Tinhlayo 31:1-54
31 Kutani Yehovha a byela Moxe a ku:
2 “Khatisa+ Vamidiyani+ hi mhaka ya leswi va nga swi yendla ka Vayisrayele. Se u ta gama u fa.”+
3 Se Moxe a byela vanhu a ku: “Lulamiselani vavanuna xikarhi ka n’wina leswaku va ta ya lwa ni Vamidiyani va yendla leswi Yehovha a swi lavaka, va va khatisa.*
4 U fanele u rhumela 1.000 wa vanhu anyimpini va lixaka lin’wani ni lin’wani ka tinxaka hinkwatu ta Israyele.”
5 Se ka mindjangu* ya Vayisrayele,+ ku langiwe 1.000 wa vanhu ka lixaka ha lin’we, 12.000 wa vanhu lava nga lulamiseliwa nyimpi.
6 Kutani Moxe a rhuma 1.000 wa vanhu va lixaka lin’wani ni lin’wani swaku va ya nyimpini, ku patsa na Feniyasi+ n’wana wa muprista Eliyazari lweyi a a rhwale swibya swa ku kwetsima, na a khome ni timhalamhala*+ leti nga ta chayiwa nyimpini.
7 Se va lwa ni Vamidiyani hi ku landza leswi Yehovha a nga swi byela Moxe, va dlaya vavanuna hinkwavu.
8 Ka lava nga dlayiwa, a ku ni 5 wa tihosi ta Vamidiyani, ku nga Evhi, Rekemi, Zuri, Huri na Reba. Va tlhele va dlaya na Balamu+ n’wana wa Beyori hi xipada.
9 Vayisrayele va teka vavasati ni vana va Vamidiyani va va yendla swikarawa. Va tlhela va teketela ni tihomu ta vona hinkwatu, tinyempfu ta vona hinkwatu ni minchumu ya vona hinkwayu.
10 Madoropa ya vona hinkwawu lawa a va tshama ka wona ni miminti* ya vona hinkwayu leyi nga ni mimuru va swi hise hi ndzilu.
11 Va teka swilo hinkwaswu ni tshomba hinkwalu, vanhu ni swifuyu.
12 Va gama va tisa swikarawa, tshomba ni swilo hinkwaswu ka Moxe na muprista Eliyazari ni ka Vayisrayele, amananga ya Mowabu+ akusuhi ni Yordani, aYeriko.
13 Se Moxe na muprista Eliyazari ni varhangeli hinkwavu va huma swaku va ya tlhangana na vona ahandle ka matende.
14 Kambe Moxe a kwatela varhangeli va masonchwa ya nyimpi, varhangeli va mintlawa ya 1.000 wa masonchwa ni varhangeli va mintlawa ya 100 wa masonchwa lava a va vuya hi nyimpini.
15 Moxe a va byela leswi: “Mi va tshikele yini vavasati hinkwavu va hanya?
16 Phela hi vona va nga byeliwa hi Balamu swaku va xengetela Vayisrayele leswaku va nga tshembeki+ ka Yehovha hi ku gandzela Peyori,+ lakakuva vanhu va Yehovha va za va weliwa hi ntungu.+
17 Swoswi mi fanele mi dlaya vana hinkwavu va madjaha mi tlhela mi dlaya ni vavasati hinkwavu lava nga tshama va famba masangu ni wanuna.
18 Kambe swintombhani leswi kalaka swi nga se tshama swi famba masangu ni wanuna,+ swi tshikeni, mi nga swi dlayi.
19 Kutani mi fanele mi ya tshama handle ka matende anze ku hela 7 wa masiku. Mun’wani ni mun’wani wa n’wina lweyi a nga dlaya munhu ni mun’wani ni mun’wani lweyi a nga khumba ntsumbu+ a fanele a tibasisa+ hi siku la wunharhu ni hi siku la wu 7, n’wina ni swikarawa swa n’wina.
20 Mi fanele mi basisa mpahla, nchumu xin’wani ni xin’wani lexi nga yendliwa hi xikhumba, xin’wani ni xin’wani lexi nga yendliwa hi mavoya ya mbuti ni xin’wani ni xin’wani lexi nga yendliwa hi mapulangu.”
21 Se muprista Eliyazari a byela masonchwa lawa a ma ye nyimpini a ku: “Lowu i nawu lowu Yehovha a nga wu byela Moxe a ku:
22 ‘Woru, prata, kobre, nsimbi, xitanyu ni muthofu,
23 hinkwaswu leswi kalaka swi nga pshi loko swi hundzisiwa hi ka ndzilu, mi fanele mi swi basisa hi ndzilu, kutani swi ta va leswi nga basa. Kambe swi fanele swi tlhela swi basisiwa hi mati ya ku basisa hi wona.+ Hinkwaswu leswi pshaka loko swi hundzisiwa hi ka ndzilu, swi fanele swi basisiwa hi mati.
24 Hi siku la wu 7 mi fanele mi hlampsa mpahla ya n’wina, mi va lava nga tenga, se hi kona mi nga nghenaka ka matende.’”+
25 Kutani Yehovha a byela Moxe a ku:
26 “Konta swilo hinkwaswu leswi va nga vuya na swona hi nyimpini, u konta swikarawa ni swifuyu; swi konti na u na muprista Eliyazari ni varhangeli va mindjangu ya vanhu.
