Tinhlayo 4:1-49
4 Yehovha a vulavula na Moxe na Aroni a ku:
2 “Mi fanele mi konta vana va Kohata+ axikarhi ka vana va Levhi, hi ku ya hi mindjangu ni swib’ongo swa vona,
3 mi konta hinkwavu lava nga ka ntlawa lowu tirhaka ka tende la ntlhanganu+ va ku sukela ka 30+ wa malembe ku ya ka 50.+
4 “Lowu i ntirho wa vana va Kohata ka tende la ntlhanganu.+ I ntirho wa ku kwetsima ngopfu:
5 Nkama ku nga ta rhurhiwa, Aroni ni vana va yena, va fanele va hawula kortina+ va mbhonya areka+ ya Wumboni hi lona.
6 Va ta yi mbhonya hi xikhumba xa foka,* ni hi panu ya azuli, va gama va tlhoma tinhonga ta ku rhwala hi tona.+
7 “Va ta tlhela va yandlala panu ya azuli henhla ka meza wa mapawu ya ku kwetsima,+ va gama va tlhatekela maparatu, tikopo, matijela ni majaru lama tirhisiwaka loko ku yendliwa gandzelo la vhinyu;+ pawu la ku kwetsima+ leli nyikeliwaka siku ni siku, li fanele li tshikiwa ka meza.
8 Va ta swi mbhonya hi panu ya ku pshuka ni xikhumba xa foka, se va tlhoma tinhonga ta ku rhwala hi tona.+
9 Kutani va ta teka panu ya azuli va mbhonya xa ku tlhoma swa ku voninga hi swona+ ni swa ku voninga hi swona,+ ni swa ku tima swa ku voninga hi swona, swa ku chela ndzilu+ ni swibya hinkwaswu leswi tirhiseliwaka ku chela mafurha ka swa ku voninga hi swona.
10 Va ta swi phutsela ni swibya swa kona hi xikhumba xa foka, va swi tlhateka ka nhonga leyi swi rhwaliwaka hi yona.
11 Va ta mbhonya altari ya woru hi panu ya azuli,+ va yi phutsela hi xikhumba xa foka, va gama va tlhoma tinhonga ta ku yi rhwala hi tona.+
12 Se va ta gama va teka swibya hinkwaswu+ leswi va tirhaka hi swona ka ndhawu ya ku kwetsima, va swi veka ka panu ya azuli va gama va swi mbhonya hi xikhumba xa foka, se va swi tlhateka ka nhonga leyi swi rhwaliwaka hi yona.
13 “Va fanele va susa nkuma* ka altari,+ va gama va yi mbhonya hi panu ya ku yendliwa hi mavoya ya ku pshuka.
14 Va ta veka swilo leswi va tirhaka hi swona ndzeni ka altari: Swa ku chela ndzilu, magarfu, mafoxolo, matijela ni swibya hinkwaswu leswi tirhisiwaka ka altari;+ se va gama va yi mbhonya hi xikhumba xa foka, kutani va tlhoma tinhonga ta yona ta ku yi rhwala.+
15 “Aroni ni vana va yena va fanele va rhanga hi ku heta ku mbhonya ndhawu ya ku kwetsima+ ni swilo swa yona hinkwaswu na ku nge se rhurhiwa. Loko se va hetile, vana va Kohata va ta tshinela, va fika va swi rhwala,+ kambe a va fanelanga va khumba ndhawu ya ku kwetsima hikusa va ta fa.+ Ntirho* lowu i wa vana va Kohata ka tende la ntlhanganu.
16 “Eliyazari+ n’wana wa muprista Aroni hi yena a nga ta vonelela mafurha ya swa ku voninga hi swona,+ swinun’hwelisu,*+ gandzelo la swakudla leli yendliwaka siku ni siku ni mafurha ya ku kwetsima.+ A ta vonelela tabernakela hinkwayu ni hinkwaswu leswi nga ka yona, ku patsa ni ndhawu ya ku kwetsima ni swibya swa yona.”
17 Yehovha a tama a vulavula na Moxe na Aroni a ku:
18 “Mi nga tshiki lixaka la mindjangu ya Vakohata+ li helisiwa xikarhi ka Valevhi.
19 Kambe va yendleleni leswi swaku va nga fi, hambi va tshinela ka swilo swa ku kwetsima hintamu.+ Aroni ni vana va yena va ta nghena, va yavela mun’wani ni mun’wani wa vona ntirho ni leswi a faneleke a swi rhwala.
20 Va nga tshuki va nghena va vona swilo swa ku kwetsima hambi ko va swa nkamanyana, hikusa va nga fa.”+
21 Yehovha a byela Moxe a ku:
22 “U fanele u konta vana va Jersoni,+ hi ku ya hi swib’ongo ni mindjangu ya vona.
23 U ta tsala hinkwavu lava nga ka ntlawa lowu tirhaka ka tende la ntlhanganu, lava sukelaka ka 30 wa malembe ku ya ka 50.
