Tinhlayo 35:1-34
35 Yehovha a tama a khuluma na Moxe ka mananga ya le Mowabu aYordani+ le Yeriko a ku:
2 “Rhuma Vayisrayele swaku va nyika Valevhi madoropa ya ku tshama ka wona ka tshomba leli va nga ta li kuma,+ va fanele va va nyika ndhawu ya ku lusela ka yona leyi nga kusuhi ni madoropa wolawo.+
3 Va ta tshama ka madoropa wolawo, kasi tindhawu ta ku lusela ka tona ti ta va ta mintlhambi ya vona, swilo swa vona ni swifuyu leswin’wani hinkwaswu swa vona.
4 Tindhawu ta ku lusela ka tona leti nga ka madoropa leti nga ta nyikiwa Valevhi, ti fanele ti sukela ka khumbi la doropa, ti yanama 445* wa mametru ka matlhelo hinkwawu.
5 Ahandle ka doropa mi fanele mi pima 890* wa mametru ku ya awuxeni, 890 wa mametru ku ya sul,* 890 wa mametru ku ya awupeladlambu ni 890 ku ya norte,* se doropa li fanele li va xikarhi. Leti ti ta va tindhawu ta ku lusela ka tona ta madoropa ya vona.
6 “Mi ta nyika Valevhi 6 wa madoropa ya ku tumbela ka wona,+ swaku munhu lweyi a kalaka a nga dlayanga hi maxivomu a balekela ka wona,+ ku patsa ni 42 wa madoropa man’wani.
7 Mi ta nyika Valevhi 48 wa madoropa ni tindhawu ta kona ta ku lusela ka tona.+
8 Madoropa lawa mi nga ta va nyika wona ma ta susiwa ka tshomba la Vayisrayele.+ Ka lava nga vanyingi mi ta teka ya manyingi, ka lava nga vatsongo mi ta teka yamatsongo.+ Ntlawa wun’wani ni wun’wani wu ta nyika Valevhi madoropa man’wani ya wona, hi ku ya hi mpimu wa tshomba leli wu nga ta li kuma.”
9 Yehovha a tlhela a byela Moxe a ku:
10 “Byela Vayisrayele u ku: ‘Leswi mi tlulelaka Nambu wa Yordani mi ya ka tiko la Kanana,+
11 mi fanele mi langa madoropa ya ku tumbela ka wona, lawa swi nga ta mi vevukela ku fika ka wona, leswaku lweyi a nga ta tshuka a phazama a dlaya munhu a balekela kona.+
12 Madoropa lawa, ma ta va ndhawu ya n’wina ya ku tumbela ka yona loko mi baleka xaka la lweyi a nga dlayiwa,+ leswaku lweyi a nga dlaya a nga dlayiwi anze mhaka ya yena yi ya thethiwa phambheni ka xitshungu.+
13 A 6 wa madoropa ya ku tumbela ka wona lawa mi nga ta ma langa ma ta tirhela ku yendla leswo.
14 Mi ta langa madoropa manharhu ka tlhelo leli la Yordani+ ni madoropa manharhu ka tiko la Kanana,+ ma ta va madoropa ya ku tumbela ka wona.
15 A 6 wa madoropa lawa ya ku tumbela ka wona ma ta tirhisiwa hi Vayisrayele, munhu wa tiko lin’wani+ ni munhu lweyi a tshamaka na vona, leswaku lweyi a nga ta tshuka a phazama a dlaya munhu a ta balekela kona.+
16 “‘Kambe loko o mu ba hi nsimbi a fa, i mudlayi. Mudlayi a fanele a dlayiwa.+
17 Loko o mu ba hi ribye leli nga dlayaka munhu a gama a fa, i mudlayi. Mudlayi a fanele a dlayiwa.
18 Loko o mu ba hi mhandzi leyi nga dlayaka munhu a gama a fa, i mudlayi. Mudlayi a fanele a dlayiwa.
19 “‘Xaka* la lweyi a nga dlayiwa hi lona li nga ta dlaya mudlayi yelweyo. Loko li tlhangana na yena, li ta mu dlaya.
