Tinhlayo 30:1-16
30 Se Moxe a byela varhangeli+ va tinxaka ta Israyele a ku: “Yehovha a hlaye leswi:
2 Loko wanuna o yendla xitshembiso+ ka Yehovha kumbe a funga+ ku titsona xanchumu, a fanele a yendla leswi a nga swi hlaya.+ A fanele a hetisisa hinkwaswu leswi a nga swi tshembisa.+
3 “Loko wansati o yendla xitshembiso ka Yehovha kumbe a funga swaku a ta titsona xanchumu na a ha li mutsongo naswona na a ha tshama kaya ka papayi wa yena,
4 kutani papayi wa yena a twa xitshembiso xolexo kumbe leswi a nga funga swaku a ta titsona swona naswona papayi wa yena a nga mu yaleli, switshembiso swa yena hinkwaswu leswi a nga swi tshembisa a fanele a swi hetisisa, ku patsa ni leswi a nga funga swaku a ta titsona swona.
5 Kambe loko papayi wa yena o mu tsimbisa loko a twa swaku a yendle switshembiso kumbe a funge ku titsona xanchumu, a swi bohi ku swi hetisisa. Yehovha a ta mu rivalela hikusa papayi wa yena a mu tsimbisile.+
6 “Kambe loko o chadiwa na a ha yendle xitshembiso kumbe a fungile hi magugu,
7 kambe nuna wa yena a nga mu yaleli hi siku leli a swi twaka hi lona, switshembiso swa yena kumbe leswi a nga funga ku titsona swona a fanele a swi yendla.
8 Kambe loko nuna wa yena o mu tsimbisa hi siku leli a swi twaka hi lona, a nga xi helisa xitshembiso lexo kumbe leswi a nga swi funga hi magugu,+ naswona Yehovha a ta mu rivalela.
9 “Kambe loko wansati lweyi a nga feliwa hi nuna kumbe wansati lweyi a nga heleliwa hi wukati o yendla xitshembiso, swo boha a hetisisa hinkwaswu leswi a nga swi tshembisa.
10 “Kambe loko wansati o yendla xitshembiso kumbe a funga ku titsona xanchumu na a ha li kaya ka nuna wa yena
11 kutani nuna wa yena a swi twa naswona a nga mu yaleli, switshembiso swa yena hinkwaswu kumbe leswi a nga funga ku titsona swona a fanele a swi hetisisa hikusa a tibohelile.
12 Kambe loko nuna wa yena o swi helisa swa wugamu switshembiso hinkwaswu kumbe leswi a nga funga ku titsona swona hi siku leli a nga swi twa hi lona, a swi bohi swaku a swi hetisisa.+ Nuna wa yena a swi helisile naswona Yehovha a ta mu rivalela wansati yelweyo.
13 Wanuna a ni mfanelo ya ku helisa kumbe ku pfumelela switshembiso hinkwaswu swa nsati wa yena kumbe hinkwaswu leswi a nga funga ku titsona swona.
14 Kambe loko ko hundza masiku na nuna wa yena a nga hlayi nchumu, leswi swi ta vula swaku wa pfumelelana ni switshembiso swa yena hinkwaswu kumbe leswi a nga funga ku titsona swona. A swi tiyisile hikusa a nga yalanga hi siku leli a nga mu twa na a swi yendla.
15 Kambe loko o swi helisa na se ku hundze masiku na a swi twile, a ta rhwala nandzu wa nsati wa yena.+
16 “Leyi i minawu leyi Yehovha a nga yi byela Moxe leyi tirhaka ka wanuna ni nsati wa yena, ka papayi ni n’wana wa yena wa ntombhi wamutsongo lweyi a ha tshamaka na yena kaya.”