi nyima ndleleni yi mu pfalela. Balamu a a famba hi mbongolo ya yena, na a ni vatirhi va yena vambirhi.
23 Nkama mbongolo yi nga vona ntsumi ya Yehovha na yi nyime ndleleni yi khome xipada, yi zame ku hambuka yi ya nhoveni. Kambe Balamu a sungula ku yi ba swaku yi tlhelela ndleleni.
24 Kutani ntsumi ya Yehovha yi nyima ka xindlelani lexi nga xikarhi ka masimu ya mawuvha, lexi nga ni makhumbi lawa a ma yakiwe hi maribye hala ni hala.
25 Nkama mbongolo yi nga vona ntsumi ya Yehovha, yi sungula ku famba na yi timanya ni khumbi, yi manya ni nenge wa Balamu hi khumbi, se Balamu a tlhela a sungula ku yi ba.
26 Kutani ntsumi ya Yehovha yi tlhela yi hundza yi ya nyima ka ndhawu ya ku manyeka, lani a swi nga koteki ku djika ka xinene kumbe ka ximatsi.
27 Nkama mbongolo yi nga vona ntsumi ya Yehovha, yi tshama hansi na Balamu a tshame henhla ka yona, se Balamu a kwata hintamu a tlhela a himetela mbongolo hi nhonga.
28 Hi wugamu Yehovha a yendla swaku mbongolo yi vulavula,+ kutani yi vutisa Balamu yi ku: “Kasi ni yo ku wonhela yini leswi u ni baka ka wunharhu?”+
29 Balamu a hlamula mbongolo a ku: “Hi mhaka ya leswi u nga ni yendla xiphunta. Loko a ni khome xipada, a ni ta ku dlaya!”
30 Kutani mbongolo yi vutisa Balamu yi ku: “Kasi a ni mbongolo ya wena leyi u nga famba hi yona wutomi la wena hinkwalu anze namuntlha ke? Indjhe ni tshama ni ku yendla swa ku fana ni leswi ke?” Balamu a ku: “Ihim!”
31 Yehovha a pfula matihlo ya Balamu,+ se a vona ntsumi ya Yehovha na yi nyime ndleleni na yi khome xipada. Balamu a khizama hi ku hantlisa, a txuvuka hansi.
32 Kutani ntsumi ya Yehovha yi mu byela yi ku: “Hi mhaka muni u be mbongolo ya wena kanharhu? Yingisa! Mina ni tele ku ta ku pfalela, hikusa liyendzo la wena li lwisana ni ku rhandza ka mina.+
33 Mbongolo yi ni vonile kutani yi zama ku hambuka kanharhu.+ Phela loko a yi nga hambukanga phambheni ka mina, swoswi a ni ta va ni ku dlayile, ku sala yona.”
34 Balamu a byela ntsumi ya Yehovha a ku: “Ni djohile hikusa a ni nga swi tivi swaku a wu nyime ndleleni swaku u ta tlhangana na mina. Swoswi loko leswi swi bihile matihlweni ya wena, ni ta tlhela.”
35 Kambe ntsumi ya Yehovha yi byela Balamu yi ku: “Famba ni vavanuna lava, kambe u ta vulavula ntsena leswi ni nga ta ku byela swona.” Kutani Balamu a famba ni varhangeli va Balaki.
36 Nkama Balaki a nga twa swaku Balamu a fikile, a huma hi ku hantlisa a ya tlhangana na yena ka doropa la Mowabu leli nga kusuhi ni Arinoni, ku nga ndhawu* leyi nga kusuhi ni tiko la Mowabu.
37 Balaki a byela Balamu a ku: “Kasi a ni ku vitananga? Hi mhaka muni u nga tanga? U pimisa swaku ni nga tsandzeka ku ku hakela ngopfu?”+
38 Balamu a hlamula Balaki a ku: “Se ni fikile. Kambe ni nga pfumeleliwa ku vula xanchumu? Ni ta vulavula ntsena leswi Xikwembu xi nga ta ni byela swona.”+
39 Balamu na Balaki va famba xikan’we va ya fika aKiriyati-Uzoti.
40 Se Balaki a yendla magandzelo hi tihomu ni tinyempfu, a rhumela tin’wani ka Balamu ni ka varhangeli lava a va li na yena.
41 Nimixo Balaki a teka Balamu a mu yisa aBamoti-Bali lani a a kota ku vona Vayisrayele hinkwavu.+
Tinhlamunselu ta le hansi
^ Swi tikomba na ku vulavuliwa hi Ewufrata.
^ Kumbe: “tihosana ta”.
^ Hi Xiheberu: “mbongolo ya xisati”.
^ Kumbe: “ndzilakanu”.