20 Loko munhu o fa hileswi a nga mu susumeta hi mhaka ya leswi a mu nyenyaka kumbe a mu ba hi nchumu hi ku lava ku mu vavisa,+
21 kumbe a mu ba a za a fa hi mhaka ya leswi a mu nyenyaka, lweyi a nga mu ba a fanele a dlayiwa. I mudlayi. Loko xaka la lweyi a nga dlayiwa li tlhangana na yena, li ta mu dlaya.
22 “‘Kambe loko o mu susumeta hi ku phazama kuve a a nga mu nyenyi kumbe a mu djikidjela hi nchumu na a nga lavi ku mu vavisa,+
23 kumbe a tshuka a wisa ribye li mu wela na a nga mu voni naswona na a nga li nala wa yena kumbe na a nga swi lavi ku mu vavisa a gama a fa,
24 vayavanyisi va fanele va yavanyisa xikarhi ka lweyi a nga mu ba ni xaka la lweyi a nga dlayiwa, hi ku landza minawu leyi.+
25 Kutani vayavanyisi va fanele va ponisa* mudlayi ka xaka la lweyi a nga dlayiwa, va mu tlhelisela ka doropa la ku tumbela ka lona leli a nga balekela ka lona; a fanele a tshama kona anze muprista wamukulu lweyi a nga langiwa hi ku cheliwa mafurha ya ku kwetsima+ a fa.
26 “‘Kambe loko mudlayi o huma ka doropa la ku tumbela ka lona leli a nga balekela ka lona,
27 se xaka la lweyi a nga dlayiwa li mu kuma handle ka doropa la ku tumbela ka lona, li gama li mu dlaya, a li nga ta va ni nandzu.
28 Hikusa mudlayi a fanele a tshama ka doropa la ku tumbela ka lona anze muprista wamukulu a fa. Kambe a nga tlhelela ka tiko la yena+ loko muprista wamukulu se a file.
29 Leyi i minawu leyi mi nga ta yi landzela loko mi yavanyisa vanhu naswona yi ta tlhela yi tirha ni ka vatukulu lava nga ta landzela, hinkwaku lomu mi tshamaka kona.
30 “‘Mun’wani ni mun’wani lweyi a dlayaka munhu,+ a fanele a dlayiwa loko ku ni wufakazi la timboni;+ kambe a ku na munhu lweyi a nga ta dlayiwa hi mhaka ya wufakazi la mboni yin’we ntsena.
31 Mi nga tshuki mi yamukela male ya ku ponisa mudlayi lweyi a faneliwaka hi ku fa, hikusa a fanele a dlayiwa.+
32 Mi nga tshuki mi yamukela male ya ku chunsa munhu lweyi a nga baleka a ya ka tiko la ku tumbela ka lona, leswaku a kota ku tlhelela ka tiko la yena na muprista wamukulu a nga se fa.
33 “‘Mi nga tshuki mi chakisa tiko leli mi tshamaka ka lona, hikusa ngati yi chakisa tiko,+ naswona a ku na ku rivaleliwa ka ngati leyi nga halatiwa atikweni, ku to rivaleliwa ntsena loko ngati ya lweyi a nga yi halata a dlayiwa.+
34 Mi nga tshuki mi chakisa tiko leli mi tshamaka ka lona, leli na mina ni tshamaka ka lona; hikusa mina Yehovha, ni tshama xikarhi ka Vayisrayele.’”+
Tinhlamunselu ta le hansi
^ Hi Xiheberu: “1.000 wa swisungunu”. Xisungunu xin’we a xi ringana 44,5 wa masentimetru. Vona Xiyengetelo B14.
^ Hi Xiheberu: “2.000 wa swisungunu”. Xisungunu xin’we a xi ringana 44,5 wa masentimetru. Vona Xiyengetelo B14.
^ Kumbe: “dzongeni”.
^ Kumbe: “n’walungu”.
^ Hi Xiheberu: “Muhakelisi wa ngati”.
^ Kumbe: “kutsula”.
