Tinhlayo 8:1-26
8 Yehovha a khuluma na Moxe a ku:
2 “Byela Aroni u ku: ‘Loko u tlhavika swa ku voninga hi swona, a 7 wa swona swi fanele swi voninga ka ndhawu leyi yi nga phambheni ka xa ku tlhoma swa ku voninga hi swona.’”+
3 Se Aroni a yendla leswi: A tlhavika swa ku voninga hi swona swaku swi voninga ka ndhawu leyi nga phambheni ka xa ku tlhoma swa ku voninga hi swona,+ hi ku landza leswi Yehovha a nga byela Moxe.
4 Xa ku tlhoma swa ku voninga hi swona a xi yendlisiwe xileswi: A xi yendliwe hi woru, ku sukela hansi ku ya fika lomu xi nga sasekisiwa hi swiluva.+ A xi yendliwe hi ku ya hi leswi Yehovha a nga swi komba Moxe hi ndlela ya singita.*+
5 Yehovha a tlhela a khuluma na Moxe a ku:
6 “Humesa Valevhi xikarhi ka Vayisrayele, u ya va basisa.+
7 U ta yendla leswi swaku u va basisa: Va n’wan’wasele hi mati,* kutani va tsemeta misisi ya muzimbha hinkwawu hi xisingwani, va hlampsa mpahla ya vona va tlhela va basisa ni muzimbha wa vona.+
8 Se va ta teka xihon’wani xa xinuna+ ni gandzelo la xona la swakudla+ la mpupu wa ku siliwa kahle lowu nga patsiwa ni mafurha, kutani wena u ta teka xihon’wani xin’wani xa xinuna swaku xi va gandzelo la xidjoho.+
9 U ta nyimisa Valevhi phambheni ka tende la ntlhanganu, u gama u hlengeleta Vayisrayele hinkwavu.+
10 Loko u nyima ni Valevhi phambheni ka Yehovha, Vayisrayele va ta tlhateka mavoko ka tinhloko ta Valevhi.+
11 Kutani Aroni a fanele a nyikela Valevhi ka Yehovha, va va gandzelo leli fambisiwaka+ leli nga susiwa ka Vayisrayele naswona va ta tama va tirhela Yehovha.+
12 “Se Valevhi va ta tlhateka mavoko ya vona ka tinhloko ta tihomu ta xinuna.+ Va ta gama va nyikela yin’we ka Yehovha va yendla gandzelo la xidjoho, kasi leyin’wani va ta yendla gandzelo la ku hisiwa swaku va ta rivaleliwa swidjoho.+
13 Kutani u ta yendla swaku Valevhi va nyima phambheni ka Aroni ni vana va yena, u va nyikela ka Yehovha swaku va va gandzelo leli fambisiwaka.
14 U fanele u ni langela Valevhi xikarhi ka Vayisrayele, Valevhi va ta va va mina.+
15 Se Valevhi va ta gama va tirha ka tende la ntlhanganu. U fanele u yendla leswo swaku u va basisa ni ku va nyikela swaku va va gandzelo leli fambisiwaka.
16 Hikusa va nyikeliwe ka mina, i nyiko leyi nga susiwa ka Vayisrayele. Ka ndhawu ya hinkwavu lava nga matevula ya Vayisrayele,+ ni ta teka vona swaku va va va mina.
17 Hikusa matevula hinkwawu ya Vayisrayele i ya mina, ya vanhu ni ya swiharhi.+ Ni ma basise hi siku leli ni nga ba matevula hinkwawu ka tiko la Gibita.+
18 Ka ndhawu ya matevula hinkwawu xikarhi ka Vayisrayele, ni ta teka Valevhi.
19 Ni ta nyikela Valevhi lava nga susiwa ka Vayisrayele swaku va va nyiko ka Aroni ni vana va yena, swaku va ta yendlela Vayisrayele ntirho ka tende la ntlhanganu+ ni ku va kombelela ku rivaleliwa, leswaku Vayisrayele+ va nga humeleliwi hi khombo hi mhaka ya ku tshinela ka ndhawu ya ku kwetsima.”
20 Moxe na Aroni ni Vayisrayele hinkwavu va yendle swoleswo ka Valevhi. Vayisrayele va yendle hinkwaswu leswi Yehovha a nga byela Moxe swaku swi fanele swi yendliwa ka Valevhi.
21 Se Valevhi va tibasisa va tlhela va hlampsa mpahla ya vona,+ Aroni a gama a va nyikela ka Yehovha swaku va va gandzelo leli fambisiwaka.+ Kutani Aroni a yendla gandzelo swaku va ta rivaleliwa swidjoho kuva va basisiwa.+
22 Se Valevhi va game va ya ka tende la ntlhanganu swaku va ya yendla ntirho, na va rhangeliwa hi Aroni ni vana va yena. Va yendle leswo ka vona hi ku landza leswi Yehovha a nga swi rhuma Moxe swaku a swi yendla ka Valevhi.
23 Yehovha a byela Moxe a ku:
24 “Mhaka yin’wani leyi khumbaka Valevhi hi leyi: Wanuna lweyi a nga ni ku sukela ka 25 wa malembe ku ya henhla, a ta sungula ku tirha ka tende la ntlhanganu.
25 Kambe nkama a nga ta tlhanganisa 50 wa malembe, a ta tshika ku tirha.
26 A nga va pfuna vamakwavu lava tirhaka ka tende la ntlhanganu, kambe a nga fanelanga a tirhela kolanu. Leswi, hi leswi u faneleke u swi yendla ka Valevhi ni mintirho ya vona.”+
Tinhlamunselu ta le hansi
^ Hi Xiheberu: “ka xivono.” Vona Ntlhamuselo.
^ Hi Xiheberu: “mati ya ku susa xidjoho”.