24 Mindjangu ya Vajersoni yi ta yaveliwa ku rhwala ni ku yendla ntirho lowu:+
25 Va ta rhwala tipanu ta tabernakela,+ tende la ntlhanganu, makortina ya lona ni xikhumba xa foka lexi mbhonyaka henhla,+ kortina leli pfalaka nyanghwa wa tende la ntlhanganu,+
26 makortina ya kintari,*+ kortina leli a li pfala nyanghwa wa kintari+ lani ku nga ni tabernakela ni altari, magoda ya tende ni swibya swa kona hinkwaswu ni hinkwaswu leswi tirhisiwaka ka tabernakela. Lowu wu ta va ntirho wa vona.
27 Mintirho hinkwayu ni hinkwaswu leswi rhwaliwaka hi Vajersoni+ swi fanele swi voneleliwa hi Aroni ni vana va yena; mi ta va yavela hinkwaswu leswi va faneleke va swi rhwala, swi ta va ntirho wa vona.
28 Lowu i ntirho lowu nga ta yendliwa hi mindjangu ya Vajersoni ka tende la ntlhanganu,+ naswona ntirho wa vona wu ta voneleliwa hi Itamari+ n’wana wa muprista Aroni.
29 “Se u ta tsalisa vana va Merari+ hi ku ya hi swib’ongo ni mindjangu ya vona.
30 Tsalisa hinkwavu lava nga ka ntlawa lowu tirhaka ka tende la ntlhanganu lava sukelaka ka 30 wa malembe ku ya ka 50.
31 Ntirho wa vona wu ta va wa ku rhwala+ leswi landzelaka, leswi tirhisiwaka ka tende la ntlhanganu: Maaru+ ya tabernakela, timhandzi,+ mapilari,+ swa ku tlhoma mapilari;+
32 mapilari+ ya kintari, swa ku tlhoma mapilari ya kintari,+ switaka swa tende,+ magoda ya tende ni hinkwaswu leswi tirhisiwaka ku patsa ni hinkwaswu leswi fambisanaka ni mintirho ya kona. Mi fanele mi komba mun’wani ni mun’wani leswi a faneleke a swi rhwala hi ku ya hi mavito ya vona.
33 Lowu i ntirho lowu faneleke wu yendliwa hi mindjangu ya vana va Merari+ ka tende la ntlhanganu, wu ta voneleliwa hi Itamari n’wana wa muprista Aroni.”+
34 Kutani Moxe na Aroni ni varhangeli+ va vanhu va tsalisa Vakohata+ hi ku ya hi mindjangu ni swib’ongo swa vona.
35 Ku tsalisiwe hinkwavu lava a va li ka ntlawa lowu tirhaka ka tende la ntlhanganu,+ lava a va sukela ka 30 wa malembe ku ya ka 50.
36 Hinkwavu lava nga tsalisiwa hi mindjangu ya vona a va li 2.750.+
37 Lava hi vona lava nga tsalisiwa ka mindjangu ya Vakohata, ku nga hinkwavu lava a va tirha ka tende la ntlhanganu. Moxe na Aroni va va tsalisile hi ku landza leswi Yehovha a nga swi byela Moxe.+
38 Vana va Jersoni+ va tsalisiwe hi ku ya hi mindjangu ni swib’ongo swa vona,
39 hinkwavu lava a va li ka ntlawa lowu tirhaka ka tende la ntlhanganu lava sukelaka ka 30 wa malembe ku ya ka 50.
40 Hinkwavu lava nga tsalisiwa hi mindjangu ni swib’ongo swa vona a va li 2.630.+
41 Lava hi vona lava nga tsalisiwa ka mindjangu ya vana va Jersoni, hinkwavu lava a va tirha ka tende la ntlhanganu. Moxe na Aroni va va tsalise hi ku landza leswi Yehovha a nga va byela swona.+
42 Vana va Merari va tsalisiwe hi ku ya hi mindjangu ni swib’ongo swa vona,
43 ku tsalisiwe hinkwavu lava a va li ka ntlawa lowu tirhaka ka tende la ntlhanganu,+ lava a va sukela ka 30 wa malembe ku ya ka 50.
44 Hinkwavu lava nga tsalisiwa hi mindjangu ya vona a va li 3.200.+
45 Lava hi vona lava nga tsalisiwa ka mindjangu ya vana va Merari, lava Moxe na Aroni va nga va tsalisa hi ku landza leswi Yehovha a nga swi byela Moxe.+
46 Moxe na Aroni ni varhangeli va Vayisrayele va tsalise Valevhi lava hinkwavu hi ku ya hi mindjangu ni swib’ongo swa vona;
47 a va sukela ka 30 wa malembe ku ya ka 50 naswona hinkwavu a va yaveliwe ku tirha ni ku rhwala swibya swa tende la ntlhanganu.+
48 Hinkwavu lava nga tsalisiwa a va li 8.580.+
49 Va tsalisiwe hi ku landza leswi Yehovha a nga swi byela Moxe, mun’wani ni mun’wani a a nyikiwa ntirho ni leswi a a fanele a swi rhwala; va tsalisiwe hi ku landza leswi Yehovha a nga mu byelisa xiswona Moxe.
Tinhlamunselu ta le hansi
^ I xiharhi xa ku tshama matini.
^ Kumbe: “nkuma lowu nga ni mafurha”. Ku nga nkuma lowu nga ni mafurha ya magandzelo.
^ Hi Xiheberu: “Ndzhwalu”.
^ Vona Ntlhamuselo.
^ Vona Ntlhamuselo.