27 Swi yave hi xikarhi leswi va nga swi teka nyimpini, swi ta nyikiwa masonchwa lawa ma nga ya nyimpini ni vanhu hinkwavu.+
28 Ka masonchwa lawa ma nga ya nyimpini u fanele u teka munhu mun’we ka 500 wa vona, homu yin’we ka 500 wa tihomu, ka timbongolo, ka tinyempfu ni timbuti, swaku swi va rhesa ka Yehovha.
29 U fanele u swi teka ka hafu leyi va nga yaveliwa yona, u swi nyika muprista Eliyazari swaku swi va munyikelo wa Yehovha.+
30 Ka hafu leyi nga nyikiwa Vayisrayele, u fanele u teka xin’we ka 50 wa swona, ka vanhu, tihomu, timbongolo, tinyempfu ni timbuti u swi nyika Valevhi,+ lava tirhaka ka tabernakela ya Yehovha.”+
31 Moxe na muprista Eliyazari va yendla leswi Yehovha a nga swi byela Moxe.
32 Tshomba ni hinkwaswu leswi masonchwa ma nga swi teketela, a swi li 675.000 wa tinyempfu ni timbuti,
33 72.000 wa tihomu
34 ni 61.000 wa timbongolo.
35 32.000 wa vavasati lava kalaka va nga se tshama va famba masangu ni vavanuna.+
36 Hafu leyi nga yaveliwa lava nga ya nyimpini a ku li 337.500 wa tinyempfu ni timbuti.
37 Rhesa la Yehovha leli nga susiwa ka tinyempfu ni timbuti toleto a li li la 675 wa tona.
38 A ku ni 36.000 wa tihomu naswona rhesa la tona ka Yehovha a ku li 72 wa tihomu.
39 A ku ni 30.500 wa timbongolo naswona rhesa la tona ka Yehovha a ku li 61 wa timbongolo.
40 A ku ni 16.000 wa vanhu naswona rhesa la vona ka Yehovha a ku li 32 wa vanhu.
41 Kutani Moxe a nyika muprista Eliyazari+ rhesa swaku li va munyikelo wa Yehovha, hi ku landza leswi Yehovha a nga mu byela swona.
42 Ka hafu leyi nga yaveliwa Vayisrayele, leyi Moxe a nga yi yava ka leswi nga nyikiwa masonchwa a ku ni leswi:
43 337.500 wa tinyempfu ni timbuti,
44 36.000 wa tihomu,
45 30.500 wa timbongolo
46 ni 16.000 wa vanhu.
47 Se ka hafu leyi nga yaveliwa Vayisrayele, Moxe a teke munhu mun’we ka 50 wa vanhu, ni xifuyu xin’we ka 50 wa swona a swi nyika Valevhi,+ lava a va tirha ka tabernakela ya Yehovha,+ hi ku landza leswi Yehovha a nga mu byela swona.
48 Kutani varhangeli va mintlawa ya masonchwa ya nyimpi,+ lava a va li varhangeli va mintlawa ya 1.000 wa masonchwa ni varhangeli va mintlawa ya 100 wa masonchwa va ya ka Moxe,
49 va fika va ku: “Vatirhi va wena va kontile masonchwa lawa ma rhangeliwaka hi hina naswona a ku choti munhu.+
50 Kutani pfumelela mun’wani ni mun’wani wa hina a nyikela leswi a nga swi kuma swaku swi va gandzelo la Yehovha, swilo swa woru, mapulsera* ya minenge, mapulsera, ma aneli ya ku karimbara hi wona, switlan’wani swa tindleve ni swiphatiphati swin’wani leswaku hi ta kombela ku rivaleliwa ka Yehovha.”
51 Se Moxe na muprista Eliyazari va yamukela woru leli va nga li nyikela ni swiphatiphati hinkwaswu.
52 Woru hinkwalu leli va nga li nyikela ka Yehovha, leli nga nyikeliwa hi varhangeli va mintlawa ya 1.000 wa masonchwa ni varhangeli va mintlawa ya 100 wa masonchwa a li peza 190.950 wa makilu.*
53 Sonchwa lin’wani ni lin’wani li tipambulele swilo ka leswi nga tekiwa nyimpini.
54 Moxe na muprista Eliyazari va yamukele woru leli nga humesiwa hi varhangeli va mintlawa ya 1.000 wa masonchwa ni varhangeli va mintlawa ya 100 wa masonchwa, va li yisa ka tende la ntlhanganu swaku li va xitsundzuxu ka Vayisrayele aphambheni ka Yehovha.
Tinhlamunselu ta le hansi
^ Kumbe: “va va hakelisa.”
^ Hi Xiheberu: “magidi ya Vayisrayele”.
^ Ku nga minchumu ya ku hambiwa hi timhondzo kumbe tinsimbi, swi chaya ku fananyana ni vhuvhuzela.
^ Kumbe: “matende”.
^ Kumbe: “masindza”.
^ Hi Xiheberu: “16.750 wa tixikele.” Xikele yin’we a yi peza 11,4 wa magrama. Vona Xiyengetelo B14.
