Tinhlayo 5:1-31
5 Yehovha a tama a vulavula na Moxe a ku:
2 “Byela Vayisrayele swaku va mu humesa handle ka matende munhu lweyi a nga ni mavabyi ya nhlokonho,*+ lweyi a humaka chaka ka xirho xa yena xa wununa+ kumbe xa wunsati ni lweyi a kalaka a nga tenganga hi mhaka ya ku khumba ntsumbu.+
3 Hambi a li wanuna kumbe a li wansati mi fanele mi va humesa handle. Mi fanele mi va humesa ka matende swaku va nga chakisi+ matende ya vanhu lava ni tshamaka xikarhi ka vona.”+
4 Se Vayisrayele va yendla swoleswo, va va humesa handle ka matende. Va yendle hi ku landza leswi Yehovha a nga swi byela Moxe.
5 Yehovha a tlhela a vulavula na Moxe a ku:
6 “Byela Vayisrayele u ku: ‘Loko wanuna kumbe wansati o tshuka a yendla xidjoho kumbe a nga tshembeki ka Yehovha, a ni nandzu.+
7 A* fanele a vula+ xidjoho lexi a* nga xi yendla, a tlhela a humesa male hinkwayu swaku a hakela nandzu wa yena naswona a fanele a yengetela 20 pursentu ka male yoleyo;+ a ta yi nyika lweyi a nga mu djohela.
8 Kambe loko lweyi a nga mu djohela a nga na xaka leli nga yamukelaka male leyi ya ku hakela nandzu, male yoleyo yi fanele yi yisiwa ka Yehovha, yi ta va ya muprista, ku patsa ni nyempfu ya xinuna ya ku kombela ku rivaleliwa leyi muprista a nga ta mu kombelela ku rivaleliwa hi yona.+
9 “‘Swilo hinkwaswu swa ku kwetsima leswi Vayisrayele va nga ta swi nyikela+ ka muprista, swi ta va swa yena.+
10 Lava nga ni swilo swa ku kwetsima swi ta tama swi va swa vona. Lweyi a nga ta nyika nchumu muprista, xi ta va xa muprista yelweyo.’”
11 Yehovha a tlhela a vulavula na Moxe a ku:
12 “Byela Vayisrayele u ku: ‘Ku fanele ku yendliwa leswi loko nsati wa munhu o kala a nga tshembeki ka nuna wa yena kutani a mu djohela
13 hi ku famba masangu ni wanuna mun’wani,+ kambe nuna wa yena a nga swi tivi naswona swi nga tsumbuliwi hi munhu, a tichakisa kambe ku nga na munhu lweyi a nga fakazaka mhaka leyi, naswona wansati lweyi a nge se tshama a kumiwa:
14 Loko nuna wa yena o va ni wukwele a tlhela a pimisela swaku nsati wa yena a mu djohelile kumbe a tichakisile hi wanuna mun’wani kumbe loko wanuna o va ni wukwele a pimisela swaku nsati wa yena a mu djohelile kuve a nga mu djohelanga nchumu,
15 wanuna a fanele a yisa nsati wa yena ka muprista ku patsa ni gandzelo la yena ni kilu* la mpupu wa maxalani.* A nga fanelanga a swi chela mafurha kumbe olibanu,* hikusa i gandzelo la swakudla la wukwele, gandzelo la swakudla la ku khumbukisa munhu xihoxo xa yena.
16 “‘Muprista a ta nyimisa wansati yelweyo phambheni ka Yehovha.+
17 Muprista a ta kha mati ya ku kwetsima hi khuwani, a ma patsa ni wuthulu leli nga lani ku nga ni tabernakela.
18 A ta nyimisa wansati phambheni ka Yehovha a gama a chunsa misisi ya wansati yelweyo, a veka gandzelo la swakudla la xitsundzuxu ka mavoko ya yena, ku nga gandzelo la swakudla la wukwele,+ se muprista a ta khoma mati ya ku bava lama vangaka xirhuku.*+
19 “‘Se muprista a ta fungisa wansati a ku: “Loko swi ku a wu fambanga masangu ni wanuna mun’wani ku sukela u nga tekana ni nuna wa wena,+ naswona u tshembekile a wu wonhanga nchumu, mati lawa lama vangaka xirhuku a ma nga ta ku yendla nchumu.
20 Kambe loko swi ku a wu tshembekanga ka nuna wa wena naswona u mu djohelile hi ku famba masangu ni wanuna mun’wani . . .”+
21 Kutani muprista a ta fungisa wansati hi xitshembiso lexi patsaka xirhuku, a tlhela a mu byela leswi: “Yehovha a a yendle swaku vito la wena li va xirhuku xikarhi ka vanhu naswona Yehovha a ta yendla swaku khwirhi la wena li pfimba u tlhela u nga ha psali.
22 Mati lama vangaka xirhuku ma ta nghena ka marhumbu ya wena ma yendla swaku khwirhi la wena li pfimba naswona a wu nge he psali.” Se wansati a fanele a ku: “Amen! Amen!”*
23 “‘Se muprista a fanele a tsala marito lawa ya xirhuku ka buku a tlhela a ma tima hi mati ya ku bava.
24 A ta yendla swaku wansati a phuza mati ya ku bava lama vangaka xirhuku naswona mati lawa ma ta nghena ndzeni ka yena kutani ma mu twisa ku vava.
25 Muprista a fanele a teka gandzelo la swakudla la wukwele+ ka mavoko ya wansati a li fambisa li ya hala ni hala phambheni ka Yehovha, se a gama a li tisa kusuhi ni altari.
26 Muprista a ta nusa hi voko swin’wani ka magandzelo ya swakudla swaku a yendla gandzelo la xitsundzuxu, a swi hisa ka altari,+ a gama a yendla swaku wansati a phuza mati wolawo.
27 Loko a heta ku phuza mati wolawo, naswona a nga basanga hileswi a kalaka a nga tshembekanga ka nuna wa yena, mati lama vangaka xirhuku ma ta nghena ndzeni ka yena ma mu twisa ku vava, se khwirhi la yena li ta pfimba a tlhela a nga ha psali, wansati a ta va a rhukiwile xikarhi ka vanhu va tiko la yena.
28 Kambe loko wansati a nga djohanga naswona a basile, a nge khatisiwi, swi ta koteka swaku a kuma nyimba a tlhela a psala.
29 “‘Lowu i nawu wa wukwele,+ lowu tirhaka ka wansati loko a djoha hi ku tichakisa na a ha tekanile ni nuna wa yena,
30 kumbe loko wanuna a va ni wukwele a pimisela swaku nsati wa yena a nga tshembekanga; a fanele a mu tisa phambheni ka Yehovha se muprista a fanele a yendla hinkwaswu leswi nga tsaliwa ka nawu lowu.
31 Wanuna a ta va a nga na nandzu, kambe nsati wa yena a ta tihlamulela hi mhaka ya xidjoho xa yena.’”
Tinhlamunselu ta le hansi
^ Kumbe: “lepra”. Ku nga muxaka wa mavabyi ya ku bola xikhumba.
^ Hi Xiheberu: “Va”.
^ Hi Xiheberu: “va”.
^ Hi Xiheberu: “1/10 ya efa”. Vona Xiyengetelo B14.
^ Kumbe: “sevhada.”
^ Muxaka wa swinun’hwelisu wa ku loko wu hisiwa wu humesa ximusi xa ku nun’hwela.
^ Kumbe: “makhombo.”
^ Kumbe: “A ku yendleke swoleswo! A ku yendleke swoleswo!”
