Tinhlayo 6:1-27
6 Yehovha a tama a khuluma na Moxe a ku:
2 “Byela Vayisrayele u ku: ‘Loko wanuna kumbe wansati a funga swaku a ta va Munaziri*+ wa Yehovha,
3 a nga fanelanga a phuza vhinyu kumbe mabyala man’wani. A nga tshuki a phuza ntsuvi* wa vhinyu kumbe wa mabyala man’wani.+ A nga fanelanga a phuza swa ku yendliwa hi mawuvha, kumbe a dla mawuvha ya ku tsakama kumbe ya ku woma.
4 Loko wa ha li Munaziri, a nga fanelanga a dla minchumu ya ku yendliwa hi mawuvha, minchumu leyi nga yendliwa hi mawuvha ya ku kala ma nga wupfanga ni matluka ya kona.
5 “‘Loko wa ha li Munaziri a nga fanelanga a tsemeta misisi ya nhloko ya yena.+ A fanele a yi tshika yi kula anze ma hela masiku ya yena ya Wunaziri; leswo swi ta kombisa swaku a tibohele ku yendla ntirho wa Yehovha.
6 Ka masiku hinkwawu lawa a nga tiboha swaku a tirhela Yehovha, a nga fanelanga a tshinela kusuhi ni ntsumbu wa munhu.
7 Hambiloko o feliwa hi papayi wa yena kumbe mamani wa yena kumbe makwavu wa yena wa xinuna kumbe wa xisati, a nga fanelanga a tichakisa+ hi mhaka ya leswi misisi ya yena yi kombisaka leswaku i Munaziri wa Xikwembu.
8 “‘Wa kwetsima ka Yehovha masiku hinkwawu ya Wunaziri la yena.
9 Kambe loko ko tshuka ku fa munhu swa kola na kola kusuhi na yena+ a gama a chakisa misisi leyi kombaka swaku a tibohele ku tirhela Xikwembu, a fanele a tsemeta misisi ya nhloko+ ya yena hi siku leli a nga ta basisiwa hi lona. A fanele a yi tsemeta hi siku la wu 7.
10 Hi siku la wu 8 a fanele a tisa matuva mambirhi kumbe swituvani swimbirhi ka muprista ka nyanghwa wa tende la ntlhanganu.
11 Muprista a ta teka lin’we a yendla gandzelo la xidjoho, se lelin’wani a yendla gandzelo la ku hisiwa, a mu kombelela ku rivaleliwa hi mhaka ya xidjoho xa yena+ xa ku khumba ntsumbu wa munhu. Se hi siku lolelo a ta tibasisa nhloko ya yena.
12 A fanele a tlhela a tibohela swaku a ta tirhela Yehovha hi ku tlhela a va Munaziri naswona a ta tisa xinyempfani xa xinuna lexi nga ni lembe lin’we swaku xi va gandzelo la nandzu. Kambe masiku lama nga hundza a ma nge he kontiwi hikusa a chakise Wunaziri la yena.
13 “‘Hi lowu nawu lowu tirhaka ka Munaziri: Loko masiku ya yena ya Wunaziri+ ma hela, a ta yisiwa ka nyanghwa wa tende la ntlhanganu.
14 Se loko a li kolanu, a fanele a yendlela Yehovha magandzelo hi xinyempfani xa xinuna xa ku hanya kahle lexi nga ni lembe lin’we, swaku xi va gandzelo la ku hisiwa;+ xinyempfani xa xisati xa ku hanya kahle lexi nga ni lembe lin’we, swaku xi va gandzelo la xidjoho;+ nyempfu ya ku hanya kahle swaku yi va gandzelo la ku kombela ku rhula,+
15 ndzhava wa mapawu ya redondu ya ku kala fermentu lama nga hambiwa hi mpupu wa ku siliwa kahle lowu nga patsiwa ni mafurha, pawu la ku woma la ku kala li nga na fermentu, leli nga totiwa mafurha, gandzelo la swona la swakudla+ ni magandzelo ya swona ya vhinyu.+
16 Muprista a ta swi nyikela ka Yehovha, a mu yendlela gandzelo la xidjoho ni gandzelo la ku hisiwa.
17 A ta nyikela nyempfu ya xinuna ka Yehovha swaku yi va gandzelo la ku kombela ku rhula ku patsa ni ndzhava wa mapawu ya ku kala fermentu, naswona muprista a ta humesa gandzelo la swakudla+ ni gandzelo la vhinyu.
18 “‘Munaziri a fanele a tsemeta misisi ya yena+ ka nyanghwa wa tende la ntlhanganu naswona a ta teka misisi leyi a nga yi fuya na wa ha li Munaziri a yi hoxa ka ndzilu lowu ku yendliwaka gandzelo la ku kombela ku rhula ka wona.
19 Loko Munaziri se a tsemetile misisi leyi a yi komba swaku i Munaziri, muprista a fanele a teka katla la ku swekiwa+ la nyempfu ya xinuna, pawu lin’we la redondu la ku kala fermentu, pawu lin’we la ku womisiwa la ku kala fermentu, a swi veka ka mavoko ya Munaziri.
20 Kutani muprista a fanele a swi fambisa swi ya hala ni hala aphambheni ka Yehovha+ swaku swi va gandzelo leli fambisiwaka. I nchumu xa ku kwetsima ka muprista ku patsa ni xifuva xa gandzelo leli fambisiwaka ni nenge lowu nga nyikeliwa.+ Se hi kona lweyi a a li Munaziri a nga phuzaka vhinyu.
21 “‘Hi lowu nawu wa Munaziri+ lweyi a fungaka: Loko a funga ku nyikela ka Yehovha leswi a nga swi kotaka swaku a yengetela ka leswi laviwaka hi nawu, a fanele a yendla leswi a nga swi funga kuva a kombisa swaku wa wu hlonipha nawu wa Wunaziri la yena.’”
22 Kutani Yehovha a khuluma na Moxe a ku:
23 “Byela Aroni ni vana va yena u ku: ‘Mi ta va katekisa+ hi ndlela leyi Vayisrayele:
24 “Yehovha a a mi katekise+ a tlhela a mi vhikela.
25 Yehovha a a mi kombe swaku wa mi tsakela+ hi ku mi komba timpsalu.
26 Yehovha a a mi kombe wunene, a mi nyika ku rhula.”’+
27 Va fanele va vitana vito la mina ka Vayisrayele+ swaku ni ta va katekisa.”+
Tinhlamunselu ta le hansi
^ Hi Xiheberu i nazír, leswi vulaka “Lweyi A Nga Langiwa; Lweyi A Nga Tinyiketela; Lweyi A Nga Hambanisiwa”.
^ Ku nga mati ya ku bava lawa ma humaka loko ku lovekiwa mawuvha.
